Познаем мир вместе
новые СТАТЬИ сайта
реклама

Акафист святителю Димитрию Ростовскому

икона святителя Димитрия Ростовского

 

Молитвы святителю Димитрию Ростовскому

Канон святителю Димитрию Ростовскому

 

Память празднуем 23 мая (5 июня), 19 июля
(1 августа), 21 сентября (4 октября), 28 октября
(10 ноября) 

 

Кондак 1

Возбранный чудотворче и изрядный угодниче Христов, многоцелебный чудес источниче, неисчерпаемыя благодати ходатаю, теплый молитвенниче, великий святителю Христов Димитрие, яко имеяй дерзновение ко Христу, Богу нашему, от всяких нас бед свободи зовущих:

Радуйся, Димитрие, новый и великий чудотворче.

Икос 1

Ангел нравом, аще и человек естеством был еси, святителю Димитрие, от самых бо младых ногтей ум твой пренебрег земная, в небесная вперил еси и, плоть нося, о плоти не радил еси. Тем же и вселися в тя Пресвятый Дух, Егоже тя обиталищем быти уведевше, похвальная восписуем ти:

Радуйся, незлобием твоим Агнцу, прореченнаго Исаиею, подражавый;

Радуйся, милосердием неимущыя препитавый.

Радуйся, воздержанием ангелов удививый;

Радуйся, постом и молитвою плоть твою удручивый.

Радуйся, к подвластным чадолюбивым отцем бывый;

Радуйся, страждущия сердоболием утешивый.

Радуйся, вместо тленных нетленная стяжавый;

Радуйся, небесный человече.

Радуйся, земный Ангеле;

Радуйся, Духа Святаго сосуде избранный.

Радуйся, Православия ревнителю;

Радуйся, душепагубных раздоров искоренителю.

Радуйся, Димитрие, новый и великий чудотворче.

 

Кондак 2

Видяще обильную реку чудес и исцелений, от святых твоих мощей истекающую, благоговения и радости исполньшеся, благодарим Бога, прославляющаго святыя Своя, Емуже и о тебе вопием: Аллилуия.

Икос 2

Разум истиннаго богословия внушая чадом Христовы Церкве, златословесными поучениями утверждал еси, еретичествующия же раскольники к спасительному единомыслию привлекаяй, в заблуждениих  тех обличал еси. О таковем твоем о душах наших попечении взываем ти сице:

Радуйся, таинниче Пресвятыя Троицы;

Радуйся, проповедниче неисчетных чудес Божиих.

Радуйся, апостольских преданий блюстителю;

Радуйся, брынских душегубцев победителю.

Радуйся, пламеню, ереси пожигаяй;

Радуйся, громе, устрашаяй соблазняющия.

Радуйся, свеще, Богом возжженная, мрак нечестия разгоняющая;

Радуйся, звездо, путь ко спасению показующая.

Радуйся, тимпане, Божию славу бряцаяй;

Радуйся, органе Духа Святаго.

Радуйся, Православия ревнителю;

Радуйся, душегубных расколов искоренителю.

Радуйся, Димитрие, новый и великий чудотворче.

 

Кондак 3

Силою благодати Божия еще во временней жизни приял еси власть, святе Димитрие, недуги исцеляти и бесы изгоняти, по смерти же твоей наипаче прослави тебе Всемогущий Бог многими чудотворениями, да вси, взирающе на сие, усердно притекают к тебе за исцелением недугов телесных, а паче душевных, Богу же вопиют: Аллилуия.

Икос 3

Имеяй неусыпное попечение о спасении душ, вверенных тебе от Бога, святителю Димитрие, пастырски к душеспасительной жизни, и словом и самым делом, показуя неленостный подвиг в подражании святым Божиим, непрестанно наставлял еси. Сего ради приими от нашего усердия достойныя похвалы тебе:

Радуйся, пастырю добрый, заблуждающих по горам суемудрия взыскавый;

Радуйся, благий рабе и верный, данный тебе от Господа талант усугубивый.

