Познаем мир вместе
новые СТАТЬИ сайта
популярные бренды одежды из Беларуси

Канон святителю Ермогену, Патриарху Московскому и всея Руси

Икона святителя Ермогена, патриарха Московского и всея Руси

 Молитва святителю и чудотворцу Ермогену, патриарху Московскому и всея Руси 

Память празднуем 17 февраля
(2 марта)

 

Тропарь на преставление, глас 4-й

Российския земли первопрестольниче и неусыпный о ней к Богу молитвенниче! За веру Христову и паству твою душу свою положив, страну нашу от нечестия избавил еси. Темже вопием ти: спасай нас молитвами твоими, священномучениче Ермогене, отче наш.

 

Тропарь на прославление, глас 4-й

Приспе день светлаго торжества, град Москва радуется, и с ним Русь Православная ликовствует песньми и пеньми духовными: днесь бо священное торжество в явлении честных и многоцелебных мощей святителя и чудотворца Ермогена, якоже солнце незаходимое возсия светозарными лучами, разгоняя тьму искушений же и бед от вопиющих верно: спасай нас, яко предстатель наш, великий Ермогене.

 

Канон, глас 8-й

 

Песнь 1

Ирмос: Песнь возслем, людие, чудному Богу нашему, свободившему Израиля от работы, песнь победную поюще и вопиюще: поим Тебе, Единому Владыце.

Припев: Святый священномучениче Ермогене, моли Бога о нас.

Ведущии воскликновение, пойте и величайте святителя великаго и, взирающе на кончину его, подражайте вере его.

Святый священномучениче Ермогене, моли Бога о нас.

Обилие благодати обитает в раце мощей твоих, святителю Ермогене, еяже ради прославляем тя, яко новоявленна чудотворца, и просим исцелений.

Святый священномучениче Ермогене, моли Бога о нас.

Начало премудрости – страх Господень, научивый и тя, святителю, работати Господеви с трепетом и радоватися пред лицем Его. Даждь и нам по молитве твоей положити сие начало благое.

Святый священномучениче Ермогене, моли Бога о нас.

Многи скорби праведным, и от всех их избавит я Господь. По словеси сему бысть житие твое, святителю. И се ныне радуешися на Небесех и радуеши всех, чтущих память твою.

Святый священномучениче Ермогене, моли Бога о нас.

Испытаяй свидения Божия был еси, святителю, в законе бо Христове поучался еси день и нощь, и оправдания Господня права суть, в селения бо праведных всели тя Господь.

Святый священномучениче Ермогене, моли Бога о нас.

Заповеди Господни от юности возлюбил еси и предания святых отец даже до смерти соблюл еси, святителю, и ныне с ними сопрославляеши Бога, Егоже моли, да спасет тобою души наша.

Слава: Егоже возлюбил еси и Емуже ревностно поработал еси, ныне с лики святых воспеваеши и молишися за ны.

И ныне: Молитвеннице теплая, Заступнице рода христианского, приими мольбы от нас, прилежно призывающих и молящихся Тебе: покрый страну нашу Православную покровом Твоей благости.

 

Песнь 3

Ирмос: Ты еси утверждение притекающих к Тебе, Господи, Ты еси свет омраченных, и поет Тя дух мой.

Святый священномучениче Ермогене, моли Бога о нас.

Лета древняя помянух, и поучихся во всех делех твоих, святителю, и обретох ведение, како жити в мире сем, от святых отец и от житий святых вразумляяся.

Святый священномучениче Ермогене, моли Бога о нас.

Епископ мудрый людем был еси, святителю, уподобился еси мужу, смотрящу лице бытия страны Православные в летописех древних, якоже в зерцале, поучающуся премудрости Православия во днех древних.

Святый священномучениче Ермогене, моли Бога о нас.

Господи, Господь наш, яко чудно Имя Твое по всей Руси. Господь посмеется врагом нашим. Господь заступник наш. Сию правду живописал еси, святителю, поучая роды родов, яко летописец Православныя Руси.

