Молитвы святителю Софронию, епископу Иркутскому
Акафист святителю Софронию, епископу Иркутскому
От юности Христа возлюбил еси, блаженне Софроние, добре управил еси иноческия обители и, архиерейства саном почтен быв, упасл еси Иркутскую паству, темже и по преставлении дарования чудес от Бога приял еси и молиши Христа Бога избавити нас от бед и спасти души наша.
Скорый в бедах и скорбех заступниче, отче иерарше страны Сибирския, святителю Софроние, на Небеси предстояй с первоиерархом Иркутския Церкве и всеми святыми, выну имаши благоволение Господа Славы, призри на люди, притекающия к честным останкам святых мощей твоих, с верою и любовию слезно просящия твоея помощи и заступления, моли, Егоже проповедал еси людем Сибири, избавити я от находящих зол и наветов вражиих, просвети людей оляденевшая древле неверием сердца, даровати утверждение веры Христовы и спасти души наша.
Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.
Припев: Святителю отче наш Софроние, моли Бога о нас.
Славу возслем Христу, Богу нашему, дивному во святых Своих, память угодника Его днесь прославляюще.
Святителю отче наш Софроние, моли Бога о нас.
Втораго тя заступника граду нашему прияхом, от всяких находящих на ны зол твоим предстательством нас сохрани.
Слава: Всех благих дел образ себе показуя пастве твоей, привлекл еси многи души во спасение, иже и улучиша райскаго утешения наслаждение, поюще: несть свят, паче Тебе, Господи.
И ныне: Буря напастей обдержит ны, Владычице, и волны скорбей, но, предваривши, подаждь нам руку помощи и теплое заступление и предстательство Твое.
Ирмос: На камени мя веры утвердив, разширил еси уста моя на враги моя, возвесели бо ся дух мой, внегда пети: несть свят, якоже Бог наш, и несть праведен, паче Тебе, Господи.
Святителю отче наш Софроние, моли Бога о нас.
Яко адамант драгоценнейший, возсиял еси ко украшению Церкве Российския, блистаяй непорочностию жития, да и мы, недостойнии, света Христова насладимся.
Святителю отче наш Софроние, моли Бога о нас.
Теплотою веры согрей сердца наша, от мрака греховнаго иззябшия, дух благочестия и страха Божия вкорени в нас, память твою ублажающих.
Слава: Любовию утвердився Христовою, явился еси, яко река, Сибирскую страну напаяя учением словес, Богоблаженне Софроние, темже любовию память твою совершаем.
И ныне: Удивила еси воистинну ныне на нас благодеяния и милости Твоя, Владычице, темже славим многое милосердие Твое.
Господи, помилуй (трижды).
Блажен ты, иерарше Софроние, воистинну и треблажен еси: совершенною прилепляяся к Богу любовию, и вся люди возлюбил еси, душу полагая за паству твою, бедствующим благодеяния творя, души напаяя смирением и покорением промышлению Божественному. Сего ради тя ублажаем.
Слава, и ныне: Стена непобедимая нам, христианом, Ты еси, Дево Богородице, к Тебе бо прибегающе, невредими пребываем и, паки согрешающе, имамы Тя Молитвенницу. Тем, благодаряще, вопием Ти: радуйся, Благодатная, Господь с Тобою.
Ирмос: Услышах, Господи, славное Твое смотрение и прославих, Человеколюбче, непостижимую Твою силу.
Святителю отче наш Софроние, моли Бога о нас.
Иерарше Божий, предстоя Престолу Господа Славы, молися убо мир даровати стране нашей и от всех лютых избавитися.
Святителю отче наш Софроние, моли Бога о нас.
Тако просветися свет твой пред человеки твоими добрыми делы, имже явился еси в скорбех утешитель, болящим врач благодатный, да, вси людие Иркутстии, прославим Отца Небеснаго, даровавшаго нам тебе, великаго чудотворца.
Слава: Духа Пресвятаго храм, отче, был еси, вмещающ в себе Божественную Премудрость, на домостроительство Церкве Христовы и монашествующим на утверждение.
И ныне: Удивляется вся земля и вси языцы чудятся, зряще многое Твое милосердие, Владычице, к стране нашей и роду христианскому, обаче неисправление наше верою ко благочестию премени.
Ирмос: Света Подателю и веков Творче, Господи, во свете Твоих повелений настави нас: разве бо Тебе иного бога не знаем.
Святителю отче наш Софроние, моли Бога о нас.
Елицы во Христа крестихомся, людие Иркутския паствы, вкупе сошедшеся днесь, облекохомся в радость духовную, память святителя прославляюще.
Святителю отче наш Софроние, моли Бога о нас.
Любве Христовы подражатель быв, вся наша братоненавидения умири, да тобою в любви евангельстей споспешествуеми, благоговейно хвалим тя.
Слава: Непреоборим явился еси в деле Господни, Софроние, во всем покаряяся воли Его святей, нимало не взирая на человеков негодования, поя всегда: разве Тебе иного Бога не знаю.
И ныне: Божественным Твоим сиянием, Благая, исцели наша страсти, яже от невнимания нам приходят: молит Тя о сем и святый Софроний.
Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.
Святителю отче наш Софроние, моли Бога о нас.
Явися паки благодать спасительная пастве Иркутстей в прославлении, блаженне, памяти твоея, не бо по грехом нашим воздадеся нам, но теплаго молитвенника обретохом, чтущия память твою.
