Познаем мир вместе
новые СТАТЬИ сайта
реклама

Канон святителю Михаилу, Митрополиту Киевскому

 

Молитва Михаилу, первому Митрополиту Киевскому

Акафист святителю Михаилу, Мирополиту Киевскому

 

Память празднуем 30 сентября
(13 октября)

 

Тропарь, глас 4-й

Днесь пророчествие во апостолех Первозваннаго исполнися, се бо на сих горах возсия благодать и вера умножися. И иже неверием обветшавшии Божественною купелию отродишася и быша людие обновления, царское священие, язык свят, Христово стадо. Емуже ты, первый пастырь, явился еси, яко первие Крещением послуживый. И ныне предстоя Владыце Христу Богу, моли всем сыном русским спастися: имаши бо дерзновение яко иерарх Божий и священнослужитель.

 

Канон, глас 6-й

 

Песнь 1

Ирмос: Яко по суху, пешешествовав Израиль по бездне стопами, гонителя фараона видя потопляема, Богу победную песнь поим, вопияше.

Припев:  Святителю отче наш Михаиле, моли Бога о нас.

Яко Божий иерарх и служитель Вышняго Престолу со лики святых на Небеси предстоя, молися о нас, служащих Богодухновенными песньми, предстати с тобою, идеже веселие праведных.

Святителю отче наш Михаиле, моли Бога о нас.

Яко избран Господеви во служение славы Его на дело Евангелия Христова, о собранных нас во памяти твоей, святителю Михаиле, молися, да поработаем в заповедех Евангельских и приимем мзду веселия преподобных.

Слава: Яко свеща на свещнице стоя, светом ты благих деяний просиял еси далече, яко и неверныя людие, твоим, отче, наставлением узреша Свет Боговидения, и радуется страна, тобою просвещенна.

И ныне: Яко истинный Свет от ложесн Своих явившая миру, нас во тьме страстей ходящих просвети и настави на путь, путь порождшая роду христианскому, Марие Богоневесто.

 

Песнь 3

Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

Святителю отче наш Михаиле, моли Бога о нас.

Не бе вера всаждена в России, ни благочестие вкорененно, дондеже ты, святителю Михаиле, аки премудр делатель, лядину многобожия истребил, и углубил Богоразумия твердое исповедание.

Святителю отче наш Михаиле, моли Бога о нас.

Светом свышше освещся, великий Владимир, аки зарю прием тя, Божий иерарше, приведе в омраченную идолослужением Русскую землю, да и тамо освятятся людие твоим пришествием и вразумлятся твердыя веры исповеданием.

Слава: Солнце Правды, Христос Бог, аки светозарную яви тебе, Михаиле, земли Русской, юже ты, освещь порождением купельныя бани, Владыце привел еси люди новы, обновленны благия веры исповеданием.

И ныне: Солнце правды Истинный Бог наш, плоть заимствовав от Тебе, миру возсиял есть, Марие Дево, и тля многобожия погибе до конца. Светом, Дево Марие, унынием мя омраченнаго просвети и настави на путь благодеяния.

Господи, помилуй (трижды).

 

Седален, глас 8-й

Сечивом Евангельскаго учения посекл еси идольское изваяние, капища же на землю опроверг и благочестие насадил еси. Имже красующися, град Киев любовию зовет ти: радуйся, Михаиле, архиерею России первопрестольне.

Слава, и ныне: Поющих Ти, радуйся, Избавльшая варварскаго служения, изми работы чуждаго и, сокрушивши в мыслех идолострастие, насади Богоразумие страха Божия. Ты бо еси всему благу Вина, Начаток и Исполнение.

 

Песнь 4

Ирмос: Христос моя сила, Бог и Господь, честная  Церковь Боголепно поет, взывающи, от смысла чиста о Господе празднующи.

Святителю отче наш Михаиле, моли Бога о нас.

Христова раба и благочестна строителя, тебе, святителю, идолы ощутивше, рыдаху горце погибели своея. Людие же Крещением обновленны веселяхуся, праздник светел о Господе празднующе.

Святителю отче наш Михаиле, моли Бога о нас.

Тебе, отче, на горы Киевския пришедшу, первейший идол Перун низвержен, влачашеся коньми, а прочиим от страха трясущимся кумиром. Людие же обновления день пояху о Господе празднующе.

Слава: Всяк пол и возраст людей прежде омраченных, ко просвещению грядяху на реку Почайню, и бысть полк безчисленный, тебе, предводителя имущий. Емуже послужив банею Крещения, ко Богоразумию наставил еси, Михаиле, Божий архиерею.

И ныне: Вси роди блажат Тя, Марие Царице, и мы песньми блажаще, изображенному на иконе лицу Твоему покланяемся, праздник светел во памяти святителя Твоего празднующе.

 

Песнь 5

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.

Святителю отче наш Михаиле, моли Бога о нас.

Божиим Светом освещшеся новокрещении людие, вопияху с тобою, Михаиле: Христе Боже, даждь Тебе Единаго ведети Слова Божия, от мрака идолобесия нас изымающаго.

Святителю отче наш Михаиле, моли Бога о нас.

Падоша Иерихонския стены, Иисусом Навином кивоту обнесенну: падоша и идолы, со крестом тебе, иерарше, предгрядущу. Людие же прославляху Слово Божие, Тя Христе, от мрака неверия человеки изымающаго.

Слава: Красуется град Киев до днесь, банею Крещения одеян от тебе, святителю. И носит, аки гривну злату, на выи честное Евангелие Христово. Еже мы лобызаем и прославляем Слова Божия, от тьмы греховныя нас изымающа.

