Познаем мир вместе
новые СТАТЬИ сайта
популярные бренды одежды из Беларуси

Канон Богородице перед иконой Боголюбская

Канон Богородице перед иконой Боголюбская

 

Акафист Богородице перед иконой Боголюбская

Молитва Богородице перед иконой Боголюбская

 

День памяти иконы Божьей Матери Боголюбская: 19 августа (1 сентября) 

 

Тропарь, глас 1-й

Боголюбивая Царице, Неискусомужная Дево, Богородице Марие, моли за ны Тебе возлюбившаго и рождшагося от Тебе Сына Твоего, Христа Бога нашего, подати нам оставление прегрешений, мирови мир, земли плодов изобилие, пастырем святыню и всему человечу роду спасение. Грады наша и страны Российския от нахождения иноплеменных заступи и от междоусобныя брани сохрани. О Мати Боголюбивая Дево! О Царице всепетая! Ризою Своею покрый нас от всякаго зла, от видимых и невидимых враг защити и спаси души наша (дважды).

 

Иной тропарь, глас тойже

Слава, и ныне: Всепетая и всеславная Царице Богородице, Мати всея твари Содетеля, христианская надеждо и заступнице, печальных утешение, ненадеющихся и отчаявшихся скорое надеяние, молим Тя: милостива буди нам, грешным, и не остави раб Своих, и не отрини моления верных, в скорбех и бедах пред честным образом Твоим избавления требующих. О Владычице, благая Помощнице! Ризою Твоею честною нас защити и от всех зол избави, молящи Сына Твоего, Христа Бога нашего, да спасет души наша, яко милосерд.

 

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Припев: Пресвятая Госпоже Богородице, услыши молитву раб Своих, молящихся Тебе.

Благоговеют пред Тобою, Богородице, Ангелов начальницы и святых чини честно служат Ти, праведнии красуются, князь же Андрей молится, и град Владимир похваляется светло. Мы же, грешнии, припадая к Твоей святой иконе, Боголюбивая, милости просим: озари наша сердца, Пресвятая Дево Богородице.

Пресвятая Госпоже Богородице, услыши молитву раб Своих, молящихся Тебе.

Князь Андрей вопияше со слезами: Пресвятая Царице Богородице, упование христианом, умоли Сына Своего, Христа Бога нашего, о державе Твоей, Ты бо изволила еси в пределех страны Владимирския обители Своей славно создатися во имя Твое, Боголюбивая.

Слава: Приидите, христоименитии людие, умы тайно очистившеся, притецем в храм Матере Христа Бога нашего, Боголюбимое место страны Владимирския яко Богоприятное селение видяще: в нем бо являет нам Свою милость Владычица.

И ныне: Под кров Твой, Богородице Дево, прибегаем вси роди человечестии: просвети Боголюбивая, место святое торжества Твоего и мы, грешнии раби Твои, молящеся пречистей Твоей иконе, просим от Тебе прияти великия милости.

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 3

Ирмос: Твоя песнословцы, Богородице, живый и независтный источниче, лик себе совокупльшия, духовно утверди, в Божественней Твоей славе, венцев славы сподоби.

Пресвятая Госпоже Богородице, услыши молитву раб Своих, молящихся Тебе.

Заступнице и покров граду Владимиру и всякому граду и стране, буди нам помощница и прибежище, Боголюбивая, всех нас заступи, Госпоже Царице и Богородице, и во всяких злых местех верныя сохрани.

Пресвятая Госпоже Богородице, услыши молитву раб Своих, молящихся Тебе.

Приими хвалу от уст наших недостойных, о Пресвятая Богородице, Дево Боголюбивая, надеждо наша и похвало! Покланяемся Твоему преславному образу: мольбу приими о рабех Твоих.

Слава: Пречистеи руце Твои, Царице и Богородице, милостивно воздвигни к Сыну Твоему и Богу нашему, просящи отпущения согрешений наших, и житие наше исправи, и всякия благодати исполни нас и милости сподоби.

И ныне: Пресвятая Дево, Мати Боголюбивая, сохрани рабы Твоя от всякия сопротивныя силы, и избави от всякия напасти, и радость миру сотвори душевную и телесную, и презри нам вся согрешения.

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

Господи, помилуй (трижды). Слава, и ныне.

 

Седален, глас 2-й

Моление теплое и стена необоримая, милости источниче, мирови прибежище, прилежно вопием Ти: Богородице Владычице, предвари и от бед избави нас, едина вскоре Предстательствующая.

 

Песнь 4

Ирмос: Седяй в славе, на Престоле Божества во облаце легце, прииде Иисус Пребожественный нетленною дланию и спасе зовущия: слава, Христе, силе Твоей.