Святый священномучениче Ермогене, моли Бога о нас.

Людие, поучитеся, людие, умилитеся, вразумляюще себе самех в пениих и песнех духовных, имиже прославил есть святитель Ермоген Заступницу рода нашего.

Святый священномучениче Ермогене, моли Бога о нас.

Аще не Господь созиждет дом, всуе трудишася зиждущии. Сию истину внушал еси, святителю, стражем земли нашея, да не осуетятся помышлении своими и да не всуе мятутся.

Святый священномучениче Ермогене, моли Бога о нас.

Священник церкве Святителя Николая был еси, Ермогене, и, возгревая дар, живый в тебе, велию любовь Богоматере стяжал еси, Еюже от славы в славу даже до Небесе влеком был еси и в селениих праведных вселился еси.

Слава: Уподобился еси купцу, многоценен бисер обретшу, егда икону Богоматере от земли подъял еси, яко сокровище благодати, нищия духом обогащающее.

И ныне: Сказание чудес Твоих, Богородице, еже написа святитель Ермоген во славу иконы Твоея Казанския, воздвизает всю Русь Православную присно прибегати к Тебе во всех обстояниих и прилежно молити: Пресвятая Богородице, помогай нам.

Господи, помилуй (трижды).

 

Седален, глас 8-й

Возшед на высоту Небесную и Божественными оттуду, отче, озарився сиянии чудес, пресветел воистинну явился еси Православней Руси пастырь, нам в напастех сый предстатель непобедим. Темже преславно враги победив, лжу инославия отгнал еси и страну Православную спасл еси от погибели, Ермогене. Моли Христа Бога грехов оставление даровати чтущим любовию святую память твою.

Слава и ныне: Святителю Ермогену подражающе, почтим пресветлую икону Богоматере, яко источник неисчерпаемый исцелений, и ублажим Матерь Бога Вышняго яко Деву и Едину в женах, без семене рождшую Бога плотию.

 

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Святый священномучениче Ермогене, моли Бога о нас.

Возвестите во языцех дела Божия, яже явил нам есть Господь Вседержитель от иконы Своея Матере, – рекл еси, святителю, – да не рекут языцы: где есть Бог их, в Негоже веруют? И да заградятся уста их.

Святый священномучениче Ермогене, моли Бога о нас.

Ята бысть землею, но не удержанна, икона Пречистыя, да будет во утверждение новопросвещенным, блуждающим же во тьме неведения, во откровение света Истины, якоже мудрствует о сем святитель Ермоген.

Святый священномучениче Ермогене, моли Бога о нас.

Ты еси изрядное пение чудес Пренепорочныя, ты еси утверждение немощствующих в вере, ты еси просвещение омраченных тьмою неверия, и поет тя дух мой.

Святый священномучениче Ермогене, моли Бога о нас.

Иго благое и бремя легкое подъял еси, Ермогене, егда образ Ангельский восприял еси, да приидеши в возраст мужа совершенна.

Святый священномучениче Ермогене, моли Бога о нас.

Тебе, одеющагося молитвою, яко ризою, добродетелей подвижника, Спасова обитель видя, зело радовася: грядет бо священноархимандрит обновити обитель и утвердити благочестие.

Святый священномучениче Ермогене, моли Бога о нас.

Ермолаю тезоименитый, усовершился еси, Ермогену же, сожительствуя, уподобился еси и се, яко светильник немерцаяй, поставляешися на свещнице Казанския церкве.

Слава: Лепо есть премудрому немудрыя просвещати, сильному о Господе немощныя укрепляти, лепо есть святительствовати Ермогену, вся могущему о Христе Иисусе.

И ныне: Яко Госпожу, Царицу и Владычицу, заступающу всех нас, в державный Твой покров прибегающих, поет Тя святый Ермоген, с нимже приими и наша моления и спаси души наша.

 

Песнь 5

Ирмос: Утренююще, вопием Ти: Господи, спаси ны, Ты бо еси Бог наш, разве Тебе, иного не вемы.

