Молитвы святителю Питириму Тамбовскому
Акафист святителю Питириму Тамбовскому
Веры и благочестия наставниче, Церкве светильниче, монашествующих образе, святителю Питириме премудре, стадо твое благочестно упасл еси и ко Христу привел еси, темже в Вышних венцем славы украшен, с нами на земли духом пребываеши, сияя чудесы. Моли Христе Бога спастися душам нашим.
Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть: препрославленный Господь славно бо прославися.
Припев: Святителю отче наш Питириме, моли Бога о нас.
Христе, Свете истинный, разум мой просвети и сердце очисти, да прославлю память угодника Твоего, Богоноснаго Питирима.
Святителю отче наш Питириме, моли Бога о нас.
Отче преподобне Питириме, огнезрачному Престолу в Вышних предстоя и Трисолнечными Светлостьми озаряемь, просвети глубину зол моих, яко да и аз пою: славно бо прославися.
Слава: Якоже Моисей Боговидец древле спасе Израиля от руки фараоновы, тако и ты, Богоносне отче, свободи мя от работы врагу, да, радуяся, славлю Бога, дивнаго во святых Своих.
И ныне: Владычице и Мати Избавителя, предстательством Твоим умоли Сына Твоего, да потребит живущий во мне грех и изведет мя в свободу славы чад Своих.
Ирмос: На камени мя веры утвердив, разширил еси уста моя на враги моя, возвесели бо ся дух мой, внегда пети: несть свят, якоже Бог наш, и несть праведен, паче Тебе, Господи.
Святителю отче наш Питириме, моли Бога о нас.
Якоже древле праведная Анна свое чадо, вдал еси себе самого, отче Питириме, в дар Богу. Утверди и мене на камени заповедей Его, да зову: несть свят, яко Бог наш.
Святителю отче наш Питириме, моли Бога о нас.
Отче Питириме, молитвами твоими утверди ум и сердце наше во Господе, возвыси рог христиан православных, да заградятся уста врагов веры и возвеселимся о спасении своем.
Слава: У цельбоноснаго гроба новаго чудотворца да не хвалится сильный силою своею, да не хвалится мудрый мудростию своею, да не хвалится богатый богатством своим, но о сем да хвалится хваляйся, еже разумети и знати Господа и стяжати богатство благодати Его.
И ныне: Пречистая Дево, Неискусобрачная Мати, неплодную душу мою и безчадную плодоносну покажи благодатию Сына Твоего, молитвами новаго чудотворца Питирима, да зову и аз со всеми верными: несть свят, якоже Бог наш.
Господи, помилуй (трижды).
Аще и зайде прежде под землю тело твое, но, яко солнце из облак, возсия, лучами благодати блистаяся. Темже память твою совершающе, святителю, со страхом покланяемся и, яко общему отцу, тепле молимся: избави ны, чада твоя, от бед и нуждных обстояний.
Слава, и ныне: Упование христиан, Пресвятая Дево, Егоже родила еси паче ума и слова, умоли, смолебника Питирима приимши, оставление прегрешений и жития исправление подати нам, да поем Тя присно, возвеличившую род наш.
Ирмос: Пришел еси от Девы не ходатай, ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи.
Святителю отче наш Питириме, моли Бога о нас.
От юности чистотою девства Ангелом в житии поревновал еси, спасению человеков послужил еси, отче Питириме, и к Богу взывал еси, вопия: слава силе Твоей, Господи.
Святителю отче наш Питириме, моли Бога о нас.
Якоже Ангел во плоти, горел еси, святе, огнем любве Христовы и врученныя тебе люди познанием Сына Божия просветил еси, зовущия: слава силе Твоей, Господи.
Слава: Ангеле земный и человече Небесный, испроси и нам, грешным, спасение у Христа Бога, да и мы купно с тобою зовем: слава силе Твоей, Господи.
