Познаем мир вместе
новые СТАТЬИ сайта
популярные бренды одежды из Беларуси

Канон святителю Иннокентию Иркутскому

Икона святителя Иннокентия Иркутского

 

Молитвы святителю Иннокентию, чудотворцу Иркутскому

Акафист святителю Иннокентию Иркутскому

 

Память празднуем 26 ноября (9 декабря)

 

Тропарь, глас 3-й

Светильниче Церкве пресветлый, озаривый лучами доброт твоих страну сию и исцеленьми многими притекающих к тебе с верою Бога прославивый, молим тя, святителю отче Иннокентие, ограждай молитвами твоими град сей от всех бед и печали.

 

 

Канон, глас 8-й

 

Песнь 1

Ирмос: Истрясшему в мори мучительство фараоне и Израиля сушею наставльшему, поим Христу: яко прославися во веки.

Припев: Святителю отче наш Иннокентие, моли Бога о нас.

Иерарше непорочне, призри с Небесе, и виждь, и посети осенением твоим виноград сей, егоже насади десница твоя во стране языков, да прославим благоговейно чудеса твоя, аще и не возможно есть исчислити я.

Святителю отче наш Иннокентие, моли Бога о нас.

На пути иногда вразумляше Валаама ослица, да не идет проклинати Израиля, егоже и благослови пришедый от Месопотамии; сице утомленными коньми вразумлен бяше преогорченный путник, да воздаст святителю Иннокентию славу, еюже обещася.

Слава: Ног болезнию и разслаблением всех членов недугующему, явился еси скорый целитель, отче наш Иннокентие, не презри убо и ныне с верою притекающих к живоносным и присноцелебным мощам твоим.

И ныне: Отцу Собезначальнаго Сына плотию родила еси, Пренепорочная Дево, Егоже моли со святителем, да сотворит ны сыны Своего Царствия и наследники обетования вечнаго.

 

Песнь 3

Ирмос: Утверди наш ум и сердца, Небеса словом утверждей, во еже пети и славити Тя во спасение душ наших.

Святителю отче наш Иннокентие, моли Бога о нас.

Купину вторую показал еси, словесный пастырю, егда молитвами твоими сохранил еси среди пламене невредиму святую церковь, в нейже почиваше не у прославленное на земли, но с небеси обилием чудотворений явственно свидетельствованное, свято быти нетленное тело твое.

Святителю отче наш Иннокентие, моли Бога о нас.

Единой вере доступен явился еси, непорочне: темже с пременением естества уставов, мраз и иней сокрыша чистоту твою от очес нечистых, дерзнувших в неверии видети тя, имже не дал еси узрети славы твоея, поучавая ны чистым сердцем тебе славити.

Слава: На помощь скоро притекл еси к старцу, очима тяжко видящему, и, прикоснувся болезненной главе его, явил еси на нем дела Божия; просвети убо и наша душевная очи молитвами твоими, священноначальниче.

И ныне: Твердое и непреложное упование вемы Тя, Богородице, егоже держимся и, уповая, молимся: сохрани град сей и вся грады и страны Христианския от всех бед, находящих человеком согрешающим, но абие молитвами твоими приемлющим согрешений оставление.

Господи, помилуй (трижды).

 

Седален, глас 3-й

Таков нам подобаше архиерей, преподобен, незлобив, кроток, отлучен от грешник, иже пред вечным Архиереем, Иисус Христом, молится выну о спасении стада своего: много бо может молитва праведнаго, поспешествуема во благое.

Слава: Проторжеся вода в пустыни, источник исцелений истекает от неистленных мощей святителя Иннокентия, радость вечная над главою его, еяже да сподобимся и мы молитвами его в невечернем дни воскресения.

И ныне: О Тебе, Отроковице, возгласи пророк, глаголя: се врата востока, и будут затворена, и никтоже пройдет сквозе я: но Господь Бог Един пройдет, и будут врата затворена.

 

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Святителю отче наш Иннокентие, моли Бога о нас.

Иисус в доме Петровом прикоснуся руце тещи его, огнем жегомой, и абие остави ю огнь; сия же знамения последоваша тебе, верующему чудотворцу, укротил бо еси огневицу единым прикосновением боку лежащаго на одре смерти, но призвавшаго тя во уповании жизни.

Святителю отче наш Иннокентие, моли Бога о нас.

