Познаем мир вместе
новые СТАТЬИ сайта
популярные бренды одежды из Беларуси

Канон Богородице перед иконой Геронтисса во Святую Пятидесятницу

Канон Богородице перед иконой Геронтисса в Пятидесятницу
 
День памяти иконы Божьей Матери во Святую Пятидесятницу: 4 (17) апреля

 

Тропарь, глас 4-й

Яко пресветлая звезда, просия Божественными чудесы святый образ Твой, Избавительнице, лучами благодати и милосердия Твоего озарив в нощи скорбей сущих. Подаждь убо и нам, Всеблагая Дево, избавление от бед, исцеление недугов душевных и телесных, спасение и велию милость.

 

Канон, глас 1-й

 

Песнь 1

Ирмос: Воскресения день, просветимся, людие, Пасха, Господня Пасха: от смерти бо к Жизни и от земли к Небеси Христос Бог нас преведе, победную поющия.

Припев: Пресвятая Богородице, спаси нас.

Воскресения день, славим ныне Господа Христа. Приидите, и Пресвятую Матерь Его прославим, пред святою иконою Ея благодарственная поюще.

Пресвятая Богородице, спаси нас.

Очистим чувствия и узрим Воскресшаго Христа и Всеблагую Деву, Избавительницу от бед, блистающуюся и озаряющую верныя благодатию.

Пресвятая Богородице, спаси нас.

Очистим чувствия и узрим мысленными очесы промышление о нас Владычицы: честным бо образом Своим избави от бед христоименитыя люди.

Пресвятая Богородице, спаси нас.

Небеси убо достойно да веселятся, земля же да радуется Воскресшему Христу, да торжествует же сия обитель, обогатившаяся Избавительницы иконою.

Слава: Небо и земля достойно да веселятся во Христовом востании, да празднуют же Богоматери монаси и бельцы, чудотворный Ея образ почитающе.

И ныне: Умерщвления предел сломила еси, Вечную Жизнь рождшая – Христа, из гроба возсиявшаго днесь, Дево Всенепорочная, и мир просветившаго.

 

Песнь 3

Ирмос: Приидите, пиво пием новое, не от камене неплодна чудодеемое, но нетления источник, из гроба одождивша Христа, в Немже утверждаемся.

Пресвятая Богородице, спаси нас.

Приидите, пиво пием новое от источника целительнаго недугом душевным и телесным, егоже источи Богоблагодатная с верою притекшим ко иконе Ея.

Пресвятая Богородице, спаси нас.

Приидите, весны умныя в видимой весне насладимся, неувядаемый бо Цвет – Христа – израстившая Дева благоуханием благодати живит и утешает скорбящия.

Пресвятая Богородице, спаси нас.

Ныне вся исполнишася света Воскресением Христовым, да празднуем и мы светло Избавительнице, лучи испускающей радости о Бозе Спасе в нощи искушений.

Пресвятая Богородице, спаси нас.

Ныне обитель сия озаряется светом от Матере Света в нарочитом дни празднества чудотворному Тоя образу и благодатию Сына Ея утверждается.

Слава: Вчера погребено бе селение верных в смертоносном отчаянии, днесь же оживотворися скорым от бед избавлением Богоневестныя Марии, надежды безнадежных.

И ныне: На нетленную жизнь прихожду днесь, благостию Рождшагося из Тебе, Чистая, и всем концем свет облиставшаго.

Господи, помилуй (трижды). Слава, и ныне:

 

Песнь 4

Ирмос: На Божественней стражи Богоглаголивый Аввакум да станет с нами и покажет светоносна Ангела, ясно глаголюща: днесь спасение миру, яко воскресе Христос, яко всесилен.

Пресвятая Богородице, спаси нас.

На Божественней стражи ставше во Христе, братие, и воспоминание творяще чудес Избавительницы, со благоговением рцем: днесь спасение Богородицею бысть скорбящим, яко вся могущею.

Пресвятая Богородице, спаси нас.

Яко непорочную Агницу, пречистаго Агнца рождшую, венчаем Тя, Благословенная, песненными цветы: покрый от зол рабы Твоя, Воскресшаго Сына Твоего о всех умилостивляющи.

Пресвятая Богородице, спаси нас.

