Познаем мир вместе
новые СТАТЬИ сайта
популярные бренды одежды из Беларуси

Канон Богородице перед иконой Себежская

Канон Богородице перед иконой Себежская

 

День памяти иконы Божьей Матери Себежская: 14 (27) марта

 

Тропарь, глас 8-й

Взыдем, православнии народи града Опочки, на тучную гору, яко на Фаворскую, в дом Спасителя своего, в честь Боголепнаго Преображения Его, обилующу чудес и стократный клас израстившую, и узрим славу чудесе от чудотворнаго образа Пресвятыя Богоматере Умиления Себежския: яко море пролияся и Евфрат, текий из рая, тако слезы Ея быша, из обою оку пролитыя, о нашедшем гневе Создателя своего за наше согрешение, припадем, каменносердечнии, и возрыдаем, просяще: о Владычице, умоли Сына Своего и Господа нашего сими пресвятыми Своими слезами, да избавит нас от всякаго злаго обстояния, и огненнаго запаления, и междоусобныя брани, от мора и глада, и нашествия иноплеменных в грядущия времена, и, радующеся, со Гавриилом благовестником возопием Ти: радуйся, Обрадованная, Господь с Тобою.

 

Канон, глас 6-й

 

Песнь 1

Ирмос: Волною морскою Скрывшаго древле гонителя мучителя – под землею скрыша спасенных отроцы; но мы, яко отроковицы, Господеви поим, славно бо прославися.

Припев: Пресвятая Богородице, спаси нас.

Приидите верных благочестивая множества, духовно лик совокупльше, Пречистую Матерь Слова Божественными песньми воспоим, зряще Теплую Заступницу, от Пречистаго образа Ея преужасное знамение показующую.

Пресвятая Богородице, спаси нас.

Якоже лествицу высокую, зрим Тя, Дево Всенепорочная, еюже к Небесней высоте восходим, и, Тя Предстательницу и утверждение непобедимое стяжавше, Пречистая, навет и сетей вражиих избавляемся, да явимся и спасемся, верою к Тебе притекающии.

Слава: В Рождестве Сына Твоего тли не приемши, от тления всех нас избави и печали, просвещающи матерним Своим дерзновением, Богорадованная.

И ныне: Надежду имуще Тя, Богородительнице, и несумненну веру, града сего народи Тебе, яко забрало, граду положше, Дево Неискусобрачная.

 

Песнь 3

Ирмос: Тобою, Христе, Небеса утверждаема вся, Слово Божие и Сила, исповедуют славу неизреченну и вседетельныя руки Твоея сотворения, несть бо пресвят, разве Тебе, Господи.

Пресвятая Богородице, спаси нас.

Умилосердися на стадо Свое, Пречистая, и смирение граду Твоему даруй, сопротивных челюсти сокруши и тех до конца немощны покажи.

Пресвятая Богородице, спаси нас.

Общаго Пастыря и Владыку порождши Христа, Дево Неискусобрачная, Тому помолися, настоящаго гнева избавитися нам, истиннаго обстояния, Владычице.

Слава: Милостива еси, Владычице, Милостиваго рождши Спаса, виждь озлобление и воздыхание людей Своих, ускори, Пречистая, ущедрити ны.

И ныне: Поют Тя, Богородице, Ангельстии Чини и празднуют патриархи со святители, с ними же тогда и Боголюбивии народи текуще во Святую Твою Церковь, видеша Тя, Царице, за ны, грешныя, молящуюся к Сыну Своему, помиловати град Твой и люди, в нем живущия от Твоего образа предивным знамением.

Господи, помилуй (трижды) Слава, и ныне:

 

Седален, глас 8-й

Юже древле лик пророческий проповеда – Дверь Небесную и Неопалимую Купину,   Свещник   Многосветлый,    Златую Кадильницу, Ручку и Жезл, преславно днесь и дивно знамение показа, темже благодарственное пение возсылаем Ти, раби Твои, Богородице, моли Христа Бога нашим согрешением оставление даровати, Тебе бо надежду имамы, раби Твои.