Исцелевахуся иногда верующии от нанесения главотяжей и убрусцев Павловых; не просты силы творяше Бог и твоима рукама, новый апостоле, персть бо от твоей священныя раки и елей от лампады отверзают слепотствующей очи и даруют исцеление.

Слава: Молитва веры спасе люте болящаго, иже и исповеда, яко врачеве не воскресят, упование же на тя, благосердый отче, николиже посрамляет с верою призывающих тя во благовременную помощь.

И ныне: Отроковица неискусомужная раждает Провиденнаго Духом от Аввакума, и к Рожденному молится о душах наших, мудре пасомых пастырем, и по исходе своем выну с нами в неистлении святаго телесе своего пребывающим.

 

Песнь 5

Ирмос: От нощи неведения Боговедения день во Свете Лица Твоего, Христе, да возсияет, ко утру хваление Твое в сердцах наших.

Святителю отче наш Иннокентие, моли Бога о нас.

Любовию погрузився во струях упования на угодника Божия, покрытый от главы до ног струпами и в плоти своей не обретающий исцеления, и абие очистися от нечистоты болезненной, якоже Нееман от проказы погружением во Иордане, по глаголу Елиссееву.

Святителю отче наш Иннокентие, моли Бога о нас.

Ищущим тебе обретаешися готовый помощник, святителю Иннокентие, и скоро подаеши недугов исцеление, якоже иногда жене, болезнующей десною рукою, явился еси в сонном видении и сотворил еси ю здраву за единое призвание святаго твоего имене.

Слава: Твердое благодати познание утверждая в верующих, научил еси нас ведети тя яко наставника милостиваго, благоутробия сокровище, правоверия учителя, архиереев похвалу, безпомощных заступника, присно молящагося о спасении чад твоих, с верою к тебе притекающих.

И ныне: Вереи адовы сломишася, и заклепи вечнии сокрушишася Рождшимся от Тебе, Пречистая Мати. Темже молим Тя: избави ны от вечныя смерти ходатайством Твоим и всели ны во свете Сына Твоего, свет искупления мирови возсиявшаго.

 

Песнь 6

Ирмос: Ризу мне подаждь светлу, одеяйся светом, яко ризою, Многомилостиве Христе Боже наш.

Святителю отче наш Иннокентие, моли Бога о нас.

Елицы притекаху к тебе, помощниче теплый, не отхождаху посрамлении: немощнии исцелевахуся, в болезни деторождения сущия от многоцелебной благостыни твоей приимаху скорое недуга разрешение, слепии прозираху; посети убо и нас, щедрый отче, твоею помощию.

Святителю отче наш Иннокентие, моли Бога о нас.

Не буди неверен, но верен, рекл еси, отче, вторицею явивыйся от преломления ноги люте страждущему, и, ударив жезлом в место, идеже стоясте нозе твои, язвою на древе уврачевал еси душевную язву омраченнаго неверием, абие бо исповеда быти тебе благодатнаго врача, воздвигшаго его от одра болезненнаго.

Слава: Непорочныма твоима рукама преподал еси, архиерею Божий, безсмертную пищу страждущей, о чудо! на Небеси приобщился истее Невечерняго Света, вящше седмидесяти лет по твоем успении, и на земли являешися священнодействитель Божественных Таин, уверяя паству твою в неразлучном пребывании выну с притекающими к твоей помощи.

И ныне: Истины учителю, настави ны во истинней вере, моля о спасении нашем с Пречистою Девою Богородицею рожденнаго от Нея на спасение всего мира.

Господи, помилуй (трижды). Слава, и ныне:

 

Кондак, глас 4-й

Непорочности соименнаго пастыря, проповедника веры в языцех Монгольских, славу и украшение Иркутския паствы, любовию восхвалим, вси вернии: той бо есть хранитель страны Сибирския и молитвенник о душах наших.

 

Икос

Ангельским житием возвысился еси, отче, до лицезрения красоты не созданной, еюже наслаждаяся ныне на Небеси, молишися о спасении нашем, нас же на земли научаеши взывати тебе таковая: радуйся, крине, в благорастворенном юге процветший; радуйся, первенче духовнаго сыноположения, от Малыя России Богу посвященный; радуйся, славо и величание града Киева; радуйся, в земном училищи Небесныя мудрости наставниче; радуйся, мудрый исполнителю велений земных; радуйся, мужественный подвижниче Царя Небеснаго; радуйся, проповедниче веры в языцех Монгольских; радуйся, началоположителю добраго священноначалия во странах Сибирских; радуйся, украшение Иркутския паствы; радуйся, благоухание пустыни; радуйся, общаго воскресения в нетлении твоем уверителю; радуйся, неизчерпаемых чудес источниче; радуйся, хранителю страны, тобою избранныя; радуйся, Иннокентие, молитвенниче о душах наших.

