Молитва Богородице перед иконой Избавительница
Возбрани врагом нашим озлобляти нас и от Господа нашего отлучати конечне и нас научи пети Тебе, Богородице, весело:
Радуйся, от горя, бед и гибели спасающая нас, бедствующих Избавительнице.
Ангелов множество по Твоему, Мати наша, повелению ополчаются на избавление наше грозно. Ты же приими молитву сию:
Радуйся, ангелов на спасение наше посылающая;
Радуйся, Царице горних чинов, небесную их помощь нам дарующая.
Радуйся, ангелом хранити нас повелевающая;
Радуйся, воинством ангельским врагов наших поражающая.
Радуйся, от горя, бед и гибели спасающая нас, бедствующих Избавительнице.
Видят бедствующие толикую и многую помощь Твою сердечно Тя призывающим и наставляются тем пети Сыну Твоему непрестанно: Аллилуия.
Разумеют мнози, яко мирови Тя дарова Сын Твой избавительницу бедствующим, темже поем Тя сице:
Радуйся, бедствующих Мати;
Радуйся, страждущих утешение.
Радуйся, болящих исцеление;
Радуйся, ненадежных надеждо.
Радуйся, от горя, бед и гибели спасающая нас, бедствующих Избавительнице.
Сила Вышняго даровася Ти на помощь и спасение миру и нас, в бедах погибающих. И кто Тобою не избавлен бысть, и кто же не поет Сыну Твоему: «Аллилуия»?
Имущи непостижимую любовь к роду человечу, кая воздыхания не прияла еси, кия слезы не отерла еси, и кого не принудила еси призывати Тя? Темже приими от нас похвалы сия:
Радуйся, бедствующих скорое услышание;
Радуйся, погибающих известное спасение.
Радуйся, печальных и скорбных утешение;
Радуйся, плененных свобождение.
Радуйся, от горя, бед и гибели спасающая нас, бедствующих Избавительнице.
Буря несчастий налете на ны, спаси убо нас погибающих, спаси, Избавительнице наша, бурю погибельную на земли Укротившаго показующая нам и приемлющаго нашу песнь: Аллилуия.
Слышаша человечестии роди всю Твою к христианам дивную любовь и Твое мощное избавление их от всяких находящих на них лютых, научишася пети Тебе:
Радуйся, человеческаго рода от бед избавление;
Радуйся, бурь житейских прекращение.
Радуйся, уныния прогонительнице;
Радуйся, радости по скорби нам подательнице.
Радуйся, от горя, бед и гибели спасающая нас, бедствующих Избавительнице.
Боготечней звезде подобящися, мрак и темноту в грехолюбивых сердцах разгоняющи, да во свете Твоея любве узрят Господа и воспоют Ему: Аллилуия.
Видеша людие Российстии Твое не чаянное от многоразличных бед избавление, радостно поют Тебе сице:
Радуйся, в бедах наша помощнице;
Радуйся, скорбей наших отъятие.
Радуйся, печалей наших отгнание;
Радуйся, в скорбех наших утешение.
Радуйся, от горя, бед и гибели спасающая нас, бедствующих Избавительнице.
Проповедуют помощь Твою и любовь, Мати, исцеленнии, утешеннии, обрадованнии и спасеннии Тобою от бед, и поют Твоему высокодержавному Сыну: Аллилуия.
Возсиял есть нам свет спасения во мгле погибели, окружившей нас, и наставил пети Тебе, Владычице:
Радуйся, мрак душ наших просвещающая;
Радуйся, тьму греховную потребляющая.
Радуйся, светом радости души ободряющая;
Радуйся, мглу греха разгоняющая.
Радуйся, от горя, бед и гибели спасающая нас, бедствующих Избавительнице.
Хотящим нам конечному отчаянию предатися, отовсюду бедам належащим, помыслихом же о Тебе, Избавительнице, и ободрихомся и утешихомся, поюще Сыну Твоему: Аллилуия.
Новую и нежданную показала еси нам милость Свою, под державную руку Твою нас восприимши, и отвсюду вопием Ти:
Радуйся, Царице державная;
Радуйся, и нас под Твою державу восприявшая.