Богоотец убо Давид пред сенным ковчегом скакаше, играя, раби же Твои, Госпоже, пред иконою Твоею ликующе, веселимся Божественне о Твоем милосердом заступлении к Тебе прибегающих.

Пресвятая Богородице, спаси нас.

Яко в краснейший храм, вселися в Тя, Чистая, Иисус, всех Царь, снитием же во ад жилище мрачное упраздни и Воскресением совоскреси человеки, оживляя Тобою умершия, яко всесилен.

Слава: Святых Святаго паче ума Мати явилася еси, Владычице, освящение и избавление от бед подающи верным, славящим Его Воскресение и Тебе, Всеблагую Избавительницу, призывающим.

И ныне: Создавый Адама, Твоего праотца, Чистая, зиждется от Тебе, и смертное жилище разори Своею смертию днесь, и озари вся Божественными блистаньми Воскресения.

 

Песнь 5

Ирмос: Утренюем утренюю глубоку, и вместо мира песнь принесем Владыце, и Христа узрим, Правды Солнце, всем жизнь возсияюща.

Пресвятая Богородице, спаси нас.

Утренююще во святем храме Твоем, Чистая, Сына Твоего воспеваем, из гроба возсиявшаго, и Тя, Избавительнице, величаем, от Солнца Правды умершему отроку жизнь возсияющу.

Пресвятая Богородице, спаси нас.

Утренюем утренюю глубоку и с пением деяния принесем Богоугодная, Деве вопиюще: храни, Всецарице, Гору, и Россию, и вся православныя необоримых от враг видимых и невидимых.

Пресвятая Богородице, спаси нас.

Безмерное Твое благоутробие, Владычице, узами вражиими содержимии зряще, ко иконе Твоей избавленнии идяху веселыми ногами, Твою и Сына Твоего хваляще Божественную силу.

Пресвятая Богородице, спаси нас.

Приступим, свещеноснии, исходящу Христу из гроба, яко Жениху, и спразднуим Богородице любопразднственными чинми, в честь святыя иконы Ея, прославленныя чудесы многими.

Слава: Облиста Тя и возвесели, Богорадованная, Спас всех, из гроба возсиявый, Правды Солнце, Егоже моли озарити и утешити сердца любовию песнословящих Тя, Избавительнице, пред Твоею иконою.

И ныне: Просвещается Божественными лучами и живоносными Воскресения Сына Твоего, Богомати Пречистая, и радости исполняется благочестивых собрание.

 

Песнь 6

Ирмос: Снизшел еси в преисподняя земли и сокрушил еси вереи вечныя, содержащия связанныя, Христе, и тридневен, яко от кита Иона воскресл еси от Гроба.

Пресвятая Богородице, спаси нас.

Снидохом во тьму греховную и праведное на ся негодование Божие привлекохом, – вопияху вернии, но, о Госпоже Всемилостивая, Ты избавила еси нас от рова отчаяния.

Пресвятая Богородице, спаси нас.

Сохранив целы труды рук наших и невредимы от всепоядающаго пружия, предстательством Твоим, Избавительнице, отверзла еси нам милосердия двери.

Пресвятая Богородице, спаси нас.

Спасе наш, живое же и нежертвенное от всех заколение, бедствующим даровал еси Матерь Твою Избавительницу от бед; молитвами убо Ея избави нас от всякия нужды и печали.

Пресвятая Богородице, спаси нас.

Явилася еси, Богоневесто, вышши Ангел, Бога воплощши, распеншагося за ны, и погребена, и мертвым нетление из гроба источивша, чтущих же Тя тли греховныя избавляюща.

Слава: Видевши Сына Твоего, из мертвых возставша, райския сладости исполнилася еси, Приснодево, Того убо моли, Благословенная, да отверзет молящимся Тебе райския двери.

И ныне: Возведеся древле держимое смертию и тлением Воплотившимся от Твоего пречистаго чрева к нетленней и присносущней жизни, Богородице Дево.

Господи, помилуй (трижды). Слава, и ныне:

 

Песнь 7

Ирмос: Отроки от пещи избавивый, быв Человек, страждет, яко смертен, и страстию смертное в нетления облачит благолепие, един благословен отцев Бог и препрославлен.

Пресвятая Богородице, спаси нас.

Отроки от пещи избавивый, презрев яко Милосерд, прегрешения наша, соблюди ны невредны от пещи искушений Пресвятыя Матере Твоея мольбами, отцев Боже Препрославленный.