Святителю отче наш Софроние, моли Бога о нас.
Пастыря тя добраго вемы, добре стадо твое упасшаго, и ныне паству твою в вере и единомыслии сохрани, во еже пребыти нам в союзе любве и мира и достойным быти вечныя любве.
Слава: Напитал еси алчущия правды пищею Небесною: хлеб бо ангельский бысть слово твое, Софроние, изымая от пленения греховнаго души чад твоих и ко Христу тех приводя.
И ныне: Трепетом содержими есмы, Благая, ужасают бо нас ловления лукаваго, но Ты, Владычице, от бездны греховныя нас возведи.
Господи, помилуй (трижды). Слава, и ныне:
Соименнаго мудрости иерарха, изрядное Церкве Иркутския украшение, отца нашего святителя Софрония любовию восхвалим, вси вернии, той бо есть хранитель града и страны сея и молитвенник о душах наших.
Целомудрия добротами уязвився, святителю, невозвратным желанием последовал еси Сотворшему тя, всяко плотское наслаждение возненавидел еси и яко иное солнце Иркутстей пастве возсиял еси, тем и Христос даром тя чудес обогати. Поминай нас, чтущих пресветлую память твою, да зовем ти: радуйся, архиерейского сана удобрение; радуйся, града Иркутска духовное украшение; радуйся, полуденныя страны Российския прозябение; радуйся, полунощныя страны Сибирския похвало; радуйся, чудес не умаливый в опалении мощей твоих; радуйся, носяй венец правды в Небеснем Царствии. Радуйся, Софроние Богомудре, молитвенниче о душах наших.
Ирмос: Богопротивное веление беззаконнующаго мучителя высок пламень вознесло есть. Христос же простре Богочестивым отроком росу духовную, Сый благословен и препрославлен.
Святителю отче наш Софроние, моли Бога о нас.
Радости исполняемся, людие града Иркутска, сошедшеся на честное прославление твое, да единеми усты и сердцем Троицу Единосущную, тя прославльшую, почтим, Ейже ты, святителю, предстоиши, моляся о душах наших.
Святителю отче наш Софроние, моли Бога о нас.
Отче, святителю Софроние, предстоя на Небесех, не забуди ны, долу сущих: от всякия находящия напасти сохрани, вся раздоры и брани умири, да прочее время живота нашего безпечальни пребудем, ограждаеми молитвами твоими.
Слава: Трисолнечный Свет почил есть в тебе, святителю Софроние, пресветлую свещу тя показа людем Своим, целебника и врача безмездна, поющим Господеви: Сый благословен и препрославлен.
И ныне: Мати Дево Препрославленная, угаси пещь страстей наших милосердием Твоим, да воспоем Тя во веки со избранными Твоими.
Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: благословите, вся дела Господня, Господа.
Святителю отче наш Софроние, моли Бога о нас.
Славы, яже от человек, восприяти не восхотев, Божиим произволением честныя мощи твоя огненным запалением пременил еси, да точию от Христа Бога прославишися, темже научая нас не земнаго, но Небеснаго Царствия вожделевати, егоже улучити чаем молитвами твоими, предстателю наш.
Святителю отче наш Софроние, моли Бога о нас.
Яко луч света Христова возсиял еси в стране Сибирстей, святителю блаженне Софроние, просвещая всякаго грядущаго путем евангельским, да, светом твоим озаряеми, не заблудим в пути греховнем и вечнаго Света достигнем, идеже вкупе с тобою жизнь вечную наследуем.
Слава: Апостола втораго Сибири, Софрония, прославим, непорочному житию того последуем и, вся греховная злопомнения отринувше, зовем: радуйся, Софроние, града нашего заступление.
И ныне: Есть воистинну святый день, в оньже собра нас Матерь Божия прославити угодника Своего Софрония, во храме Ея почивающаго и чудесы своими пети нас побуждающего: благословите, вся дела Господня, Господа.
Ирмос: Безначальна Родителя Сын, Бог и Господь, воплощся от Девы, нам явися, омраченная просветити, собрати расточенная. Тем Всепетую Богородицу величаем.
Святителю отче наш Софроние, моли Бога о нас.
Веру соблюде, течение земное сконча, прочее дадеся тебе венец в Царствии Христове. Утверди и нас, маловерием колеблемых, да не будем неверни, но верни, и, взирающе на честный образ твой, спасение улучим.
Святителю отче наш Софроние, моли Бога о нас.
Иже с верою призываху тя, угодниче Божий, велию благодать получиша, являешибося в скорбех житейских утешитель, в печалех помощник, недуг многообразных целитель, от всяких бед и зол избавитель: не остави чудотворною помощию нас, память твою верою чтущих.
Слава: Мыслию твоею к вечному и нетленному устремился еси, вся же земная – славу и богатство – отринул еси. Помози и нам, наставниче дивный, да взыскуем правды и Царствия Божия, да, тленную мира юдоль прешедше, в час смертный христианския кончины сподобимся и вкупе с тобою лицезрети Господа славы достойни будем.
И ныне: Ангелов Царицу, архиерейскаго, пресвитерскаго и монашескаго чина Владычицу и всего рода христианскаго Покровительницу, приидите, вси, восхвалим и поклонимся Ей, Та бо неложно обещася быти нам Помощница до скончания века.
.jpg){kind=icon}