Радуйся, делателю винограда Христова;

Радуйся, благочестия столпе неподвижимый.

Радуйся, твердое забрало Христовы Церкве;

Радуйся, щите, защищаяй благочестие.

Радуйся, мечу острейший, посекаяй злочестие;

Радуйся, непоколебимое Православия основание.

Радуйся, твердый каменю веры;

Радуйся, кормило церковное, управляющее верных к тихому пристанищу.

Радуйся, Православия ревнителю;

Радуйся, душегубных расколов искоренителю.

Радуйся, Димитрие, новый и великий чудотворче.

 

Кондак 4

Буря ересей, от преисподних чрез Ария в Греции возродившаяся, в последняя лета козньми Мартина Арменина чрез брынских скитоначальников во Отечество наше принесенная, тишину Единыя, Святыя, Соборныя и Апостольския Церкве хотяше разрушити. Ты же, пастырю добрый, душу твою за овцы полагая, прогнав оных душепагубных волков, бурю суемудрия укротил еси, верныя же научил еси Триипостасному Богу взывати: Аллилуия.

Икос 4

Слышаша суемудреннии  раскольницы твое изобличение, еже ты, болезнуя о сердечном их заблуждении, написал еси, возбесишася зело, и мнози от них вместо должнаго исправления адский пламень изрыгнуша на тя; ты же, яко твердый адамант, под ударами злобы и ненависти не изменился еси. Сего ради Церковь святая блажит тя приветствии сими:

Радуйся, Ангелов сожителю;

Радуйся, апостолов преемниче.

Радуйся, святителей сопрестольниче;

Радуйся, Российский Златоусте.

Радуйся, Спиридону, Великому Василию, Григорию Богослову и прочим великим святителям единочестне;

Радуйся, Николаю Мир Ликийскому и Мелетию Антиохийскому единонравне.

Радуйся, преподобных собеседниче;

Радуйся, монахов и постников наставниче.

Радуйся, мучеников удобрение;

Радуйся, праведных украшение.

Радуйся, Православия ревнителю;

Радуйся, душегубных расколов искоренителю.

Радуйся, Димитрие, новый и великий чудотворче.

 

Кондак 5

Боготечная звезда явился еси в течении твоем, еже ты совершал еси, свое устрояя спасение, примером же верных душы назидая, научил еси благоприятно пети Богу: Аллилуия.

Икос 5

Видевше ангельстии чинове еще во временней жизни великия твоя подвиги во всяком благочестии и чистоте, удивляхуся, прославляюще Человеколюбца Бога, немощное человеческое естество подкрепляющаго. Мы же тя, усердно любовию почитающе, чествуем похвалами сими:

Радуйся, луча Трисолнечнаго Света;

Радуйся, светильниче, на свещнице церковнем поставленный.

Радуйся, светило, путь правый показующее;

Радуйся, воине Христов непобедимый.

Радуйся, Единосущныя Троицы истинный поборниче;

Радуйся, уста еретическая заградивый.

Радуйся, златословесными устнами небесныя истины вещаяй;

Радуйся, вся своя имения по словеси Господню продавый.

Радуйся, единаго безценнаго бисера, Христа Господа, снискавый;

Радуйся, вмале быв верен, над многими поставленный.

Радуйся, Православия ревнителю;

Радуйся, душегубных расколов искоренителю.

Радуйся, Димитрие, новый и великий чудотворче.

 

Кондак 6

Проповедник немолчный тайны Пресвятыя, Единосущныя и Неразделимыя Троицы был еси. Сего ради проповедует Россия величия Божия, показанная на тебе, святителю Димитрие, яко приял еси дар целити недуги душевныя и телесныя, да вси единым сердцем и единеми усты воспеваем Богу: Аллилуия.

Икос 6

Возсия в возлюбленной Богом душе твоей, блистаяй, истиннаго боговедения свет на освящение и просвещение верных, егоже с сладостию внимающии спасительному учению твоему, видяще, верно познаем, яко и в единонадесятый час пришедый, равный с древними святыми и богоносными отцы динарий приял еси. Темже восхваляем тя сице:

Радуйся, вместилище добродетелей;

Радуйся, достойное святыни жилище.