 

Песнь 4

Ирмос: Удивися Твой разум от мене, услышавшу преславная веления смотрения Твоего, укрепися же возлюблением Твоего схождения, Ты бо моея нищеты не отверглся еси.

Пресвятая Богородице, спаси нас.

Почитающия Тя граждане, Пречистая, и по долгу славящия ограждай от безбожных, Чистая, иноплеменник Ты бо тем еси, Пречистая, богатство неотъемлемо, покров же и держава.

Пресвятая Богородице, спаси нас.

Не может язык и слово человеческое похвалити Тя достойно, от Тебе бо без семене Жизнодавец Бог воплотитися, Пречистая, благоизволи.

Слава: Призри, Пречистая, спастися рабом Твоим, поющим Тя, и избави от сопротивных и нашедшаго гнева, Богородительнице.

И ныне: Богатный дар и неотъемлемо сокровище даровала еси граду Твоему, образ Твой, Пречистая и Мати Слова, и сего помощию противных низлагаем.

 

Песнь 5

Ирмос: Союзом любве связуеми, апостоли, владычествующему всеми себе Христу возложше, красны ноги очищаху, благовествующе всем мир.

Пресвятая Богородице, спаси нас.

Теплая Заступнице к Тебе притекающим и ненадеющимся надеждо, виждь озлобление людей Твоих и подаждь Свою помощь, Пречистая.

Пресвятая Богородице, спаси нас.

Иже Огнь рождши Божественный, Дево, противных, Пречистая, молитвою Твоею – огнем – попали, яко сущи Зиждителя умоляющи, Всепетая.

Слава: Великий преднаписует во пророцех Моисей Тя Ковчег, и Трапезу, и Свещник, и Ручку, образне являя воплощение еже от Тебе Вышняго, Мати Дево.

И ныне: Ты богатство неистощимое исцелением источник еси верою притекающим к храму Твоему, идеже пребывает образ Твой, Владычице.

 

Песнь 6

Ирмос: Ят бысть, но не удержан в персех китовых Иона: Твой бо образ нося, Страдавшаго и погребению давшагося, яко от чертога, от зверя изыде. Приглашаше же кустодии: хранящии суетная и ложная, милость сию оставили есте.

Пресвятая Богородице, спаси нас.

Избави языческаго нашествия град Твой, Препетая, и не предаждь до конца погибнути наследию Твоему, Пречистая, но силою Рождшагося из Тебе, Владычице, противных низложи (дважды).

Слава: Многосогрешивших к Тебе, Господи, не презри, но приими мольбу Матере Твоея о нас, Щедре, да не хвалятся сопротивнии, – где есть Бог их? – глаголюще, но да разумеют вси, яко Ты, Избавителю, с нами еси.

И ныне: Честную икону Твою радостно сердцем и душею облобызаем, веселящеся и теплою верою прикасающеся, исцеление почерпаем неоскудно.

Господи, помилуй (трижды). Слава, и ныне:

 

Кондак, глас 4-й

Притецем, людие, богатии и убозии, сирии и вдовицы, старии и юнии, в тихое пристанище, под покров цельбоноснаго источника Богоматере. Слезы бо, яко реки, источает из обою оку чудотворнаго образа Себежския о находящем гневе за наша злая согрешения и укрепляет град, егоже возлюбила еси, на сопротивныя, утверждает веру православных христиан и избавляет от всякаго зла молитвами Своими.

 

Икос

Разреши тьму моих согрешений, юже во уме моем лежащую, и Твоим мя светом просвети, Дево, яко да возмогу Тебе похвалу принести, Юже Отец восхвали и Дух Святый осени, Сын же и Слово Божие в Нюже вселися нетленно, от Пречистую Твоею боку произыде и с человеки поживе, темже мы, грешнии и недостойнии раби Твои, днесь совершающе священное торжество – знамение, бывшее от честныя иконы Твоея, в немже предивное чудо показала еси, и, Твоему чудеси удивльшеся и Твоих богатых даров исполньшеся, вместо благовонных аромат, елико возможно нам, земным, похвальная пения приносим Ти, глаголюще: радуйся, радосте Ангелом и человеком; радуйся, покрове, и утверждение, и надеждо граду Твоему; радуйся, противных силою Твоею низлагающая; радуйся, Разумнаго Солнца Мати, верных просвещающая, неверных же помрачающая. Радуйся, христианом похвало.

