Молитва святителю Афанасию пателарию, патриарху Цареградскому
Акафист святителю Афанасию Константинопольскому
Премудростию учений твоих царствующий град просветив, тьму неведения еретическаго разгнал еси, преблаженне; твое благословение земли Российстей принесл еси, отче наш, святителю Афанасие, идеже скончав течение твое, на крилех чистоты возлетел еси в Небесное Царство. Моли Христа Бога непрестанно о душах наших.
Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.
Припев: Святителю отче наш Афанасие, моли Бога о нас.
Безсмертию быв тезоименит, в вере твердей житие твое прошед, блаженнаго безсмертия причастник явился еси, отче святителю Афанасие, ныне Христови предстоя, поминай нас, почитающих тя.
Святителю отче наш Афанасие, моли Бога о нас.
Песнь хвалебную приносим ти, святителю, в прославление памяти твоея, аще и не довлеет ум наш по достоянию благохвалити тя, но ты сам помози нам почивающею на тебе неоскудною благодатию.
Слава: Очистив от всякия скверны душу и тело, святителю Афанасие, храм достоин Богу показался еси и Троицы жилище явился еси, священнотаинниче пребогате.
И ныне: Храм освящен и лепотою благоукрашен воздвиже угодник Божий Афанасий во славу Твою и честь, Пречистая Владычице, темже не престай молящися со святителем Христу Богу о душах наших.
Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.
Святителю отче наш Афанасие, моли Бога о нас.
Светом благодати воистинну просиял еси, святителю Афанасие, и был еси священноделатель Евангелия Христова.
Святителю отче наш Афанасие, моли Бога о нас.
Благодатными словесы твоими напаяема паства твоя, горькости ересей отрицается.
Слава: Добре упасл еси стадо Владыки твоего, отче Афанасие, темже во Обители Небесныя вселился еси.
И ныне: Даждь нам помощь молитвами Твоими, прилоги отгоняющи лютых обстояний, Дево Всепетая.
Господи, помилуй (трижды).
В правей вере Церковь Христову упасл еси, святителю Афанасие, и еретичества исторгл еси горькия плевелы. Темже в Вышних чертозех водворяешися, блаженне.
Слава, и ныне: Слово Отчее, Христа Бога нашего, от Тебе воплотившагося, познахом, Богородице Дево, Едина Чистая, Едина Благословенная, тем, непрестанно Тя воспевающе, величаем.
Ирмос: Услышах, Господи, смотрения Твоего таинство, разумех дела Твоя и прославих Твое Божество.
Святителю отче наш Афанасие, моли Бога о нас.
Уста богодухновенная стяжав, святителю Афанасие, обличил еси злыя нравы лукавых человек и, скончався в неправедном изгнании, при Фаворе Мгарстем, оставил еси нам, недостойным, честное тело твое, точащее чудеса.
Святителю отче наш Афанасие, моли Бога о нас.
Блажен явился еси, изгнан правды ради, завистию злонравных человек, и нас посетил еси твоим благословением. Темже ныне от всех почитаешися священными песньми, мудре святителю Афанасие.
Слава: Первее был еси архиерей начальнаго града Критскаго, таже, по взятии того от агарян, Патриарх Константиню граду поставлен был еси, идеже богодухновенными учении стадо твое напаял еси, блаженне святителю Афанасие.
И ныне: Тя, Блаженную, Едину избранную и непорочную обрет, воплощается Пребожественное Слово, Богорадованная.
Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.
Святителю отче наш Афанасие, моли Бога о нас.
Безсмертен по имени достойно нареклся еси, отче наш святителю Афанасие, зане, житие твое чисте совершив, во Христа облеклся еси, темже Царь Славы и Бог вечный избра тя в жилище Себе.
Святителю отче наш Афанасие, моли Бога о нас.
Избави чтущия тя, святителю Афанасие, от греховныя бури, от бед и скорбей, к тихому пристанищу приводя богоприятными твоими молитвами.
Слава: Добрый пастырь стада Христова явился еси, угодниче святителю Афанасие, не престай моляся ко Господу, да спасет души наша.
И ныне: Достойно Тя славят святительстии собори и вси преподобных лицы: Зиждителя бо всех, Божие Слово, на руку Твоею носила еси.
Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.
Святителю отче наш Афанасие, моли Бога о нас.
Обитель сию, с верою почитающую тя, святителю Афанасие, храни от находящих искушений, лютых обстояний и всяких скорбей, непрестанно моляся ко Владыце Христу о стаде твоем.
Святителю отче наш Афанасие, моли Бога о нас.
Ты и по смерти, яко жив сый, чудодействуеши, даруя немощным исцеления Божественною благодатию, рече бо Господь: прославляющия Мя прославлю.
Слава: Напастей облацы покрыша ны, и телесныя болезни умножишася. К тебе прибегаем и тебе призываем, святителю Афанасие: потщися на помощь, ускори на молитвы, от бед и скорбных обстояний нас избавляя.
И ныне: Очистив свое сердце, Авраам, праотец Твой, Чистая Дево, прият обещание от Бога: благословитися о семени его всем языком. Тобою исполнение обетования приемлем днесь.