И ныне: Красуемся вси Твоею добротою, Марие Богоневесто, красна бо еси воистинну. И красоте Твоей вожделев Вышний, плоти Твоей соединися: и Человек бысть Бог и обожи нас, во тлю падших, Тебе ради, Чистая Дево.

 

Песнь 6

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Святителю отче наш Михаиле, моли Бога о нас.

Идолобесия смрадное, аки Моисей жезлом Крестным пресекл еси море, архиерею Михаиле, и люди омыв Боговидения водою, привел еси во пристанище, поющих: слава Тебе, Христе Многомилостиве.

Святителю отче наш Михаиле, моли Бога о нас.

Иже первее заблуждшая Русская земля и не утвержденна, ныне тобою, иерарше Михаиле, наставленна, прииде ко Боговидению. И приемши перстень усыновления, веселится, зовущи: слава Тебе, Христе мой, Многомилостиве.

Слава: Свирепеющия неверием люди укротив в Русской земли и ярем Церкви повиновения возложив на ня, привел еси, Михаиле, многия делатели во виноград Небеснаго Владыки. Сотвори и нас, святе, мудрыя делатели яко приносим ти днесь хваление.

И ныне: Свирепеющия во мне страсти укроти и ярем смирения возложи на мя, Богородице, да в том поработаю прочее время и обрящу милость в День Судный.

Господи, помилуй (трижды). Слава, и ныне:

 

Кондак, глас 2-й

Моисей вторый России явился еси, отче, пренесый мысленный виноград от египетскаго идолослужения в землю пророчествием предуведену. Будет рече утверждение веры на земли, и на версех гор Киевских превознесется паче ливана плод питающ мира всего. От негоже вкусивше, ублажаем тя, Михаиле, Божий иерарше.

 

Икос

Расточенныя люди собрав во един Боговидения разум и Крещением омыв неведения ветхость земли Русской, просветил еси Крестом. И, научив славити Пресвятую Троицу, Отца и Сына и Духа Пресвятаго, сотвори разумное стадо Христу Богу Емуже до днесь верою стоящи, взывает: Избави от всякаго злаго обстояния град и люди тя ублажающия, Михаиле, Божий иерарше.

 

Песнь 7

Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших.

Святителю отче наш Михаиле, моли Бога о нас.

Хладодательною благодати от тебе, святителю, Россия омовенна водою, чешуя разумных очес низверже во святей купели. И позна Единаго Создателя своего, верою зовет: благословен Бог отец наших.

Святителю отче наш Михаиле, моли Бога о нас.

Тебе, граде Киеве, по Крещении веселящуся, сквернии идолы рыдаху, от нихже первейшим идол Перун влачим вопияше горце. Оттуду людие познавше свое первое заблуждение, с тобою, Михаиле, возопиша: благословен Бог отец наших.

Слава: Злат перстень новыя благодати, архиерею Михаиле, вложив России на руку, обручил еси невесту чисту Христови, яже от язык Церковь. Сия и до днесь духовне веселящися, зовет: благословен Бог отец наших.

И ныне: Злат Перстень именуем Тя, Дево Чистая, украшен аки драгоценным адамантом, приединением плоти Христовы. Тем любовию зовем: Благословенна Ты Едина, Сын Твой и Бог отец наших.

 

Песнь 8

Ирмос: Из пламене преподобным росу источил еси, и праведнаго жертву водою попалил еси вся бо твориши, Христе, токмо еже хотети. Тя превозносим во вся веки.

Святителю отче наш Михаиле, моли Бога о нас.

Из пламене идольския лести изъем, премудре, Русскую землю росою Крещения прохладил еси, и несть уже палима возвращением на первая, превозносящи Христа, и тебе, пастыря своего, во веки.

Святителю отче наш Михаиле, моли Бога о нас.

Вся добре разчинив, яже о людех новоизбранных, поставил еси пастыри и учители по градех: и тем новоизбранное стадо испоручив, сам отшел еси Пастырей Начальнику Христу Богу соцарствовати во веки.

Слава: Мног плач и рыдание граду Киеву, твоим, отче, отшествием к Богу, сотворися: но Вышний Иерусалим, приемля тя в недра своя, возрадовася. Идеже живый, не забуди стада твоего, и моли, да с тобою вселится во веки.

И ныне: Многое веселие творю злыми делы бесом и радость, хранителю же моему печаль отвсюду. О Чистая Марие, Мати Христа Бога, настави мя на покаяние, да будет онем плач, Ангелу же моему радость, и мне с ним во веки.

 

Песнь 9

Ирмос: Бога человеком невозможно видети, на Негоже не смеют чини Ангельстии взирати; Тобою бо, Всечистая, явися человеком Слово воплощенно, Егоже величающе, с Небесными вои Тя ублажаем.

Святителю отче наш Михаиле, моли Бога о нас.

Яко финик процвел еси, отче, в дому Божии, и плоды нетление мощей твоих всем явил еси: отсюду убо людие уразумевше, яко предстоиши Христу, тя песньми величаем.

Святителю отче наш Михаиле, моли Бога о нас.

Яко благовонный кипарис, святителю, облагоухаеши, и наслаждаеши покланяющихся ти и нас исполни благоухания твоих молитв, яко песньми память твою величаем.

Слава: Лик святителей Русских и любопразденственных соборы величаем: сотецитеся ко святей пещере, пастырие Первоначальнаго Пастыря, людие же отца своего песньми почтите с нами, днесь бо память его величаем.

И ныне: Вся тварь песнословит Тя, Дево, яко прошедшую вся Небесная врата, и ставшую Огнезрачнаго одесную Престола. Одесную стати и нас сподоби Сына Твоего, яко песньми, Рождшагося из Тебе, и Тя величае

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
реклама