Познаем мир вместе
новые СТАТЬИ сайта

Канон святителям Московским

Икона святителей Московских

 

 Молитва Московским святым

 

Память празднуем 5 (18) октября
 

Тропарь, глас 4-й

Первопрестольницы Российстии, истиннии хранителие апостольских преданий, столпи непоколебимии, Православия наставницы, Петре, Алексие, Ионо, Филиппе и Ермогене, Владыку всех молите мир вселенней даровати и душам нашим велию милость.

 

 

 

Канон, глас 8-й

 

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Припев: Святителие Московские Петре, Алексие, Ионо, Филиппе и Ермогене, молите Бога о нас.

Многими содержими напастьми, к вам прибегаем спасение получити, о велиции святителие, Петре, Алексие, Ионо, Филиппе и Ермогене! От лютыя нужды и бед спасите нас.

Святителие Московские Петре, Алексие, Ионо, Филиппе и Ермогене, молите Бога о нас.

Страстей прилози и многия печали и беды погубляют мою душу; умирите, святии святителие, к Богу вашими молитвами, и от печали на веселие преложите.

Слава: Спаса Христа молите, велицыи чудотворцы и избраннии, Петре, Алексие, Ионо, Филиппе и Ермогене, избавитися нам от бед и скорбей и варварскаго нахождения вашими молитвами.

И ныне: В скорби ны и болезни суща, посещения Божественнаго и промышления еже от Тебе сподоби, о Богомати, Владычице.

 

Песнь 3

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.

Святителие Московские Петре, Алексие, Ионо, Филиппе и Ермогене, молите Бога о нас.

Заступницы и покровителие граду Москве вы есте по Бозе, Божии угодницы, направите нас на пристанище спасения: вы бо есте верным ограждение.

Святителие Московские Петре, Алексие, Ионо, Филиппе и Ермогене, молите Бога о нас.

Молим вас, святии чудотворцы, Петре, Алексие, Ионо, Филиппе и Ермогене, душевное смущение и печали бурю разорити нам и тишину подати к Богу вашими молитвами.

Слава: Благороднейшии и благим подражателие бывше, от Бога чудесы обогатившеся, всем помогайте, молящеся Богу, вас прославляющему, Своя угодники.

И ныне: Лютыми недуги и болезненными тяжкими варварскими находы истязаемым, Дево Богородице, Ты нам помози и печаль на радость преложи.

Господи, помилуй (трижды).

 

Седален, глас 4-й

Прострите ваша длани, святии отцы, ко всех Владыце, имиже добре потрудистеся, и Богу угодисте, и требующим неоскудно подасте, и устне ваша на молитву отверзите, имиже Бога славословисте, и люди на Богоразумие настависте, ускорите убо на помощь нашу, и от находящих на нас бед и зол и всякия нужды избавите нас вашими молитвами к Богу.

Слава, и ныне: Дево Всенепорочная, Яже Пресущнаго Бога рождшая, со святители Того непрестанно моли, оставление прегрешений и исправление жития дати нам прежде конца, верою и любовию поющим Тя по долгу, Едина Всепетая.

 

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Святителие Московские Петре, Алексие, Ионо, Филиппе и Ермогене, молите Бога о нас.

Страстей моих смущение и многих бед нахождения бурю утишити молитеся, святии отцы, к Богу вашими молитвами.

Святителие Московские Петре, Алексие, Ионо, Филиппе и Ермогене, молите Бога о нас.

Милосердия бездну прострите нам, святии отцы, призывающим вас на помощь, яко Милосердаго Бога имате, послушающа ваших молитв.

Слава: Надежду имуще вас, святии отцы, Петре, Алексие, Ионо, Филиппе и Ермогене, и яко стену недвижиму к Богу ваша молитвы, зол и всех бед избавляемся.

И ныне: Исцели, Чистая, душевныя наша немощи и страсти телесныя, поспеши, Госпоже, здравие подати молитвами Твоими.

 

Песнь 5

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Святителие Московские Петре, Алексие, Ионо, Филиппе и Ермогене, молите Бога о нас.

Исполните, святии отцы, веселия живот наш, избавляюще нас варварскаго нахождения и междоусобныя брани.

Святителие Московские Петре, Алексие, Ионо, Филиппе и Ермогене, молите Бога о нас.

Избавите нас от бед, святии чудотворцы, яко предстателие теплии и молитвенницы о душах наших.

Слава: Разрушите мглу прегрешений моих и безместных деяний вашими к Богу молитвами.

И ныне: Яко стену нерушиму и пристанище стяжахом, и душам Тя совершенное спасение, и пространство в скорбех, о Владычице, ныне нас от страстей и бед спаси.