Радуйся, море, нечестие мира потопившее;

Радуйся, крине благоуханный, чудесно процветший.

Радуйся, сокровище медоточных учений;

Радуйся, уневестивый душу твою Жениху Христу.

Радуйся, смирения Его истинный подражателю;

Радуйся, иноческую нищету до конца сохранивый.

Радуйся, вшедый с мудрыми в радость Господа твоего;

Радуйся, благоухание Духа Святаго.

Радуйся, Православия ревнителю;

Радуйся, душегубных расколов искоренителю.

Радуйся, Димитрие, новый и великий чудотворче.

 

Кондак 7

Хотя достойным образом совершити подвиг, возложенный на тя от Бога, первее укреплял еси свою душу чтением житий святых, подражати сим себе располагая. Таже, ощутив пользу, от сего проистекающую, не обленился еси быти списателем жизни тех, с нимиже ныне в невечернем свете ликуеши, воспевая Богу: Аллилуия.

Икос 7

Новаго тя о нас молитвенника, целителя душ и телес и ходатая спасения вечнаго стяжахом; но благодарным сердцем и усты Богу, сицеваго чудотворца в наша времена даровавшему, достойно воспети не могуще, тебе, святителю и великий угодниче Христов Димитрие, похвальныя дерзаем приносити сице:

Радуйся, всем скорбящым приятное попечение;

Радуйся, скорый от всякия болезни безмездный врачу.

Радуйся, злых помыслов прогонителю;

Радуйся, яко твоими молитвами слепии прозреша.

Радуйся, яко твоим ходатайством хромии и безногии ходити начаша;

Радуйся, яко тобою от многих бесове отгнашася.

Радуйся, яко твоим заступлением разслабленнии исцелеша;

Радуйся, ломотныя и опухлыя уврачевавый.

Радуйся, трясавичных и огневичных болезней целебниче;

Радуйся, от неисцельныя водяныя и каменныя болезни здравы возставивый.

Радуйся, Православия ревнителю;

Радуйся, душегубных расколов искоренителю.

Радуйся, Димитрие, новый и великий чудотворче.

 

Кондак 8

Странно недугом неверствия одержимым видети, како в мертвеннем теле и тленнем возможно ангельское проходити житие непреткновенно, и по успении от единаго с верою прикосновения к телу, нетлением почтенному, дивная совершаются. Мы же на тебе, святителю Димитрие, новое чудес Всемогущаго Бога сбытие слышаще и видяще, молитвами твоими врачуеми, взываем Ему: Аллилуия.

Икос 8

Весь распалився искреннею любовию к Богу, всего себе предал еси воле Его и вся вещественная и тленная вменив уметы быти, духом, душею и сердцем возжелел еси наслаждатися лицезрением Божиим. Нынеже, яко блаженство вечное улучивый, не забуди и нас, требующих твоего заступления и ходатайства, да тем усерднее похвальная восписуем ти:

Радуйся, Богу совершенно угодивый;

Радуйся, венец безсмертныя жизни получивый.

Радуйся, насыщаяйся Божия благодати;

Радуйся, пророками за изъяснение их писаний похваленный.

Радуйся, апостолами за последование их стопам ублаженный;

Радуйся, святителями за единомысленную с ними ревность прославленный.

Радуйся, мучениками за списание страданий их увенчанный;

Радуйся, преподобными за подражание им во всяком благочестии и чистоте постом и молитвою к лику их причтенный.

Радуйся, праведниками за высочайшее твое смирение и труды превознесенный;

Радуйся, от всех святых радостными приветствиями сретенный.

Радуйся, Православия ревнителю;

Радуйся, душегубных расколов искоренителю.

Радуйся, Димитрие, новый и великий чудотворче.

 

Кондак 9

Всякия беды, скорби и напасти избавляй нас, святе Димитрие, твоими к Богу теплыми молитвами и потщися даровати нам временная благая, к жизни потребная, и вечная, да с тобою купно в селении праведных воспоем Богу: Аллилуия.

Икос 9

Витийство человеческое не возможет изрещи довольно благодати Божией, излиянную на тебе, святе Димитрие, но, любовию твоею побеждаеми, дерзаем воспевати тебе:

Радуйся, насадителю благих;

Радуйся, искоренителю злых.

Радуйся, чистоты селение;

Радуйся, печальных утешение.

Радуйся, отчаянных заступление;

Радуйся, сирот питателю.

Радуйся, обидимых предстателю;

Радуйся, преподобия и правды истинный хранителю.

Радуйся, пресветлый столпе облачный, просвещаяй множеством чудес;

Радуйся, облаче росоносный, погашаяй пламень страстей.

Радуйся, Православия ревнителю;

Радуйся, душегубных расколов искоренителю.

Радуйся, Димитрие, новый и великий чудотворче.

 

Кондак 10

Спасти хотя душу, о плоти твоей нерадил еси, но постом, бдением, молитвами и непрестанными труды плоть твою удручил еси, яко в тимпане, во умерщвлении телесе благоприятно Богу вопия: Аллилуия.

Икос 10

Стена еси, ограждающая от всех бед усердно тя в помощь призывающих, святителю Димитрие, яко во всех странах Российския державы ясно проповедуются обильная чудеса цельбоноснаго гроба твоего. Сего ради ублажаем тя сими:

Радуйся, чаша, источающая нам елей милости Божия;

Радуйся, больных исцеление.

Радуйся, немощных подкрепление;

Радуйся, страждущих скорая помоще.

Радуйся, претыкающихся о камень соблазна наставниче;

Радуйся, обидимых заступниче.

Радуйся, омраченныя просветивый;

Радуйся, просвещенныя утвердивый.

Радуйся, расточенная собравый;

Радуйся, к небесному немерцающему свету направивый.

Радуйся, Православия ревнителю;

Радуйся, душегубных расколов искоренителю.

Радуйся, Димитрие, новый и великий чудотворче.

 

Кондак 11

Пение немолчное принесл еси Пресвятей Троице, святе Димитрие, ово мыслию, ово гласом, ово словом, ово благотворении. И ныне, предстоя Престолу Божественному, моли о воспевающих о тебе: Аллилуия.

Икос 11

Светозарное твое учение, ум небесный являющее, нетлением мощей твоих ныне свидетельствуемое и множеством чудес, явное и действительнейшее средство дарова Человеколюбивый Бог на обличение еретичествующих и утверждение православных. Ныне святым и медоточным твоим учением напоеннии с благодарным чувством вопием ти:

Радуйся, учителю премудрый;

Радуйся, пастырю предивный.

Радуйся, исповедниче непоколебимый;

Радуйся, око слепым.

Радуйся, ного хромым;

Радуйся, руко безпомощным.

Радуйся, главо, исполненная небесным учением;

Радуйся, ластовице богоглаголивая.

Радуйся, источник златоструйный;

Радуйся, цевнице духовная.

Радуйся, Православия ревнителю;

Радуйся, душегубных расколов искоренителю.

Радуйся, Димитрие, новый и великий чудотворче.

 

Кондак 12

Благодать, данная ти от Бога, целити недуги телесныя и душевныя, святе Димитрие, созывает отвсюду почитающих явление твое и чающих тобою получити просимое от Бога. Темже и мы, припадающе со умилением, молим тя: избави нас от зол греховных, да благодарно Ему воспоем: Аллилуия.

Икос 12

Поюще твоя чудеса, святителю Димитрие, восхваляем Бога, даровавшаго тебе таковыя силы исцелений. Ты же не возгнушайся нас, грешных и недостойных рабов Его, но услыши нас, во умилении вопиющих тебе сице:

Радуйся, света неприступнаго зрителю;

Радуйся, Жениху Христу светел светильник сохранивый.

Радуйся, душевредное уныние от себе потребивый;

Радуйся, жестоким путем райских селений достигший.

Радуйся, нищетою богатая стяжавый;

Радуйся, смирением получивый высокая.

Радуйся, теснотою пространство вечное снискавый;

Радуйся, поношением Христа ради вечную с Ним славу приявый.

Радуйся, от Святыя Троицы увенчанный;

Радуйся, не гаданием, но лицем к лицу Бога смотряяй.

Радуйся, Православия ревнителю;

Радуйся, душегубных расколов искоренителю.

Радуйся, Димитрие, новый и великий чудотворче.

 

Кондак 13

О великий святителю Димитрие, расколов и ересей искоренителю, приими сие похвальное пение и моли Всемогущаго Бога умирити мир и спасти души наша, всех православно Триипостасному Богу вопиющих: Аллилуия.

(Этот кондак читается трижды, затем икос 1 и кондак 1)

 

МОЛИТВЫ

святителю Димитрию Ростовскому

 

               Молитва первая               

О предивный и преславный чудотворче Димитрие, исцеляй недуги человеческия! Ты неусыпно молиши Господа Бога нашего о всех грешных: молю убо тя, буди ми ходатай пред Господем и помощник на преоборение страстей ненасытныя плоти моея и на одоление стрел сопротивника моего диавола, ими же уязвляет немощное сердце мое и, аки гладный и лютый зверь, алчет погубити душу мою. Ты, святителю Христов, моя ограда, ты мое заступление и оружие! За твоим содействием сокруши вся во мне сопротивная воле Царя царствующих.

Ты, великий чудотворче, во дни подвигов твоих в мире сем ревнуя о православной Церкви Божией, яко истинный и добрый пастырь, неблазненно обличал еси грехи и невежествия людския, и уклонившихся от стези правды в ереси и расколы наставлял еси на путь истины. Споспешествуй убо и мне исправити краткровременный путь жизни моея, да непреткновенно пойду по стези заповедей Божиих и неленостно поработаю Господеви моему Иисусу Христу, яко единому Владыце моему, Искупителю и Праведному Судии моему. Темже припадая, молюся ти, угодниче Божий, егда изыти души моей из телесе моего, избави ю от темных мытарств: не имам бо добрых дел ко оправданию моему: не даждь сатане возгордитися победою над немощною душею моею, избави ю от геенны, идеже плач и скрежет зубов, и святыми молитвами твоими сотвори мя причастника Небеснаго Царствия в Троице славимаго Бога, Отца и Сына и Святаго Духа. Аминь.

 

Молитва вторая

О всеблаженне святителю Димитрие, великий угодниче Христов, Златоусте Российский! Услыши нас грешных, молящихся тебе, и принеси молитву нашу к Милостивому и Человеколюбцу Богу, Емуже ты ныне в радости святых и с лики Ангел предстоиши. Умоли Его благоутробие, да не осудит нас по беззаконием нашим, но да сотворит с нами по милости Своей, испроси нам у Христа и Бога нашего мирное и безмятежное житие, здравие душевное и телесное, земли благоплодие и во всем всякое изобилие и благоденствие, и да не во зло обратим благая, даруемая нам от Щедраго Бога, но в славу Его и в прославление твоего заступления.

Даруй нам богоугодно преити поприще временныя жизни: избави нас воздушных мытарств и настави нас на путь, ведущий в селения праведных, идеже празднующих глас непрестанный и зрящих Божия Лица неизреченную доброту. Церковь же Святую от ересей и расколов сохрани, верных укрепи, заблуждающих обрати и всем даруй вся, яже ко спасению и славе Божией подобающая. Отечество твое сохрани от врагов ненаветно, но поборай оружию крестоноснаго воинства, и подаждь нам всем твое архипастырское и святое благословение, да оным осеняеми, избавимся от козней лукаваго и избегнем всякия беды и напасти. Услыши моление наше, отче Димитрие, и моли непрестанно о нас Всесильнаго Бога, славимаго и покланяемаго в Триех Ипостасех, Емуже подобает всякая слава, честь и держава во веки веков. Аминь.

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
реклама