Радуйся, защиту Твою нам даровавшая;
Радуйся, врагов наших поразившая.
Радуйся, от горя, бед и гибели спасающая нас, бедствующих Избавительнице.
Странное чудо: на погибель обреченнии и в нуждах томящиися безчисленни внезапу спасение и избавление получают от Тебе, поюще Богу: Аллилуия.
Вси сущии во мраце скорбей, вси обуреваемии несчастий бурею, приидите к доброму пристанищу и нашему поможению, покрову Девы избавительницы, вопиюще Ей:
Радуйся, радостей источниче;
Радуйся, печалей прогнание.
Радуйся, бед избавление;
Радуйся, всяческаго покоя подательнице.
Радуйся, от горя, бед и гибели спасающая нас, бедствующих Избавительнице.
Все существо человеческое хвалит Тя, вси воспевают Тя, многоразличное избавление несущую, вместо печалей радость подающую поющим Сыну Твоему и Богу: Аллилуия.
Ветия многоумнии обезумеша, видяще Твое скорое чудесное от бед страждущих избавление, и умолкоша, нам поющим Ти:
Радуйся, чудесы мир удивившая;
Радуйся, чудесы нас укрепившая.
Радуйся, безбожие чудесами истребившая;
Радуйся, врагов силою Божиею посрамившая.
Радуйся, от горя, бед и гибели спасающая нас, бедствующих Избавительнице.
Спасти хотя всяку душу человечу, всею любовию печешися о ней, дондеже научиши ю пети Сыну Твоему: Аллилуия.
Стеною, мир христианский хранящая и всяку душу от врагов ограждающая явися икона Твоя, Избавительнице, в мире православнем и чудесы прославися, Тебе людем Божиим воспевающим:
Радуйся, наставнице наша;
Радуйся, избавительнице наша.
Радуйся, веселие наше;
Радуйся, вечная радосте наша.
Радуйся, от горя, бед и гибели спасающая нас, бедствующих Избавительнице.
Пение непрестанно приносим Ти, Владычице, Тобою избавленнии и Тобою паки радость обретшии и Божественному Сыну Твоему поющии радостно: Аллилуия.
Светосияющим светилом лучезарным во мраце греха явися нам икона Твоя, Избавительнице, наставляющая нас пети Тебе:
Радуйся, от глада нас избавляющая;
Радуйся, вредоносящее естество от растений отгоняющая.
Радуйся, посевы и леса, и все растущее от погибели спасающая;
Радуйся, земледельцев скорбящих утешение и труда их благословение.
Радуйся, от горя, бед и гибели спасающая нас, бедствующих Избавительнице.
Благодать, от иконы Твоея, Избавительнице, текущая, исцелений струи подающая и сердца веселием оживляющая, побеждает всех волею пети, Мати, Сыну Твоему и Богу: Аллилуия.
Воспеваем исцеления, от святыя иконы Твоея бываемыя, воспеваем наипаче воскресение Анастасия отрока и воспевающе поем:
Радуйся, мертвых воскрешающая;
Радуйся, умершая сердца оживляющая.
Радуйся, от смерти и вечнаго огня изымающая;
Радуйся, посмертное наше упование и защито.
Радуйся, от горя, бед и гибели спасающая нас, бедствующих Избавительнице.
О Всепетая, вселюбимая наша Мати! Умилосердися ныне и помилуй, в лютых и безысходных сущих нас скорбех избавляющи, научи нас сердечно воспевати Богу прощающему нас: Аллилуия.
(Этот кондак читается трижды, затем икос 1 и кондак 1)
О, Мати Божия, помоще наша и защито, присно буди избавительница наша, на Тя бо уповаем и всегда вседушно Тя призываем, умилосердися и помози, пожалей и избави, приклони ухо Твое и наша скорбныя и слезныя молитвы приими, и якоже хощеши успокой и обрадуй нас, любящих Твоего возлюбленнаго Сына, Емуже слава, честь и поклонение, со Отцем и Святым Духом, во веки веков. Аминь.
 |
Вам понравилась статья? Тогда подпишитесь на обновления, чтобы не пропускать свежие материалы и сразу же их получать на электронную почту! |
.jpg){kind=icon}