Господи, помилуй (трижды). Слава, и ныне:
О всесвятейший пастырю и учителю вселенныя, преблаженне отче наш святителю Афанасие! К раце мощей твоих припадающе, усердно молим тя: приими от убогих душ наших любовию приносимая тебе моления и, яко имея дерзновение у Престола Владычня, испроси молитвами твоими чтущим тя со Ангелы и всеми святыми непрестанно Пресвятей Троице воспевати: Аллилуиа.
Леностию окаянный аз во глубину греха впадох, но, яко пастырь добр, воздвигни мя, святейший отче, и страсти угаси, зле мучащия мя, яко да, востав, чисте воспою твое светоносное торжество, имже Владыка вселенныя прослави тя достойно, яко раба вернейша, учителя премудра, совершителя Таин Божиих и блюстителя заповедей, яже добре сохранил еси, помазание святое, Афанасие премудре. Того присно моли, да дарует чтущим тя со Ангелы и всеми святыми непрестанно Пресвятей Троице воспевати: Аллилуиа.
Ирмос: Отроцы еврейстии в пещи попраша пламень дерзновенно и на росу огнь преложиша, вопиюще: благословен еси, Господи Боже, во веки.
Святителю отче наш Афанасие, моли Бога о нас.
Во глубину зол впадох, страстьми погружаемь, и ко вратом ада приближихся, грехми побеждаемь. Спаси мя молитвами твоими, Богоблаженне, и воздвигни, поюща: благословен Бог отцев наших.
Святителю отче наш Афанасие, моли Бога о нас.
Всяких лютых недугов врач всеизряден явился еси, отче Афанасие. Исцели убо немощь души моея и сподоби во умилении сердца взывати: отцев наших Боже, благословен еси.
Слава: Дивный во святых Своих, прослави Господь и в земли Российстей угодника Своего, преблаженнаго святителя Афанасия, пастыря добраго и молитвеника о душах наших.
И ныне: Всеславная всех Царице, мольбами святителя Афанасия сохрани невредимы от всякаго злаго обстояния люди Твоя, всегда Тя молящия, яко Предстательницу мирови.
Ирмос: Седмерицею пещь халдейский мучитель Богочестивым неистовно разжже, силою же лучшею спасены сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.
Святителю отче наш Афанасие, моли Бога о нас.
Богатство учений твоих неоскудно расточал еси, святителю Афанасие, имже обогатися ум алчущих словесе твоего. Изгнан же быв неправедно от Престола Царяграда, к верным людем Российския земли пришел еси и в Фаворе Мгарстем блаженныя кончины сподобляешися. Темже вопием: благословите дела Господня, Господа, пойте и превозносите Его во веки.
Святителю отче наш Афанасие, моли Бога о нас.
Яко весна, явился еси, блаженне, таинственными цветы даров Божественных благоухая, разрешая от напастей и скорбей верная чада твоя, к тебе притекающая и Богу вопиющая: благословите, дела Господня, Господа, пойте и превозносите Его во веки.
Слава: Яко лоза многоплодная, добродетелей плоды изращающая, явишася словеса твоя, благодати исполненная: пришед бо ко агаряном, мольбу о людех твоих принесл еси. Тии же, видевше тя, умилишася и, моления ради твоего, престаша убивати критския люди, вопиющия: благословите, дела Господня, Господа, пойте и превозносите Его во веки.
И ныне: Вышний Престоле, Дево Богоневесто, долу лежащее естество наше к Небеси возводиши, темже Тя вси по долгу славим.
Ирмос: Ужасося о сем Небо, и земли удивишася концы, яко Бог явися человеком плотски и чрево Твое бысть пространнейшее Небес. Тем Тя, Богородицу, Ангелов и человек чиноначалия величают.
Святителю отче наш Афанасие, моли Бога о нас.
Днесь светло красуется святая память твоя, и ты, святителю Афанасие, яко солнце, блистаеши, верных озаряя, во Мгарстей же обители мнози, приходящии к тебе с верою, приемлют исцеления. Темже тя величаем.
Святителю отче наш Афанасие, моли Бога о нас.
Сошедшеся днесь, достойно хвалим тя, святителю Афанасие, и мощей твоих чтим раку, просяще подати нам молитвами твоими от страстей избавление, болезней исцеление, грехов оставление, от напастей свобождение, и яко угодника Божия вси тя величаем.
Слава: Славу твою воспети по достоинству невозможно есть: чудеса бо многа совершаеши и исцеления независтно источаеши с верою приходящим к тебе, Афанасие, Российская похвало Темже яко угодника Божия вси тя величаем.
И ныне: Ты еси, Богородице, оружие наше и стена, Ты еси заступление к Тебе прибегающих, Тя ныне на молитву подвизаем, да избавимся от враг наших.
 |
Вам понравилась статья? Тогда подпишитесь на обновления, чтобы не пропускать свежие материалы и сразу же их получать на электронную почту! |
.jpg){kind=icon}