Святый священномучениче Ермогене, моли Бога о нас.

 Егда был еси в Казани, неведущия истиннаго Бога просвещал еси и работати Единому Богу научал еси. Сего ради со апостолы радуешися, приемля награду благовестника Христова.

Святый священномучениче Ермогене, моли Бога о нас.

Ревностию Божиею по славе дивных во святых Гурия, Варсонофия и Германа поревновал еси, Ермогене, и, тех молитвами вспомоществуемый, в обители святителей преселился еси, предстоя Единому Пастыреначальнику, Егоже моли спастися всем нам.

Святый священномучениче Ермогене, моли Бога о нас.

Милуя, наказывал еси и, наказуя, миловал еси, святителю, и сею мудростию ограждал еси от волков хищных новопросвещенная чада твоя и вся овцы твоя.

Святый священномучениче Ермогене, моли Бога о нас.

Оплотом был еси Православию, немощныя в вере ограждал еси и к попечению о спасении страны во Христе Иисусе царя Феодора призывал еси, указуя стране спасительное преображение.

Святый священномучениче Ермогене, моли Бога о нас.

Град Москва и с ним вся Русь плакася горько, самозванну повелителю воцарившуся и в нечестие облекшуся, ты же един, яко крепкий поборник, сему нечестию противостал еси и веру Православную со дерзновением исповедал еси.

Святый священномучениче Ермогене, моли Бога о нас.

Ермогена исповедника, иже не убояся прещения смертнаго и словес жестоких от нечестиваго врага, песньми ублажаем.

Слава: На Негоже, радующеся, взирают чини Ангельстии и вси святии, Тому предстоиши ныне, Ермогене, и яко исповедник ходатайствуеши присно за Русь Православную.

И ныне: Адамово воззвание, Пренепорочная Дево, с Тобою Господь и Тобою с нами Бог, разумейте сие, языцы, и покаряйтеся.

 

Песнь 6

Ирмос: Ризу мне подаждь светлу, одеяйся светом, яко ризою, Многомилостиве Христе Боже наш.

Святый священномучениче Ермогене, моли Бога о нас.

Собора освященнаго избранием и Божией волею возшел еси, святителю, на престол патриаршия власти, да спасеши Русь, напастьми многими обуреваему.

Святый священномучениче Ермогене, моли Бога о нас.

Веры нелицемерныя исповедание непоколебимое начертал еси, святителю, рукою твоею и сию веру пред лицем всея Церкве в соборе Успения Пречистыя исповедал еси, да узрит вся Русь камень истинныя веры, на немже созиждется и утвердится в Православии.

Святый священномучениче Ермогене, моли Бога о нас.

Язык твой – трость книжника скорописца, имже заградишася уста грешнича и уста льстиваго, и усмирися мятеж нечестивых.

Святый священномучениче Ермогене, моли Бога о нас.

Тьму лжи разгоняя словом истины и на борьбу с изменниками православное воинство благословляя, изнесл еси на стогна града Москвы покров от чудоточных мощей царевича Димитрия, да возвестится правда Божия, и да укрепится страна Православная.

Святый священномучениче Ермогене, моли Бога о нас.

Аще покаетеся, – рекл еси, святителю, – спасени будете, и укрепится силою Божию страна Российская.

Святый священномучениче Ермогене, моли Бога о нас.

Яко древо при исходищих вод, был еси у Престола благодати, святителю, осеняя прохладою утешения и многоплодием правды Православную Русь.

Слава: И проповедуеши, и обличаеши, и призываеши, и молишися, и молитися во всех храмех повелеваеши, святителю, о спасении и о умирении страны Православныя.

И ныне: Богородице Дево, Упование христианом, покрый, соблюди, сохрани и спаси Русь, прибегающу ко Твоему заступлению.

Господи, помилуй (трижды). Слава, и ныне:

 

Кондак, глас 6-й

Темницею и гладом изнуряемь, даже до смерти верен пребыл еси, блаженне Ермогене, малодушие от сердец людей твоих отгоняя и на общий подвиг вся призывая. Темже и нечестивых мятеж низложил еси и страну нашу утвердил еси, да вси зовем ти: радуйся, заступниче Российския земли.