Пресвятая Госпоже Богородице, услыши молитву раб Своих, молящихся Тебе.

Евангелия Христова богогласный списатель Лука написа образ Твой чудный, Всенепорочная Владычице, и Младенца Ти Превечнаго на руку изобрази: святый же князь Андрей в нощном видении узрев Тя, молящуюся за ны, даде нам образ Твоего моления, к немуже притекающия бед и напастей избавляеши.

Пресвятая Госпоже Богородице, услыши молитву раб Своих, молящихся Тебе.

О Пресвятая Дево Богородице, Ты изволила еси изыти из Греческия страны в чудотворном образе Твоем и дойти до святаго места, идеже и явилася еси князю Андрею; он же, моляся Тебе, со слезами вопияше: Пресвятая Дево Богородице, избави нас от всяких бед и скорбей.

Слава: На Тя упование возложихом, Боголюбивая Мати Дево, предстательницу Тя живота тверду и непоколебиму стяжахом, моли о нас, рабех Твоих, всещедраго Бога.

И ныне: Ты еси похвала и венец святым всем, вси на Тя по Бозе надежду возложихом и Тебе молимся, Боголюбивая Царице, Божия Мати, помощнице грешным и спасение рабом Твоим.

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 5

Ирмос: Ужасошася всяческая о Божественней славе Твоей: Ты бо, неискусобрачная Дево, имела еси во утробе над всеми Бога и родила еси безлетнаго Сына, всем воспевающим Тя мир подавающая.

Пресвятая Госпоже Богородице, услыши молитву раб Своих, молящихся Тебе.

Всякое место, Пресвятая Дево Богородице, Своею милостию просвещаеши, граду же Владимиру и месту Боголюбимому великая похвала и утверждение, в бедах сущим скорая помощница.

Пресвятая Госпоже Богородице, услыши молитву раб Своих, молящихся Тебе.

Проповедует преславно величия Твоя Лавра, яже во Твое имя начало прият, Мати Божия Боголюбивая, хвалят молебницы, и величают чудотворный образ Твоего моления о нас, и глаголют: утверди, Господи, обитель сию.

Слава: Приспе днесь память твоя, княже Андрее, радуется преславный град Владимир и Боголюбимое место красуется, зовуще: Пресвятая Дево Богородице, спаси нас и избави нас от всякия нужды и печали.

И ныне: Марие, златая кадильнице, страсти пагубныя отжени от нас и утверди нас непоколебимых, Пресвятая Дево Боголюбивая, не имамы бо иныя помощи, разве Тебе, Владычице.

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 6

Ирмос: Божественное сие и всечестное совершающе празднество, богомудрии, Богоматере, приидите, руками восплещим, от Нея рождшагося Бога славим.

Пресвятая Госпоже Богородице, услыши молитву раб Своих, молящихся Тебе.

Пришествием честнаго образа Твоего, Царице Богородице, освятила еси место Боголюбимое, на немже обитель Свою от древних лет сохраняеши, идеже и нас сподоби Тебе пети чистыми сердцы.

Пресвятая Госпоже Богородице, услыши молитву раб Своих, молящихся Тебе.

Не ужасайся, княже Андрее, и не дивися, видев образ Пречистыя Богородицы, от Греческия страны изшедший, дойти же града Ростова не изволивший: се бо дойде до места святаго, свыше пронареченнаго, и подвиже вопити тебе к Преблагословенней: о Всемилостивая! моли о нас Сына Своего, Христа Бога нашего.

Слава: Воздвигнем руце свои горе и вознесем хваления Господеви: се бо воистинну прииде Пречистая Дева и Богородица Боголюбивая, вся озаряя верныя Божественною Своею иконою.

И ныне: Храм живый и освященный сущи, Пренепорочная, пребезначальное Слово плотию родила еси, безсловесия мир избавльшее, избави и нас от напастей Твоими молитвами, Боголюбивая.

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

Господи, помилуй (трижды). Слава, и ныне.

 

Кондак, глас 3-й

Творение Патриарха Сергия

Дева днесь предстоит Сыну, руце Свои к Нему простирающи, святый князь Андрей радуется, и с ним Российская страна торжествует, нас бо ради молит Богородица превечнаго Бога.