И ныне: О Мати Слова и Дево, сохрани ны непорочны от страстей безчестных, да Христу, всельшуся в нас, поем: слава силе Твоей, Господи.
Ирмос: Просвещение во тьме лежащих, спасение отчаянных, Христе, Спасе мой, к Тебе утренюю, Царю мира, просвети мя сиянием Твоим, иного бо, разве Тебе, Бога не знаю.
Святителю отче наш Питириме, моли Бога о нас.
Светом Твоим всю вселенную озаривый, просвети тьму мою, Господи, мрак души моея разжени, в честней памяти угодника Твоего Питирима.
Святителю отче наш Питириме, моли Бога о нас.
Светильник сый Солнца Праведнаго, озаряяся присно Светом невечерним, отче наш Питириме, облистай ум и сердце наше, да, радующеся, Спасу нашему поем: иного, разве Тебе, Бога не знаем.
Слава: Что Тебе принесем, Христе Спасе наш, кия песни воспоем благосердию Твоему, яко возсиял еси нам свет спасения, избавление от беззаконий наших чудесы многими святителя Питирима.
И ныне: Мати Святая, Богородице, рождшая Свет Неприступный, не презри моления недостойных чад Твоих, во тьме грехов сущих, но просвети нас светом боговедения, да утренююще, славим Тя.
Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.
Святителю отче наш Питириме, моли Бога о нас.
Бездна зол моих смущает мя и низводит мя во глубину отчаяния, но Ты, Боже, пучина милости сый неисчерпаемая, даждь ми руку помощи, яко Петрови, предстательством милостиваго угодника Питирима, и спаси мя.
Святителю отче наш Питириме, моли Бога о нас.
Бездно милости и щедрот, Господи, ущедри ны, погибшее создание Твое, укроти волны страстей наших и в пристанище спасения ны возведи, молитв ради святителя Питирима.
Слава: Отче наш Питириме, служителю верный Милостиваго Бога, умоли Его благостыню, да имиже весть судьбами спасет ны, погибающия, и явит нам всемогущую помощь по твоему предательству.
И ныне: Пресвятая Владычице, Мати милосердия, обышедше, обыдоша нас врази веры нашея, и несть заступающаго, и погибаем, потоцы бо беззаконий премогоша ны, и отчаяваемся, но Ты Матерними Твоими щедротами приклони Сына Твоего на милость, да спасет ны от бед, якоже от кита Иону.
Господи, помилуй (трижды). Слава, и ныне:
Монахов наставника изрядна и святителя всем людем милостива, чудотворца предивна и молитвенника о нас неусыпна, сошедшеся, воспоим Питирима, Тамбовския земли похвалу.
Воспоим днесь, вернии, святителя великаго в песнех и пениих духовных: радуйся, отче Богоносне Питириме, Смоленския земли отрасль пречестная, во граде Вязьме благодатию Божиею напоенная и, яко крин, процветшая, Тамбовскую же страну плоды добродетелей обогатившая; радуйся, пастырю добрый, насаждением истинныя веры и светом благочестия тьму нечестия разгнавый; радуйся, спасительными труды твоими и подвиги многи неверныя обративый и ко Христу приведый; радуйся, чудную икону Богоматере граду Тамбову в наследие оставивый, от неяже многоразличная исцеления источаются; радуйся, своима рукама ископавый кладязи воды неисчерпаемыя, юже с верою пиющии приемлют недугов исцеление и от душепагубных страстей свобождение; радуйся, посещением твоим со други твоими, святителем Митрофаном и Боголюбивым Василием, Тамбовския дебри и леса облагоухавый; радуйся, тем начало иноческаго жития тамо положивый, в мире же живущим образ истинныя дружбы показавый; радуйся, Тамбовския земли похвало.
Ирмос: Образу златому, на поле Деире служиму, трие Твоя отроцы небрегоша безбожнаго веления, посреде же огня ввержени, орошаеми, пояху: благословен еси, Боже отец наших.