 

Икос

Приидите, православнии людие, песньми ублажим пресветла светильника Церкве Российския, непоколебима столпа веры Православныя, тепла молитвенника и предстателя за землю нашу, крепка стоятеля противу врагов, строгаго обличителя на предателей и разорителей Православной страны, добраго пастыря, душу свою за овцы своя положивша и сего ради венцем славы от Господа венчанна, к немуже припадем, верою и любовию зовуще сице: радуйся, великий в иерарсех Российских святителю Христов отче наш Ермогене.

 

Песнь 7

Ирмос: Отроцы Богочестивии в Вавилоне образу златому не поклонишася, но посреде пещи огненныя, орошаеми, песнь воспеваху, глаголюще: превозносимый отцев и нас Боже, благословен еси.

Святый священномучениче Ермогене, моли Бога о нас.

Огнем лютыя злобы опаляема, пещи огненней уподобилася есть Православная Русь во дни разорения и мятежа лютаго, силою же словес твоих, святителю, орошаема, и до днесь поет православно: отцев и нас Боже, благословен еси.

Святый священномучениче Ермогене, моли Бога о нас.

Отец всея Руси в дни скорби и обстояний явися святитель Божий Ермоген, сего ради призывайте его и пойте с ним имени Всевышняго: отцев и нас Боже, благословен еси.

Святый священномучениче Ермогене, моли Бога о нас.

Молитеся, и поститеся, и изменитеся в новаго человека, одеяна в добродетели Боголюбия и благочестия, да подаст всем нам Господь мир и любовь, земли нашей крепкое единение, стране победу на враги и одоление.

Святый священномучениче Ермогене, моли Бога о нас.

Любовию к отечеству согреваяйся и ревностию по вере паче огня разгораяйся, попалил еси, святителю, терния грехолюбиваго мятежа, обновляя и утверждая обветшавшее житие.

Святый священномучениче Ермогене, моли Бога о нас.

Юнцы тучнии, самозванцы мятежнии, царие иноземнии и изменницы нечестивии одержаша Русь, пред лицем же твоея правды, святителю, исчезоша, яко дым от огня, да веселится Православная Русь о Господе, и да торжествует Православие.

Слава: Богови работницы и тебе помощницы быша святители Христовы: Филарет Ростовский, Ефрем Казанский, Феоктист Тверский и Галактион Суждальский, имиже во всю землю изыде слово твое, Ермогене святителю, и в концы Руси вещание твое.

И ныне: Иже в напастех, и в скорбех, и в болезнех, обремененнии грехи многими, приидите к Заступнице Усердней, Матери Господа Вышняго, Та бо исцелит вы, и утешит, и упокоит.

 

Песнь 8

Ирмос: Богоглаголивии отроцы, в пещи, со огнем пламень попирающе, пояху: благословите, дела Господня, Господа.

Святый священномучениче Ермогене, моли Бога о нас.

Милостыни многи творил еси людем, святителю, егда богатии обнищаша милостию и сребролюбия ради не внимаху, еже помощи неимущим, ты же рекл еси келарю Сергиевой обители Авраамию, и житницы отверзошася, и алчущии насытишася, и благословиша Господа.

Святый священномучениче Ермогене, моли Бога о нас.

Аще и пенится житейское море, аще и беснуется, воздвизаемо напастей бурею, не потопити ему корабля Иисусова: на камени бо веры и правды стоим. Тако рекл еси, святителю, и бысть тако, и се торжествуют православнии и благословят Господа.

Святый священномучениче Ермогене, моли Бога о нас.

Яко добрый кормчий, привел еси, святителю, кораблю Российский к тихой пристани Православныя Церкве, и се страна наша осоляется благодатию Святаго Духа и благословляет Господа.

Святый священномучениче Ермогене, моли Бога о нас.