Пресвятая Богородице, спаси нас.

Жены с миры Богомудрыя вслед течаху Христа, обитателие же веси, вместо мира слезы Деве приносяще, поклонишася, радующияся, Ея иконе и избавление от бед зде благовестиша.

Пресвятая Богородице, спаси нас.

Жены с миры вслед Христа течаху, да течем и мы усердно, добрый подвиг иночества совершающе и радующеся живому Богу, да сподобимся молитвами Богоматере Пасху тайную вкушати.

Пресвятая Богородице, спаси нас.

Смерти празднуем умерщвление Воскресением Христа и избавление от бед милосердием Владычицы, темже, пред иконою Ея ликующе, поем Виновнаго, Единаго Благословеннаго отцев Бога и Препрославленнаго.

Слава: Яко воистинну священный и радостный сей праздник Богородицы, провозвестник сущий чудес от честнаго Тоя образа, от негоже благодать исцелений явственно всем возсия.

И ныне: Умертвив Сын Твой смерть, Всенепорочная, днесь, всем смертным пребывающий живот во веки веков дарова, един Благословенный отцев Бог и Препрославленный.

 

Песнь 8

Ирмос: Сей нареченный и Святый День – един суббот царь и господь, праздников праздник и торжество есть торжеств, в оньже благословим Христа во веки.

Пресвятая Богородице, спаси нас.

Сей нареченный и Святый День, в оньже славим Всепетую Владычицу, яко избави от бед, притекших к Ея образу, и благословим Сию во веки.

Пресвятая Богородице, спаси нас.

Приидите, обители сея иночествующии, с любовию благодарение Деве принесем, Хранительнице Горы и Избавительнице нашей, поюще Ю яко Богоматерь во веки.

Пресвятая Богородице, спаси нас.

Возведи окрест очи Твои, Чистая, и виждь рабы Твоя, пред иконою Твоею молящияся Тебе, и прошения исполни о Тебе благословящия Христа во веки.

Пресвятая Богородице, спаси нас.

Всесильный Господь родися из Тебе, Марие, и Крестом Своим умерщвление аду содела, избавляя смертоносных бед к образу Твоему притекающих и поющих Его яко Бога во веки.

Слава: Отче Вседержителю, и Слове, и Душе, ходатаицу о нас Пресвятую Деву Тебе предлагаем: молитвами Тоя помилуй и спаси нас, в Тя крестившихся, да Тя благословим во вся веки.

И ныне: Прииде Тобою в мир Господь, Дево Богородице, и, чрево адово расторг, смертным нам Воскресение дарова, темже благословим Его во веки.

 

Песнь 9

Ирмос: Светися, светися, Новый Иерусалиме, слава бо Господня на Тебе возсия, ликуй ныне, и веселися, Сионе. Ты же, Чистая, красуйся, Богородице, о востании Рождества Твоего.

Пресвятая Богородице, спаси нас.

Светися, Русская обителе, веселися и красуйся, святая бо в тебе Избавительницы икона чудесы прославися многими, от бед свобождением и недугов исцелением.

Пресвятая Богородице, спаси нас.

Благоутробие Твое к верным и дары Твои суть паче постижения, Всеблагая Госпоже, сподобляй убо сих рабы Твоя, благодарственная Тебе поющия и радующияся о востании Рождества Твоего.

Пресвятая Богородице, спаси нас.

О, Божественного, о, любезнаго Твоего, Богомати, гласа! Яко повелела еси не скрывати чудотворную икону Свою, да притекающии к ней многих лютых избавляются милостию Твоею.

Пресвятая Богородице, спаси нас.

О, паче словесе Твоих чудес, Избавительнице! Ты бо осененна иконою Твоею отрока воскресила еси, Мати сущи Живота, Воскресением Своим всех оживотворившаго.

Слава: О Пресвятая Владычице, о Всемилостивая Избавительнице от бед, не престай милосердовати о бедствующих и сподобляти благодатнаго присещения обитель, образ Твой почитающую.

И ныне: Согласно, Дево, Тебе блажим, вернии: радуйся, двере Господня; радуйся, граде одушевленный; радуйся, Еяже ради нам ныне возсия свет из Тебе Рожденнаго из мертвых Воскресения. 

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
популярные бренды одежды из Беларуси