 

Икос

Дево и Мати Боголюбивая, Царице Марие Богородице, милостивая ходатаице к Сыну Своему и Богу нашему за ны, рабы Твоя! Ты, Отроковице, благоизволила еси Твоему пречудному образу, егоже написа богоглаголивый Лука, первее от страны Греческия, потом же и от царствующаго града Киева изыти, по умолению благовернаго князя Андрея, и явити милость Свою новопросвещенным людем страны сея, но, не изволивши достигнути града Ростова, возлюбила еси пребывати в пределех Владимирских, идеже и явилася еси верному рабу Твоему, князю Андрею, молящися о людех Твоих Сыну и Богу Твоему, якоже древле святому Андрею в храме Влахернстем. Темже святый князь Андрей, новописав Тебе, молитвенницу о людех Твоих, остави нам сей молитвенный лик Твой, Боголюбивая Мати, и основа обитель в месте Твоего явления, из неяже от чудотворныя Твоея иконы и по всей стране Российстей милость, и помощь, и исцеление подаеши с верою приходящим к Тебе: нас бо ради молиши, Богородице, превечнаго Бога.

 

Песнь 7

Ирмос: Не послужиша твари Богомудрии паче Создавшаго, но огненное прещение мужески поправше, радовахуся поюще: препетый отцев Господь и Бог, благословен еси.

Пресвятая Госпоже Богородице, услыши молитву раб Своих, молящихся Тебе.

Боголюбивому житию первоначальник и наставник, княже Андрее, был еси и молебно подвизался еси пред пречудным образом Божия Матере, светлейши бо солнца возсия пречестная икона Пресвятыя Богородицы, Ейже молися спастися нам.

Пресвятая Госпоже Богородице, услыши молитву раб Своих, молящихся Тебе.

Херувим и Серафим превышши явилася еси, Богородице: Ты бо едина прияла еси Невместимаго Бога во утробе Своей и благоволила дойти образу Твоему Боголюбимаго места. Мы же, раби Твои, вси вернии, песньми Тя ублажаем.

Слава: Пресвятая Госпоже Дево Богородице, Мати Христа Бога нашего, всяко можеши нам быти помощница, посетившая чудным образом Твоим Боголюбимое место сие, Боголюбивая Владычице, посети и нас и не остави, якоже Сама веси, с верою приходящих к Тебе.

И ныне: Приступи к чудному образу Боголюбивыя Богоматере великий князь Андрей и, простер руце свои, взем яко безценное сокровище, и возвести отцу своему, како чудесно из Вышеграда посети место Боголюбимое.

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 8

Ирмос: Отроки благочестивыя в пещи Рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Пресвятая Госпоже Богородице, услыши молитву раб Своих, молящихся Тебе.

Приими моление наше, Пречистая Богородице, сохрани и заступи от всякаго зла и не отрини нас от Своего честнаго образа: Тя бо имамы молитвенницу теплу, и стену тверду, и покров нерушимый, и земли нашей великую похвалу и утверждение (дважды).

Слава: Радуемся душею и веселимся сердцем, взирающе на образ Твой, Пресвятая Богородице Боголюбивая, имуще Тя державу непобедимую и утверждение непоколебимое, надежду, и упование, и душам нашим спасение.

И ныне: Помощница еси в скорбех, и в напастех, и бедах и в темницах избавление, на брани и в ратех заступление, Богоотроковице Чистая, и избавление всем верным человеком, и похвала, и граду нашему великое утверждение.

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 9

Ирмос: Всяк земнородный да взыграется, Духом просвещаемь, да торжествует же безплотных умов естество, почитающее священное торжество Богоматере, и да вопиет: радуйся, всеблаженная, Богородице, Чистая Приснодево.

Пресвятая Госпоже Богородице, услыши молитву раб Своих, молящихся Тебе.

Се Тебе, Пресвятая Царице Боголюбивая, посылается с небесе Архангел Гавриил, Царя всех и Бога провозвестити пришествие и возгласити Тебе: радуйся, Благодатная, Господь с Тобою.

Пресвятая Госпоже Богородице, услыши молитву раб Своих, молящихся Тебе.

Радуйся, Мати Дево, радуйся, Пречистая, приятелище Божие, радуйся, свещниче Света, Адамово воззвание и Евино избавление, горо святая и преславная и священный чертоже.

Слава: Ты еси похвала христианом, Владычице, Ты оружие на враги и стена, к Тебе прибегаем, Тя и ныне на помощь призываем: Госпоже Царице Богородице, спаси и сохрани правоверныя люди Твоя, Боголюбивая.

И ныне: О Всемилостивая христианом помощнице! Не может Тя воспети достойно ум человеческий и ангельский, яко всея твари честнейшую, небесных и земных сил славнейшую, всех бо Творца родила еси и Бога. Но, о Владычице, приими милостивно наше моление, всегда бо на Тя надеемся.

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
популярные бренды одежды из Беларуси