 

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Святителие Московские Петре, Алексие, Ионо, Филиппе и Ермогене, молите Бога о нас.

Смерти и тли, и варварскаго пленения избавите, и огненнаго запаления свой град сохраните к Богу вашими молитвами.

Святителие Московские Петре, Алексие, Ионо, Филиппе и Ермогене, молите Бога о нас.

Заступники вас вемы и твердыя хранители граду нашему, святителие Господни, тем к вам прибегающе, милость приемлем и бед избавляемся.

Слава: Яко стену и пристанище стяжахом вас, святии чудотворцы, пространство в скорбех подтверждение и спасение душам нашим.

И ныне: Заступницу Тя живота вем и Хранительницу тверду, Дево, напастей решащу молвы и налоги бесов отгоняющу, и молюся всегда страстей мя избавите, Всенепорочная.

Господи, помилуй (трижды). Слава, и ныне:

 

Кондак, глас 3-й

Во святителех благочестно пожисте и люди к Богоразумию настависте, и добре Богу угодисте, сего ради от Него нетлением и чудесы прославистеся, яко ученицы Божия благодати.

 

Икос

Первозваннаго наместницы и Российстии первопрестольницы, велиции светильницы, Петре, Алексие, Ионо, Филиппе и Ермогене, Троице поборницы, Православию наставницы, в мире благочестно пожисте и учением своим вселенную просветисте, сего ради Царствию Небесному наследницы бысте, нетлением и чудесы прославистеся, яко ученицы Божия благодати.

 

Песнь 7

Ирмос: От Иудеи дошедше, отроцы, в Вавилоне иногда верою Тройческою пламень пещный попраша, поюще: отцев Боже, благословен еси.

Святителие Московские Петре, Алексие, Ионо, Филиппе и Ермогене, молите Бога о нас.

Наше спасение, якоже восхотел еси, Спасе, устроити, прославляеши Твоя угодники чудесы, вопиющия Ти: отец наших Боже, благословен еси.

Святителие Московские Петре, Алексие, Ионо, Филиппе и Ермогене, молите Бога о нас.

Волителя милости, Егоже роди Мати, молите, святии Христовы святителие, Петре, Алексие, Ионо, Филиппе и Ермогене, избавити нас от прегрешений, и бед, и зол, зовущих: отец наших Боже, благословен еси.

Слава: Сокровище спасения и источник исцеления, наставницы покаяния вы есте, Божии угодницы, вопиющим: отец наших Боже, благословен еси.

И ныне: Сокровище спасения, и источник нетления, Тебе рождшую и столп утверждения, и дверь покаяния вопиющим показа: отец наших Боже, благословен еси.

 

Песнь 8

Ирмос: Царя Небеснаго, Егоже поют вои Ангельстии, хвалите и превозносите во вся веки.

Святителие Московские Петре, Алексие, Ионо, Филиппе и Ермогене, молите Бога о нас.

Помощи вашея требующия не презрите, святии отцы и наставницы Православия, поющия и превозносящия Христа во веки.

Святителие Московские Петре, Алексие, Ионо, Филиппе и Ермогене, молите Бога о нас.

Неможение душ наших исцеляете и от телесных болезней возставляете вопиющих и превозносящих Христа во веки.

Слава: Исцелений богатство источаете к вам притекающим, Божиим угодником, и верно поющим, и превозносящим Христа во веки.

И ныне: Напастныя Ты прилоги отгоняеши и страстныя находы, Дево, яко да Тя поем и превозносим Чистую во веки.

 

Песнь 9

Ирмос: Воистинну Богородицу, Тя исповедуем, спасеннии Тобою, Дево Чистая, с Безплотными лики Тя величающе.

Святителие Московские Петре, Алексие, Ионо, Филиппе и Ермогене, молите Бога о нас.

Точения слез не презрите, молим вас, святии отцы, Петре, Алексие, Ионо, Филиппе и Ермогене, и всем утешение подати, блажащим вас.

Святителие Московские Петре, Алексие, Ионо, Филиппе и Ермогене, молите Бога о нас.

Радости сердца наша исполните вашими к Богу молитвами, святии отцы и заступницы теплии.

Слава: Светильницы пресветлии, Троицы поборницы, Петре, Алексие, Ионо, Филиппе и Ермогене, труды и подвиги вашими мрак неведения отгоняшеся, благоверно вас ублажающих.

И ныне: Света Твоего зарями просвети, Дево, мрак неведения отгоняющи и лютых бед спасающи, иже благоверно Богородицу Тя исповедающих.

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта