Познаем мир вместе
новые СТАТЬИ сайта

Канон царственным мученикам и страстотерпцам

 Память празднуем 4 (17) июля

 

Тропарь, глас 4-й

Днесь, благовернии людие, светло почтим седмерицу честную царственных страстотерпец, Христову едину домашнюю церковь: Николая и Александру, Алексия, Ольгу, Татиану, Марию и Анастасию. Тии бо, уз и страданий многоразличных не убоявшеся, от богоборных смерть и поругание телес прияша и дерзновение ко Господу в молитве улучиша. Сего ради к ним с любовию возопиим: о святии страстотерпцы, гласу покаяния и стенанию народа нашего вонмите, землю Российскую в любве к Православию утвердите, от междоусобныя брани сохраните, мир мирови у Бога испросите и душам нашим велию милость.

 

Канон, глас 6-й

 

Песнь 1

Ирмос: Волною морскою Скрывшаго древле гонителя мучителя – под землею скрыша спасенных отроцы; но мы, яко отроковицы, Господеви поим, славно бо прославися.

Припев: Святии царственнии мученицы и страстотерпцы, молите Бога о нас.

Венценосче Николае, вкупе с мученическими лики, царицею, чады и слуги, предстояще у Престола Христова, просвещение нам даруйте, озаряющее душ наших омрачение и нечувствие, яко да восхвалим радостно вашу блаженную память.

Святии царственнии мученицы и страстотерпцы, молите Бога о нас.

Ныне проречение Саровскаго старца, яко прославльшаго мя прославит Бог, исполнися, прослави бо Церковь Русская царственнаго страстотерпца. Темже вкупе с преподобным молится, во еже стяжати нам благодать Святаго Духа.

Слава: Сердце царево в руце Божией, глаголет Господь. Ты же, истинный помазанниче и слуго Господень, благоговейне рекл еси: не токмо жизнь мою, но и пути страны Российския в руце Господней суть.

И ныне: Ты еси крепость наша, Ты еси похвала и радование, Предстательница Непобедимая и Покров державный страны Российския, Пресвятая Богородице, с царственными страстотерпцы и новомученики моли спасти рабы Твоя.

 

Песнь 3

Ирмос: Тебе, на водах повесившаго всю землю неодержимо, тварь, видевши на лобнем висима, ужасом многим содрогашеся, несть свят, разве Тебе, Господи, взывающи.

Святии царственнии мученицы и страстотерпцы, молите Бога о нас.

Поругание и разорение земли своея от безбожных видя, благочестивый царю, плакася из глубины сердечныя, яко пророк Иеремия, горце стеняше и моляся за люди согрешившия: Милостиве Господи, не остави их, оставльших мя.

Святии царственнии мученицы и страстотерпцы, молите Бога о нас.

На земли алкал и жаждал еси правды Божией, за нюже душу положил еси, праведне Николае, обаче в Горнем Царствии насьггился еси, идеже пребываеши во веки.

Слава: Врачевания и чудеси точите, святии страстотерпцы, людем, верою к вам притекающим, темже печаль нашу на радость преложите молитвами вашими.

И ныне: Прибежище, Вышший Покров Тя имамы, Благословенная Мати Божия, Твоею помощию сохрани и заступи нас, Всепетая.

Господи, помилуй (трижды).

 

Седален, глас 4-й

Егда мнози от сродник наших отступиша от Бога, отвратишася Божиих заповедей и восташа на Господа и помазанника Его, тогда гнев Божий на землю Русскую прииде, иссяче любы многих, пролияся кровь братий наших, расточишася люди российстии по всему лицу земли, храмы наша поруганию предашася, глади, нашествия иноплеменник постигоша ны, и быхом в посмеяние языков. Мы же, разумеюще сие, с сокрушением сердца в покаянии зовем: прости и помилуй нас, Господи, по велицей милости Твоей, очисти беззакония наша и подаждь страждущей стране Российстей предстательством царственных страстотерпец прощение грехов, мир и велию милость.

