Познаем мир вместе
новые СТАТЬИ сайта
реклама

Канон святителю Стефану, епископу Пермскому

 Молитвы святителю Стефану, епископу Пермскому

Акафист святителю Стефану, епископу Пермскому 

 Память празднуем 26 апреля
(9 мая)

 

Тропарь, глас 4-й

Божественным желанием, от юнаго возраста, Стефане премудре, разжегся, ярем Христов взял еси и людей оляденевшая древле неверием сердца, Божественное семя в них сеяв, евангельски духовне породил еси. Темже преславную твою память почитающе, молим тя: моли, Егоже проповедал еси, да спасет души наша.

 

Канон, глас 4-й

 

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Припев: Святителю отче наш Стефане, моли Бога о нас.

Священнаго ты Писания от младенства научився, Богоносе Стефане, в дальняя места пришел еси, и неведущим Бог тобою познася.

Святителю отче наш Стефане, моли Бога о нас.

Идеже прелесть почитаема бяше, тамо же ныне тобою Бог неведущим, святителю Стефане, познася. Темже священную Твою память достодолжно ублажаем.

Слава: Богодохновенным твоим учением научил еси люди веровати во Христа и от идольския прелести уклонятися. Сего ради тя вси, яко единоревнителя апостолом, песньми почитаем.

И ныне: Ты Единаго, Богоневесто, в Вышних седящаго, на руку носила еси, плоть бывша: Ты бо еси избранна от всех век, приятелище достойно Вседержителя.

 

Песнь 3

Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.

Святителю отче наш Стефане, моли Бога о нас.

Не убоялся еси, святителю, людей тогда нечествующих, но тех дерзновенно кумирницу со идолы огню предал еси и всех научил еси вопити: несть свят, паче Тебе, Господи (дважды).

Слава: Тезоименитым мужеством и смирения нравом на овчу кротость убийц преложил еси, сего ради и венцы венчался еси, святителю Стефане.

И ныне: Тя заступление неблазненно, Богомати, стяжавше и упование на Тя возлагающе, спасаемся и, к Тебе прибегающе, сохраняемся вси.

Господи, помилуй (трижды). Слава, и ныне:

 

Седален, глас 4-й

Ума пречуднаго и бодреннаго учителя, священнодействы Церковь украсивша, и мутным учением волхва, яко возбесневша волка, от Христовых овец словесы своими отгнавша, и невредно духовная своя чада сохранша, восхвалим, вернии, Стефана прехвальнаго, глаголюще: моли Христа Бога спастися душам нашим.

 

Песнь 4

Ирмос: Седяй в Славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Святителю отче наш Стефане, моли Бога о нас.

Яко солнце, чистое житие твое возсия, святителю, тьму идолобесия от людей твоих отгнав, всех научил еси взывати: слава силе Твоей, Господи.

Святителю отче наш Стефане, моли Бога о нас.

Волшебная буесловия, яко премудр, посрамил еси, и сих от Христова стада словесы твоими, яко пращею, отгнал еси, и звати всех научил еси: слава силе Твоей, Господи.

Слава: Яко истинный святитель тих и кроток, отче, был еси и столп благочестия Церкве явился еси, люди твоя благочестию научив вопити Христу: слава силе Твоей, Господи.

И ныне: Тя оружие на враги предлагаем, скорби всякия лютых обстояний отреваем, и возмущения еретическаго, Мати Божия, избегаем.

 

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Святителю отче наш Стефане, моли Бога о нас.

Воздвигл еси учением твоим древле во тьме неведения люди лежащия, чада Божия и света показал еси наследники, отонудуже тя, святителю, вси любомудренно почитаем.

Святителю отче наш Стефане, моли Бога о нас.

Премудрость Духа Святаго благодатию во устнах твоих излиявшися самотворительно и ко Христову познанию приведе люди, святителю.

Слава: Свету великому яко венечник ныне, святителю, предстоиши, поминай изрядное твое достояние, еже многими труды, отче, стяжал еси, да вси тя ублажаем.