 

Песнь 7

Ирмос: Неизреченное чудо: в пещи Избавивый преподобныя отроки из пламене во Гробе мертв, бездыханен полагается, во спасение нас, поющих: Избавителю Боже, благословен еси.

Пресвятая Богородице, спаси нас.

Воистинну сокровище честно граду Твоему, икона Твоя, даровася, Пречистая, юже сами зряще, о чудеси удивляемся, Сыну Твоему вопиюще: благословен Бог отец наших.

Пресвятая Богородице, спаси нас.

Во храм Боголепнаго Преображения, Владычице, притекающе, людие, руце простирающе, на молитву движем Тя: виждь озлобление наше и подаждь Твою помощь, Богородице.

Слава: Светоносная благодать, исцеление граду Твоему дадеся, образ Твой, Пречистая, егоже любезно облобызающе, веселящеся, вопием: благословен Бог отец наших.

И ныне: Свеща Божественнаго сияния и Незаходимаго Света явися, свещник, светосияющ и мир весь озаряющ зарею чистаго девства, Тя поющия спасаеши, Благословенная, Яже Бога плотию рождшая.

 

Песнь 8

Ирмос: Ужаснися, бояйся, Небо, и да подвижатся основания земли: се бо в мертвецех вменяется в Вышних Живый и во Гроб мал странноприемлется. Егоже, отроцы, благословите, священницы, воспойте, людие, превозносите во вся веки.

Пресвятая Богородице, спаси нас.

Собезначальное Слово Отцу Дева породи Пречистая нетленно, Того моли, Богородительнице, от сопротивных напастей спастися граду Твоему и в нем людем, поющим: Господа воспевайте, дела, и превозносите Его во веки.

Пресвятая Богородице, спаси нас.

Едина сущи Благая, Преблагаго Слова умоли прилежно настоящаго гнева граду Твоему избавитися, да несумненною верою Сыну Твоему зовем, поюще: дети, благословите, священницы, воспойте, людие, превозносите Его во веки.

Слава: Сопротивных разжжения и пламенновидныя стрелы, испущаемии на нас, угаси, Владычице, яко да Тя поем и превозносим, Чистая, во веки.

И ныне: Яко нетленное зерцало, имея во граде Твою чудотворную икону, Пречистая, сопротивляющихся низлагаем и Сыну Твоему вопием: благословите, вся дела Господня, Господа, пойте и превозносите Его во веки.

 

Песнь 9

Ирмос: Странствия Владычня и Безсмертныя Трапезы на Горнем месте высокими умы, вернии, приидите, насладимся, возшедша Слова, от Слова научившеся, Егоже величаем.

Пресвятая Богородице, спаси нас.

Оком милосердным свыше призри на град и в нем люди Твоя, Пречистая, иныя бо помощи не имамы, токмо Тя, Всенепорочную, темже вси яко Матерь Божию величаем.

Пресвятая Богородице, спаси нас.

Раби Твои, вопием Ти, Пречистая Мати Божия: обычныя милости Твоя на град и люди милостивно покажи и сопротивных обстояний нас изми, да Тя непрестанно величаем.

Слава: Мысли очистивше и ум, празднолюбнаго града Опочки соборы со священным чином и всех верных благочестивое множество, восхвалите Матерь Слова, яко от Тоя образа бысть предивное знамение, емуже со страхом кланяющеся, Тя величаем.

И ныне: Якоже Божественною светлостию озаряему зрим днесь, Пречистая, икону Твою честную ейже кланяющеся, Тя величаем.

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
популярные бренды одежды из Беларуси