Слава, и ныне: Умоли, Милосердая Мати Света, Сына Твоего и Бога нашего о еже возставити державу нашу Православную, сохранити ю в мире и благоденствии, избавити ны от междоусобныя брани, укрепити Святую Церковь и оградити ю от неверия, раскола и ересей.

 

Песнь 4

Ирмос: На Кресте Твое Божественное истощание провидя, Аввакум, ужасся, вопияше: Ты сильных пресекл еси державу, Блаже, приобщаяся сущим во аде, яко Всесилен.

Святии царственнии мученицы и страстотерпцы, молите Бога о нас.

Нищетою духовною обогатился еси, святе Николае, и сотвори тя Господь достойна не токмо земнаго, но и Небеснаго Царствия.

Святии царственнии мученицы и страстотерпцы, молите Бога о нас.

Скорбию обдержимь бысть, венценосче Николае, зря ослепление народа твоего, отрекшагося от Царя Небеснаго, такожде же и земнаго.

Слава: Мужественне возложив упование на Бога в многострадальном земном служении твоем, якоже Иов иногда сторицею воздаяние приял еси на Небесех, идеже ныне наслаждаешися, царственный мучениче.

И ныне: Милосердия двери, Благословенная Богородице, отверзи нам, да избавимся от бед и озлобления нашего, во еже пети Тебе непрестанно: Ты еси спасение рода христианскаго.

 

Песнь 5

Ирмос: Богоявления Твоего, Христе, к нам милостивно бывшаго, Исаия, Свет видев Невечерний, из нощи утреневав, взываше: воскреснут мертвии, и востанут сущии во гробех, и вси земнороднии возрадуются.

Святии царственнии мученицы и страстотерпцы, молите Бога о нас.

Миротворец явился еси, царю Николае святый, неся мир миру, спасая и защищая тысящи во отечестве твоем и в иных странах, сего ради сыном Божиим, по слову Господню, нареклся еси.

Святии царственнии мученицы и страстотерпцы, молите Бога о нас.

Изгнание, поношение, гонение и всяк глагол ложный, на вы реченный, претерпесте, святии царственнии мученицы. Радуйтеся убо и веселитеся, яко мзду вашу на Небеси приясте.

Слава: Служителие беззакония тайнаго, венец терновный сплетше, возложиша на тя, царственная главо, обаче дерзостная дела их погибоша яве.

И ныне: В тину грехов впали есмы и люте потопи ны буря прегрешений. Но, яко рождшая Спаса, Владычице, призри на ны, рабы Твоя, и избави от страстей душетленных.

 

Песнь 6

Ирмос: Ят бысть, но не удержан в персех китовых Иона: Твой бо образ нося, Страдавшаго и погребению давшагося, яко от чертога, от зверя изыде. Приглашаше же кустодии: хранящии суетная и ложная, милость сию оставили есте.

Святии царственнии мученицы и страстотерпцы, молите Бога о нас.

Всем православным заступник был еси, Богоизбранный Николае, народом Словенским защиту благую являяй и, яко брат брату, помогаяй.

Святии царственнии мученицы и страстотерпцы, молите Бога о нас.

О сыне верный Святыя Церкве! Ты ревнитель прославления святых явился еси, храмов созидатель, святых обителей благоукраситель, Святыя Земли и Горы Афонския благотворитель, просвещения православнаго попечитель и монашества покровитель.

Слава: В житии вашем и в делех любве образ христианом бысте, Боговенчаннии царие Николае и Александре, полагаете бо во главу угла Камень – Христа, Бога нашего.

И ныне: К Тебе прибегаем, Царице Державней, верных Покрове, на Тя надежду возлагаем спасения нашего, Пресвятая Владычице Богородице, не презри нас.

Господи, помилуй (трижды). Слава, и ныне:

 

Кондак, глас 8-й

Избраннии Царем царствующих и Господем Господствующих от рода царей Российских, благовернии мученицы, муки душевныя и смерть телесную за Христа приимшии, и венцы небесными увенчавшиися, к вам, яко покровителем нашим милостивым, с любовию благодарне вопием: радуйтеся, царственнии страстотерпцы, за Русь Святую пред Богом усерднии молитвенницы.