Святителю отче наш Питириме, моли Бога о нас.
Господи Боже наш, Любы неизреченная, человека перстнаго паче злата и сребра образом Твоим украсил еси, всякими даровании и чудесы многими обогатил еси. Темже, память чудотворца Твоего Питирима совершающе, вопием Ти: благословен еси, Боже отец наших.
Святителю отче наш Питириме, моли Бога о нас.
Преподобне отче Питириме, образ Создателя своего в души твоей от страстей очистив и любовию Божиею распалаемь, предал еси себе на служение воли Его, всегда взывая: благословен еси, Боже отец наших.
Слава: Якоже древле отроцы благочестивии в Вавилоне, истинную веру во стране Тамбовстей, отче Питириме, утвердил еси и нечестие обличил еси, всегда труждаяся, благовествуя, моляся и поя: благословен Бог отец наших.
И ныне: Пресвятая Владычице Богородице, образ Твой честный граду Тамбову в благословение и покров державен рукама святителя Питирима даровала еси, да славословим Тобою Державнаго Христа, Бога нашего.
Ирмос: В пещь огненную ко отроком еврейским снизшедшаго и пламень в росу преложшаго Бога пойте, дела, яко Господа и превозносите во вся веки.
Святителю отче наш Питириме, моли Бога о нас.
Господи Боже мой, пламень огненный древле в росу отроком благочестивым преложивый, пламень страстей моих угаси росою молитв благочестиваго святителя Питирима, да Тя превозношу с ним и аз во вся веки.
Святителю отче наш Питириме, моли Бога о нас.
Отче наш Питириме, слез твоих теченьми огненная искушения страстей и похотей плотских угасил еси и, яко во цветнице, в чистем сердце твоем присно ликовствовал еси: вся дела, благословите, пойте Господа.
Слава: Чистою боголюбивою душею со Ангелы огнезрачному Престолу Бога ныне предстоя, и оттуду незаходимыми зарями облиставаемь, и чудесы многими нам сияя, просвети, отче Питириме, облежащую нас тьму неверия и суеверия, да поем и благословим дивнаго во святых Своих Бога во веки.
И ныне: Якоже огнем пещным, страстьми палимый, зову Ти блудный аз: Владычице Чистая, Мати Всемогущаго, спаси и избави мя от огненнаго осуждения.
Ирмос: Безначальна Родителя Сын, Бог и Господь, воплощся от Девы, нам явися, омраченная просветити, собрати расточенная. Тем Всепетую Богородицу величаем.
Святителю отче наш Питириме, моли Бога о нас.
Отца Безначальнаго Слове, Сыне Единородный, человека падшаго хотя обновити, Сын Девы явился еси, и, грехи всего мира взем, на Крест вознесл еси, и оттуду распростертыма дланьма расточенная чада Божия собрал еси; темже и мы, днесь союзом любве Твоея связуеми и дивнаго угодника Твоего величаем.
Святителю отче наш Питириме, моли Бога о нас.
Воплощенному Сыну Божию подражая, паче инех смирил еси себе, преподобне отче Питириме, темже и любовь Божию стяжал еси и заблуждшая чада Божия привел еси ко Отцу Небесному, славити Его благосердие.
Слава: Исполнь любве Христовы, отче наш Питириме, словом и житием паству твою поучал еси сирыя призирати, нищия питати, скорбящия утешати. Помолися Спасу Христу, да и мы днесь в память твою украсим себе состраданием и милостынями, якоже чада Божия возлюбленная.
И ныне: Мати Святая, Безмужная Дево, во чреве Твоем Бога и Человека воедино совокупившая, даруй и нам, расточенным, соединитися во Единем Христе, Сыне Твоем, на Немже утвердися Церковь, Тя величающая.
 |
Вам понравилась статья? Тогда подпишитесь на обновления, чтобы не пропускать свежие материалы и сразу же их получать на электронную почту! |
.jpg){kind=icon}