 

Песнь 7

Ирмос: В начале землю основавый и Небеса словом утвердивый, благословен еси во веки, Господи, Боже отец наших.

Святителю отче наш Иннокентие, моли Бога о нас.

Крепость и исцеление приимаху от тебе, отче, немощствующии плотию; скорбнии же духом и удрученнии печальми житейскими обретаху душевное утешение в умиленном призывании святаго и прославленнаго имене твоего, прославляющаго дивнаго во святых Своих Бога Израилева.

Святителю отче наш Иннокентие, моли Бога о нас.

Отче, непорочности соименне, тако прославися свет твой пред человеки, яко видяще добрая дела твоя и чудотворения многая, прославляют чудодействующаго тобою, дивнаго во святых Своих Бога Израилева.

Слава: Душевныя наша болезни исцели, Боже, молитвами прославленнаго от Тебе угодника, ускоряющаго на помощь умиленною душею, требующим действеннаго его пред Тобою, Троице Святая, заступления.

И ныне: Ум наш плени в послушание веры, дух и душу всесовершенны соблюди и тело в Пришествие Господа нашего Иисуса Христа непорочно сохрани молитвами Твоими, Богородительнице.

 

Песнь 8

Ирмос: Безначальнаго Царя Славы, Егоже трепещут Небесныя Силы, пойте, священницы, людие, превозносите во вся веки.

Святителю отче наш Иннокентие, моли Бога о нас.

Широкий путь, вводяй в пагубу, презрел еси, преподобне, и тесными враты вшел еси в Небесное Царствие. Отонудуже призирая выну на призывающих тя с верою, укрепи убо и нас понести благое и легкое иго Креста, да внидем в покой Бога Благословеннаго.

Святителю отче наш Иннокентие, моли Бога о нас.

Ангелоподобным житием на земли обрел еси благодать исцелений и явился еси воистинну Ангел Хранитель паствы твоея, бодрственно утверждая ю в вере многоразличными твоими чудотворениями и соблюдая в чистом исповедании отцев Бога Благословеннаго.

Слава: Христово благоухание явился еси, отче, в спасаемых тобою от недугов душевных же и телесных; темже обитатели града, тобою избраннаго, прославляя святую память твою, благословляют прославившаго тя, отцев Бога Благословеннаго.

И ныне: Несть наша брань к плоти и крови, но к началом, и ко властем, и к миродержителем тьмы века сего, к духовом злобы поднебесным; над ними же покажи ны, Владычице, победители, яко да по образу непорочнаго Пастыря возможем вся стрелы лукаваго разжженныя угасити.

 

Песнь 9

Ирмос: Проявленное на горе законоположнику во огни и купине Рождество Приснодевы в наше, верных, спасение, песньми немолчными величаем.

Святителю отче наш Иннокентие, моли Бога о нас.

Апостол языков был еси, отче, якоже и Павел, темже ныне восхищен еси на высоту Божественнаго лицезрения, идеже молишися, да Бог возрастит, еже ты, мудрый делателю, насадил и напоил еси.

Святителю отче наш Иннокентие, моли Бога о нас.

Шлем спасения восприим и мечем духовным препоясався, изшел еси на дело твое, пастырю дивный, и соградил еси оплот благочестия во мраце язычества. Моли убо Преблагаго Бога, да укрепит, еже содела в нас рукою твоею.

Слава: Именем и житием непорочне, приими хвалебныя песни, любовию к тебе возносимыя, осеняя молитвами твоими паству, осиянную лучами доброт твоих, и ускоряя на помощь благодатным заступлением твоим во время благопотребно.

И ныне: Херувимов Честнейшая и Славнейшая без сравнения Серафимов, не презри моления раб Твоих, но покрый нас честным Твоим покровом: спаси люди, благоговейно чтущия память непорочнаго пастыря и молитвенника о граде сем, дивнаго Иннокентия. 

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
популярные бренды одежды из Беларуси