Рекл еси, святителю, боящимся Господа: не бойся, малое стадо, яко благоизволил есть Отец Небесный даровати нам одоление врагов и мир. Тако веровал еси и тако по вере восприял еси. И се Святая Церковь радуется о Православии страны нашея и благословляет Господа.

Святый священномучениче Ермогене, моли Бога о нас.

Уничижиша тя возстающии на тя, метающе прах и песок в лице твое, да не прещаеши изменником и мятежником. Ты же вся претерпел еси правды ради, благословляя Господа.

Святый священномучениче Ермогене, моли Бога о нас.

Святая и Богом любимая Русь не погибнет, – рекл еси, святителю, изменником, и предателем, и всем врагом нашим: всуе труждаетеся, аще не Господь созидает, покайтеся и благословите Господа.

Слава: Не ведаем, како и нарещи вас, – рекл еси, святителю, мятежником и изменником, отступили бо есте от Бога, отпали от Соборныя и Апостольския Церкве, забыли есте обеты Православныя веры нашея: стояти до смерти за дом Пресвятыя Богородицы, за веру Православную и отечество. Покайтеся, и обратитеся, и благословите Господа.

И ныне: Еже о нас исполнив смотрение Божие и яже на земли соединив Небесным, носила еси во чреве от Духа Свята, Пренепорочная, и родила еси нам всех Бога, Егоже, вся дела Господня, поют и превозносят во вся веки.

 

Песнь 9

Ирмос: Воистинну Богродицу, Тя исповедуем, спасеннии Тобою, Дево Чистая, с Безплотными лики Тя величающе.

Святый священномучениче Ермогене, моли Бога о нас.

 Пречистей Владычице вверил еси, святителю, православное воинство, и стояти за веру неподвижно даже до смерти благословил еси, и боятися Единаго, на Небесех Живущаго, научил еси, сего ради со исповедники православныя правды радуешися.

Святый священномучениче Ермогене, моли Бога о нас.

Окаянныя изменники анафематствовал еси, православным же воином и всем ревнителем Православия милость от Господа Бога и от своего смирения благословение преподал еси, святителю, имже бысть победа и одоление на враги и всея Руси спасение, тебе же венец от Бога, яко строителю святыя жизни.

Святый священномучениче Ермогене, моли Бога о нас.

Глас огненныя ревности о спасении отечества не вяжется, аще и заключается во храмине пусте, яко во гробе, сего ради и заповедал еси ученику твоему, Дионисию игумену, и иноком обители святаго Сергия огласити всю Русь Православную, да воздвижется спасительная брань во славу Святыя Церкве и во утверждение страны Российския, юже возлюбил еси и о нейже молишися Богу.

Святый священномучениче Ермогене, моли Бога о нас.

И первопрестольник Апостольския Церкве, и исповедник Православныя веры, и вторый Златоуст во обличение грехолюбивых и мятежных, и строитель Православныя страны был еси, святителю, и за сие произволение темницею и гладом мучим был еси, и, прияв от Бога неувядаемый венец, с мученики веселишися.

Святый священномучениче Ермогене, моли Бога о нас.

Богу нашему тобою Слава, тебе же, священномучениче Ермогене, довлеет радоватися во свете лица Его и непрестанно молитися, да не погибнет Русь Святая, но да будет даже до конца свет во откровение языков православныя правды.

Святый священномучениче Ермогене, моли Бога о нас.

Нищ и боляй есмь аз, святителю, и во смирении своем припадаю к цельбоносным мощем твоим, исцеления требуя.

 Слава: Егоже возлюбил еси, Емуже душу предал свою еси, и ныне предстоиши со дерзновением яко мученик. Моли Бога о нас, святый священномучениче Ермогене.

И ныне: Тя исповедуем, яко Матерь Господа Вышняго, и, невозвратну надежду имуще на Тя, молимся Тебе умиленною душею и сокрушенным сердцем: всем полезная даруй, и вся спаси, Богородице Дево, Ты бо еси Божественный покров рабом Твоим. 

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
популярные бренды одежды из Беларуси