Познаем мир вместе
новые СТАТЬИ сайта
популярные бренды одежды из Беларуси

Канон Богородице перед иконой Достойно есть

Канон Богородице перед иконой Достойно есть

 

Акафист Богородице перед иконой Достойно есть

Молитва Богородице перед иконой Достойно есть

 

День памяти иконы Божьей Матери Достойно есть: 11 (24 июня)

 

Тропарь, глас 4-й

Отцев все Афонское множество, соберитеся, верно празднующе, днесь, радующеся и светло восклицающе вси в веселии, Божия бо Мати ныне от Ангела преславно воспевается. Темже, яко Богородицу, присно Сию славим. (дважды).

 

Ин тропарь, глас тойже

Слава, и ныне: Притецем, вернии, со дерзновением к милующей Царице Богородице и умильно воззовем к Ней: низпосли на ны милости Твоя богатыя: Церковь нашу сохрани, люди во благоденствии соблюди, землю нашу избави от всякаго обстояния, мир даруй мирови и спасение душам нашим.

 

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Припев: Пресвятая Госпоже Богородице, услыши молитву раб Своих, молящихся Тебе.

Афон, иже наречеся Святая гора, Всенепорочная, Чистая, якоже прорекла еси, ныне светло празднует Тебе, Святей воистинну Горе сущей, и Божественное совершает днесь Тебе торжество.

Пресвятая Госпоже Богородице, услыши молитву раб Своих, молящихся Тебе.

Божественными присно Гавриил тайнам Твоим изрядным служит чудно, о Всенепорочная, темже и ныне, Дево, Твоея песни, радуяся, поет предначатие.

Слава: Не престаеши, Всенепорочная, совершати присно рабом Твоим преславная чудеса, Мати Чистая, и во вся времена изливати благодеяния, Пресвятая, яко благодетельница наша.

И ныне: Како изреку величайшее, совершенное тобою, Архангеле, близ скита Карейскаго чудо, егда научил ны еси твоим явлением песни достойней Богоматере?

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 3

Ирмос: Твоя песнословцы, Богородице, живый и независтный источниче, лик себе совокупльшия, духовно утверди, в Божественней Твоей славе, венцев славы сподоби.

Пресвятая Госпоже Богородице, услыши молитву раб Своих, молящихся Тебе.

Приспе время собратися всем отцем в храме Протатстем, всенощную совершити хвалу, тогда Божественную песнь Твою, Чистая, воспевает Архангел.

Пресвятая Госпоже Богородице, услыши молитву раб Своих, молящихся Тебе.

Прииде со иными и старец онаго послушника инока, и сему единому оставшуся Гавриил Архангел явися в подобнем образе, предначиная песнь Твою.

Слава: Приложение творяше к песни Твоей, яко предначатие, Чистая, тоя, юже прежде воспе Косма, Божественный Твой служитель, глаголя, яко тако обычай есть им начинати песнь Твою.

И ныне: О, чудес Твоих страшных, Архангеле Божественный Гаврииле! Како во иночестем образе песнь воспел еси Богоматери днесь и, яко подобаше, возвеличил еси?

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

Господи, помилуй (трижды). Слава, и ныне.

 

Седален, глас 4-й

Удивися инок Ангела песни, странно поющаго тую пред Твоею песнию, о Чистая, явльшуся сему во образе подобнем, а понеже инок написатися желаше оней, на дщице каменней рукою чудно начерта, и невидим бысть. Оттоле проповедася всем песнь сия, еже Богородицу Тя славити, Всенепорочная.

 

Песнь 4

Ирмос: Неизследный Божий совет, еже от Девы воплощения Тебе, Вышняго, пророк Аввакум, усмотряя, зовяше: слава силе Твоей, Господи.

Пресвятая Госпоже Богородице, услыши молитву раб Своих, молящихся Тебе.

Достойно, предначинаше, яко воистинну есть блажити Тя, Пречистая, Богородицу, присноблаженную и воистинну пренепорочную и Бога Матерь всенескверную.

Пресвятая Госпоже Богородице, услыши молитву раб Своих, молящихся Тебе.

Предначинательную сию песнь Божественному Гавриилу странно поющу, удивляшеся слушаяй инок, а понеже вопрошаше, тако пети, рече, обыкохом.

Слава: Глаголати и ему тако повелеваше Гавриил сие предначатие, таже пети песнь Космы Божественную и всех научити сему, Божественный рече Архангел.

И ныне: Занеже проси инок, Гаврииле Божественне, написати песнь, юже услыша, ты начертал еси абие на дске каменней, Архангеле. Слава неизреченней силе твоей.

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 5

Ирмос: Ужасошася всяческая о Божественней славе Твоей: Ты бо, неискусобрачная Дево, имела еси во утробе над всеми Бога и родила еси безлетнаго Сына, всем воспевающим Тя мир подавающая.

Пресвятая Госпоже Богородице, услыши молитву раб Своих, молящихся Тебе.

Ужасеся человек дивным чудесем, егда чудо узре, яко дска каменная начертася и внезапу собеседующий ему невидим бысть, Гавриил, славный и честный Архистратиг.

Пресвятая Госпоже Богородице, услыши молитву раб Своих, молящихся Тебе.

Старец, егда во утрие в келлию свою возвратися и егда странная сия услыша, дску же каменну узре, рукою начертанну, взем же абие с учеником сию, принесоша Горы начальствующим.

Слава: Знаемы и всем известны быша сия чудеса, Дево, понеже дску каменную абие в царствующий град торжественно отслаша Горы начальствующии, во еже славити Тя всем.

И ныне: Стекошася вси во убогое обиталище, в немже странное чудо содеяся, и Твоей иконе, пред неюже воспета бысть песнь, Всечистая, благоговейне покланяющеся, единогласно уставиша в Протате той хранитися.

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 6

Ирмос: Божественное сие и всечестное совершающе празднество, богомудрии, Богоматере, приидите, руками восплещим, от Нея рождшагося Бога славим.

Пресвятая Госпоже Богородице, услыши молитву раб Своих, молящихся Тебе.

С неизреченною вси стекошася радостию и веселием, еже взяти честную икону Твою, иереи, и монашествующии, и все Горы множество, Пречистая.

Пресвятая Госпоже Богородице, услыши молитву раб Своих, молящихся Тебе.

Божественную Твою икону сию со всяким благоговением держаще отцы вси, плещуще, с песньми и пеньми внесоша в Божественный храм Твой, Пречистая.

Слава: Дево! Стояние всенощное совершиша, любовию Тебе чтуще и Архангела, песнь Твою возвестивша, и ныне мы такожде вас вкупе почитаем.

И ныне: Отцы Божественнии, с песньми, по тайнодействии, вземше Божественную Твою икону, внутрь храма, в невходимая, со многим благоговением поставиша.

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

Гоподи, помилуй (трижды). Слава, и ныне.

 

Кондак, глас 4-й

Празднует днесь весь Афон, яко песнь прият от Ангела чудно Тебе, Чистей Богоматери, Юже вся тварь чтит, славящи.

 

Икос

Ныне да веселится множество отцев Афона: се бо Деве прежния песни, юже чудно воспе Ей Косма, Божественный песнопевец, Гавриил ныне поет предначатие, иже: Достойно есть яко воистинну, глаголаше иноку, блажити Тя, Богородицу, присноблаженную и пренепорочную и Матерь Бога нашего; сему повелеваше, да тако вси предначинают Твою песнь. И, сию начертав рукою на дске каменней, внезапу бысть невидим. Инок же, дивяся, воспеваше, якоже научися, Чистую Богоматерь, Юже вся тварь чтит, славящи.

 

Песнь 7

Ирмос: Не послужиша твари Богомудрии паче Создавшаго, но огненное прещение мужески поправше, радовахуся поюще: препетый отцев Господь и Бог, благословен еси.

Пресвятая Госпоже Богородице, услыши молитву раб Своих, молящихся Тебе.

Преизрядную честь воздаяху вси отцы, и прежнии и нынешнии, сей иконе Твоей Божественней, Пренепорочная, праведнейше: чести бо премногия удостоися преславно.

Пресвятая Госпоже Богородице, услыши молитву раб Своих, молящихся Тебе.

Велия благодати удостоися Божественная икона Твоя, Пренепорочная, ясно бо пред нею Твоея песни предначатие первее возгласися благоволением Твоим. Темже по долгу ныне сей с любовию покланяемся.

Слава: Не боготворим икону Твою, Пречистая, якоже на ны клевещут, но относительне чтим, Пренепорочная, сию, радующеся, лобызаем чествовательно, раби Твои, ныне же и во веки.

И ныне: С Тобою, Пресвятая, не престаем чтити и славнаго Гавриила, нас ныне песни Твоей научившаго, иже и прежде, Тебе возглашая, взываше: радуйся, Благодатная.

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 8

Ирмос: Отроки благочестивыя в пещи Рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Пресвятая Госпоже Богородице, услыши молитву раб Своих, молящихся Тебе.

Отроком благочестивым подражающе, Богородице, о чудесех Твоих, яже творит Господь во славу Твою, Пречистая, воспевающе, поем: Господа пойте, дела, и превозносите Его во вся веки.

Пресвятая Госпоже Богородице, услыши молитву раб Своих, молящихся Тебе.

Воистинну благословен, иже сподобися услышати Божественныя хвалы Твоя от Ангела, Пресвятая Дево Пренепорочная, якоже Сын Твой благоволи, имже всех научи пети Тя достойно и превозносити Тя во вся веки.

Слава: «Пение» по достоянию уставися именовати место оно, идеже совершися сие чудо, якоже нарицание удержася до нас и навсегда, на память, Пречистая, чудесе, яко да воспеваем Тя и превозносим во вся веки.

И ныне: «Достойно есть» даже до ныне нарицается ясно и келлия та, в нейже и Божественная Твоя икона, пред неюже первее воспето бысть песни Твоея, Дево Чистая, предначатие, яко да поют Тя вси достойно и превозносят Тя во вся веки.

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 9

Ирмос: Всяк земнородный да взыграется, Духом просвещаемь, да торжествует же безплотных умов естество, почитающее священное торжество Богоматере, и да вопиет: радуйся, всеблаженная Богородице, Чистая Приснодево.

Пресвятая Госпоже Богородице, услыши молитву раб Своих, молящихся Тебе.

Вси раби Твои, стекаемся во храм Твой Божественный и празднуем, светло совершающе ныне торжество, в летную днесь память чудесе Твоея песни восполнения, Богородице, Чистая Приснодево.

Пресвятая Госпоже Богородице, услыши молитву раб Своих, молящихся Тебе.

Достойно есть, не престаем радующеся глаголати, блажити Тя, присноблаженную же яко воистинну и пренепорочную и Матерь Бога нашего, от Ангела сим ныне научившеся, Богородице, Чистая Приснодево!

Слава: Вкупе славнаго и Божественнаго Архангела Гавриила днесь, радующеся, прославляем, благодарственная пения приносяще, дивным чудом всех научившаго Божественней песни Чистыя Богоматере, радуйся, таинниче неизреченных, взывающе.

И ныне: Радуйся, храм Протата преславный, хвалящийся сокровищем всечестныя, Божественныя и благодать точащия иконы единыя Богоматере и предстательницы Афона: гора бо сия избранный жребий Ея соделася.

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Молитва

Достойно славимая и праведно от всех горних чинов ублажаемая, яко без сравнения их превосходящая, Бога и Творца всяческих рождшая, паче всех возвеличенная, пречудная Владычице! Молися из Тебе воплощенному Христу Богу нашему, да призрит на ны, люди безответныя, да сохранит нас невредимых от всех навет вражиих и злых клевет, много бо может Твоя матерняя молитва, по реченному: проси, Мати Моя, не отвращуся, но вся прошения Твоя исполню. Сего ради, радостию о сем исполняемии, взываем Ти: спаси, Владычице, погибающия рабы Твоя, просвети омраченныя суемудрствованьми века сего и приведи ны ко сладчайшему Иисусу, да вечно радующеся, взываем: слава Отцу, слава Сыну, слава Святому Духу, слава и Тебе, преславней и пренепорочней Деве Богоматери, ублажаемей и благословляемей в безконечныя веки веков. Аминь. 

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
популярные бренды одежды из Беларуси