И ныне: Возсия из Тебе мысленное Солнце и светлыя лучи Своего Божества всем простре, Богородице Владычице, тем Тя вси славим.

 

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Святителю отче наш Стефане, моли Бога о нас.

Ралом словес твоих оляденевшая людей сердца возделал еси, Божественное семя в них всеяв, плод красный Христу, святителю, привел еси.

Святителю отче наш Стефане, моли Бога о нас.

Быстринами твоих учений идольская разжжения, премудре Стефане, угасив, Божественными твоими словесы верных сердца утвердил еси.

Слава: Во Единосущную Троицу веровати люди научив, премудре Стефане, от скверны идольския к Живому Богу привел еси.

И ныне: Расторгни моих согрешений рукописание, одержащих мя печалей и страстей разрешение даруя, и соблюди мя неврежденна, Владычице.

Господи, помилуй (трижды). Слава, и ныне:

 

Кондак, глас 8-й

Самозванен не ищущим тебе, святителю, обрелся еси, люди, от идольския лести свободив, ко Христове вере привел еси и волхва пансотника посрамил еси, темже и первый епископ и учитель Перми был еси. Сего ради духовная твоя чада, яко тобою избавльшеся от идол, благодарная тебе возопием: радуйся, Стефане, учителю премудрый.

 

Икос

Всякаго мирскаго пристрастия кроме, отче, быв, от юности прилежал еси премудрости и детельное художество достигл еси Богословия. И в дальния страны пришед, идеже весьма Бог не познавашеся, но прелесть бесовская почиташеся, тамо апостольски люди научил еси веровати во Христа, идолы сокрушив и волхва посрамив, святитель тем был еси, Темже духовная твоя чада, яко тобою избавльшеся от идол, благодарная тебе зовем: радуйся, Стефане, учителю премудрый.

 

Песнь 7

Ирмос: Не послужиша твари Богомудрии паче Создавшего, но огненное прещение мужески поправше, радовахуся, поюще: препетый отцев Господь и Бог, благословен еси.

Святителю отче наш Стефане, моли Бога о нас.

Злочестивый он чародей, иже на благочестие хулу глаголавый, тобою, премудре, яко беззаконен, от Христова стада новых людей отгоним бывает. Мы же Христу зовем: благословен Бог отец наших (дважды).

Слава: Преславно яко прешед от мира к премирным, святителю, жилищем и причастием Богу приближився, воспеваеши: благословен Бог отец наших.

И ныне: Избавльшеся Тобою первыя клятвы, к присносущней Жизни прешедше, радуйся, зовем Ти, преславная Владычице, Яже Бога нам рождшая.

 

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Святителю отче наш Стефане, моли Бога о нас.

Словесы твоими наставляема чада твоя, святителю, от тьмы идольския к свету Богоразумия прешедше, единогласно Христу вопием: благословите, вся дела Господня, Господа и превозносите Его во веки (дважды).

Слава: Свет Трисолнечныя Троицы, вселився в Божественное твое сердце, люди вся просвети святым крещением и научи Творцу Избавителю вопити: благословите, вся дела Господня, Господа и превозносите Его во веки.

И ныне: Усты и разумом Богородицу Тя мудрствующе, песнословим Тя, Пренепорочная: родила бо еси, Пречистая, плотию обложена Бога и Господа. Тем Тя, Дево, поем и превозносим во веки.

 

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Святителю отче наш Стефане, моли Бога о нас.

Твоими труды, святителю, яже на земли, Небесный покой прият, идеже святых ликове и праведных всесветлое торжество. Отонудуже и нас поминай, память твою присно славящих (дважды).

Слава: Вечных и нетленных улучити желая, святителю, и яже в мире мнящихся сладких оставив, Христу последовал еси. Темже и лику архиерейскому сочетался еси, преславне.

И ныне: Плоть прияти восхотев, в Тя вселися, едину святейшу всех обрет Богородицу, воистинну яви Матерь Деву.

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
реклама