 

Икос

Славою и богатством благочестия сияющии, багряницею многоценною и венцем украшеннии, милостию и правдою в житии просиявшии, веру, надежду и любовь к Богу до конца явили есте. К вам, яко покровителем нашим милостивым, с любовию благодарне вопием: радуйтеся, царственнии страстотерпцы, за Русь Святую пред Богом усерднии молитвенницы.

 

Песнь 7

Ирмос: Неизреченное чудо: в пещи Избавивый преподобныя отроки из пламене во Гробе мертв, бездыханен полагается во спасение нас, поющих: Избавителю Боже, благословен еси.

Святии царственнии мученицы и страстотерпцы, молите Бога о нас.

Яко присных ваших, недужных воинов чадолюбно посещасте, царственнии мученицы, и с любовию их утешасте, места же их упокоения слезами вашими орошасте.

Святии царственнии мученицы и страстотерпцы, молите Бога о нас.

Вы есте образ супружества добродетельнаго и детей воспитания благочестиваго, святии царие Николае и Александре. Дом ваш, яко цветник духовный, соделавше, на Небесех ныне вкупе со чады ликуете.

Слава: На высоте славы человеческия пребывая, о Небесных присно помышлял еси, царю Николае, аможе устремися душа твоя святая.

И ныне: Всесвятая Владычице, оживи ум наш, умерщвленный страстьми многими, и укрепи ны богоугодная творити, да величаем Тя, яко Заступницу рода христианскаго.

 

Песнь 8

Ирмос: Ужаснися, бояйся Небо, и да подвижатся основания земли: се бо в мертвецех вменяется в Вышних Живый и во Гроб мал странно приемлется. Егоже, отроцы, благословите, священницы, воспойте, людие, превозносите во вся веки.

Святии царственнии мученицы и страстотерпцы, молите Бога о нас.

Егда угодницы Божии предрекоша вам путь мученический, якоже Павлу пророк Агав, вы, царственнии страстотерпцы, не уклонистеся ни одесную, ни ошуюю, но мужественне проидосте его, взирающе на Совершителя веры Иисуса Христа.

Святии царственнии мученицы и страстотерпцы, молите Бога о нас.

Во страданиих ваших, страстотерпцы святии, не отвергостеся Пути, Истины и Живота, Христа Бога нашего, не устрашистеся богоборцев, но в терпении шествовасте царским путем в жизнь вечную.

Слава: Увы нам, отеческия заветы поправшим, от обета верности царскому роду, Церковию Святою благословенному, отступльшим, и тако от пути Божия отлучившимся. Прости нас, Господи, за вся сия содеянная и помилуй молитвами святых страстотерпец.

И ныне: Заступницу нашу Тя вемы, Богородице, непрестанно бо о нас молишися, во еже покаятися и исправитися нам, Упование и Прибежище душ наших.

 

Песнь 9

Ирмос: Не рыдай Мене, Мати, зрящи во гробе, Егоже во чреве без семене зачала, еси Сына: востану бо, и прославлюся, и вознесу со славою непрестанно, яко Бог, верою и любовию Тя величающия.

Святии царственнии мученицы и страстотерпцы, молите Бога о нас.

Да воскреснет Русь Святая молитвами царственных страстотерпец и новомученик Твоих, Господи, и да расточатся вси врази ея вскоре, и от лица ея да бежат вси ненавидящии ю отныне и до века.

Святии царственнии мученицы и страстотерпцы, молите Бога о нас.

Все упование на Господа возложи державный царь наш. Такожде и мы со упованием Господу помолимся, да укрепит Он молитвами Богородицы и царственнаго страстотерпца страну нашу в Православии и спасет души наша.

Слава: Яко достойное пение приимите, святии страстотерпцы, малое моление сие, и, якоже Христос прият вдовицы две лепте, не возгнушайтеся нас, окаянных, страстьми обуреваемых, убогих чтителей и служителей ваших.

И ныне: Державным Твоим покровом, Чистая, рабы Твоя сохрани вся невредимы: Тя бо едину имамы Прибежище в нуждах, Утешение в скорбех и Победу во бранех наших. 

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта