Познаем мир вместе
новые СТАТЬИ сайта

Канон святой благоверной княгине Евдокии

Икона святой благоверной княгини Евдокии

 Молитва преподобномученице Евдокии 

Память празднуем 7 (20) июля

 

Тропарь, глас 8-й

По земнем вдовстве Небесному Жениху себе уневестивши и в княжестем чертозе подвижнически поживши, послежде и чертог, и чад твоих Бога ради оставила еси, преподобная Евфросиние, и вшедши во обитель, тобою созданную, и во иночестем образе многи подвиги показала еси, и святое твое житие по благодати Божией блаженною кончиною увенчала еси. И ныне предстоящи Христу Богу, моли спастися душам нашим.

 

Иной тропарь, глас 5-й:

От юности предызбранная Богом угоднице, оставльши светлый чертог княжеский, уклонилася еси во обитель, тобою созданную, и, пучину житейскаго моря преплывши, ныне со Ангелы песнословиши Христа Бога. Емуже непрестанно молися, преподобная, яко да сохраняет выну обитель, тобою созданную, и дарует нам мир и велию милость.

 

Канон, глас 6-й

 

Песнь 1

Ирмос: Яко по суху, пешешествовав Израиль, по бездне стопами, гонителя фараона видя потопляема, Богу победную песнь поим, вопияше.

Припев: Святая благоверная княгине Евдокие, моли Бога о нас.

Моего разума омрачение твоими молитвами отжени, преподобная Евфросиние, да восхвалю славную и светоносную твою память, поя Божественную песнь.

Святая благоверная княгине Евдокие, моли Бога о нас.

Яко река многоводная, ты, славная Евфросиние, благодати Божественными струями, напоила еси верных сонмы, вопиющия Богу песнь победную.

Слава: Божественными сияньми душу твою озаривши, сладострастие плоти попалила еси воздержанием крайним, воспевающи Христу Богу песнь победную.

И ныне: Светлыми лучами Твоего Сына, Богородице, просвети омраченную мою душу, страстей смущение отжени, Твоими, Чистая, ходатайствы.

 

Песнь 3

Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

Святая благоверная княгине Евдокие, моли Бога о нас.

Исполншися, мудрая мати Евфросиние, Божественнаго Духа, дом явилася еси Его и, чад твоих по плоти оставльши и Богу прилепившися, Тому воспевала еси: несть свят, паче Тебе, Господи.

Святая благоверная княгине Евдокие, моли Бога о нас.

От повеления Божественнаго явлься тебе, Архистратиг Михаил осия тя лучами света Небеснаго и удержа язык твой, да известно сотворит всем явление свое тебе.

Слава: На гору высокую добродетелей возжелавши внити, преподобная, по явлении тебе Архистратига оставила еси временную княжения славу и, в созданную тобою обитель уклоншися, Христу Богу воспела еси: Ты еси Сын Божий, Избавитель мира.

И ныне: Се лествица юже виде иногда Иаков утверждену на земли, на нейже утверждашеся Бог, Светоносная Пречистая Богородице, Приснодевствующая.

Господи, помилуй (трижды).

 

Седален, глас 3-й

Явилася еси, преподобная Евфросиние, во граде Москве, яко солнце иное, озаряющи верных лучами чудес твоих и исцеления подающи всем, с верою приходящим к тебе и вопиющим ти: радуйся, в мире благочестно живущих похвало и монашествующих удобрение.

Слава, и ныне: Пречистыя Твои руце, Дево Мати, простерши, покрый уповающия на Тя и к Сыну Твоему зовущия: всем подаждь, Христе, Твоя милости.

 

Песнь 4

Ирмос: Христос моя сила, Бог и Господь, честная Церковь Боголепно поет, взывающи, от смысла чиста о Господе празднующи.

Святая благоверная княгине Евдокие, моли Бога о нас.

Постом и молитвою, преподобная Евфросиние, себе очистивши, вся света исполнилася еси и дом Святаго Духа показалася еси.

Святая благоверная княгине Евдокие, моли Бога о нас.

Бдении и пощением, будущаго ради воздаяния, люте плоть твою умерщвляла еси, блаженная Евфросиние, и ныне чисте зриши Святую Троицу.

Слава: Облистаема славою красных жития твоего исправлений, явилася еси, яко меч обоюдуострый, ссекающий демонская ухищрения, Божественною силою укрепляема.

И ныне: Светильник всесветлый, Божественная трапеза, Божие селение, кивот и жезл процветший миру Ты показалася еси, Мати Дево.

 

Песнь 5

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.

Святая благоверная княгине Евдокие, моли Бога о нас.

Светоподательными благодати блистаньми, осиявай вся ны, преподобная мати, и тьму отжени искушений и греховнаго омрачения.

Святая благоверная княгине Евдокие, моли Бога о нас.

Тебе вси заступницу имамы, преподобная мати наша Евфросиние: не престай убо о нас молити Господа, да не лишени будем Чертога Его Небеснаго.

Слава: Яко звезда светозарная, показалася еси, мати Евфросиние, блуждающих во мраце путеводящая, во искушениих и вражиих наветех скорая и надежная помощница.

И ныне: Доброта Иаковля, Юже возлюби Бог и в Нюже вселитися изволи Слово Божие, земных слава и грешных прибежище Ты еси, Богородице Чистая.

 

Песнь 6

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Святая благоверная княгине Евдокие, моли Бога о нас.

Возсиявши, яко солнце, богосиянными лучами, преподобная Евфросиние, струи изливаеши исцелений всем, похваляющим твоя постническия труды и дивныя подвиги.

Святая благоверная княгине Евдокие, моли Бога о нас.

Ублажаем и чтим твою память святую и молим тя присно: помяни и нас, мати Евфросиние, у Престола всех Царя.

Слава: Егда токмо узрела еси, преподобная Евфросиние, третицею написанный образ явльшагося тебе Архистратига, и абие разрешишася узы языка твоего, и прославила еси Господа, творящаго дивная чудеса.

И ныне: Вся хотением составивый Бог и содержай всяческая словом, Твоима рукама держится, Пречистая, Иже Божественным Существом неописанный.

Господи, помилуй (трижды). Слава, и ныне:

 

Кондак, глас 2-й

Вся красная мира сего, яко суетная, презревши и тело твое постом и бдением изнуривши, непрестанными молитвами Богу угодила еси, преподобная Евфросиние, и, дар исцелений от Него прияти сподобльшися, слепому прозрение и многим недужным исцеление даровала еси. Темже радостно взываем, глаголюще: слава Богу, прославляющему святыя Своя.

 

Икос

Приидите, постническое сословие и чистоты усерднии хранителие, песньми духовными воспоим преподобную Евфросинию, красоты мира сего возненавидевшую, временную княжения славу оставльшую, во обители, ею созданней, образ монашествующим показавшую, многими бдении и постом тело свое удручившую, и многих ради подвигов еще в житии сем дар исцелений от Бога приявшую, и по смерти исцеления неоскудно источающую всем, с верою приходящим к честней раце мощей ея. Темже радостно взываем, глаголюще: слава Богу, прославляющему святая Своя.

 

Песнь 7

Ирмос: Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси, Боже отец наших.

Святая благоверная княгине Евдокие, моли Бога о нас.

Евангельским словесем внемлющи, крест свой на рамена твоя восприяла еси и Христу последовала еси, преподобная Евфросиние, Тому непрестанно взывающи: благословен еси, Боже отец наших.

Святая благоверная княгине Евдокие, моли Бога о нас.

Доброты тлеющия, Евфросиние, небрегла еси, будущаго чающи воздаяния, и прияла еси славу нестареющую Небеснаго блаженства и веселия вечнаго.

Слава: Токи чудес изливаеши, и подаеши исцеления телесных болезней, и души исполняеши Божественнаго веселия верою почитающих святую память твою.

И ныне: Велие содеяся на Тебе таинство, Дево Мати: Сын Божий из Тебе воплотися и Человек бысть. Емуже, веселящеся, поем: благословен еси, Боже отец наших.

 

Песнь 8

Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.

Святая благоверная княгине Евдокие, моли Бога о нас.

В законе Божием чисто поучающися и в заповедех Божиих безпорочно ходящи, дом Духа Святаго была еси, блаженная Евфросиние. Темже по смерти твоей не отлучи тебе Господь лика преподобных, с ними же ныне Богу поеши: Превозносимый во веки Боже, благословен еси.

Святая благоверная княгине Евдокие, моли Бога о нас.

Кротостию ко всем землю кротких наследовала еси, нищелюбием и милостынями помилование от Бога улучила еси, чистотою сердца и целомудрием Бога зрети сподобилася еси, Емуже со всеми святыми поеши: Превозносимый во веки Боже, благословен еси.

Слава: Ум твой к Богу чисто возводящи и доброту вечнаго покоя смотряющи, плотския страсти духу покорила еси и, иноческим образом украсившися, вечное блаженство улучила еси, поющи Христа во веки.

И ныне: Божия и несекомая гора явилася еси, Дево, от неяже отсечеся камень краеугольный – Христос, Иже сокруши крепость идольскую и двери отверзе Царствия Небеснаго.

 

Песнь 9

Ирмос: Бога человеком невозможно видети, на Негоже не смеют Чини Ангельстии взирати; Тобою бо, Всечистая, явися человеком Слово воплощенно, Егоже величающе, с Небесными вои Тя ублажаем.

Святая благоверная княгине Евдокие, моли Бога о нас.

Не терпя лукавый враг твоих всенощных бдений и зельнаго воздержания, славы же земныя и красных мира сего презрения, клеветами и злоречием возмути душу чад твоих со служители их, ты же, преподобная, Бога ради поношения клеветы с терпением велиим понесла еси, Богу себе вручающи.

Святая благоверная княгине Евдокие, моли Бога о нас.

Егда крайнее измождение тела твоего обличала еси пред чады твоими, клеветы всячески клеветником отмщати воспретила еси, Богу себе предающи, Иже и прослави тя чудес даровании, блаженная Евфросиние.

Слава: Твоих подвигов прияла еси венцы и ныне с преподобных лики на Небесех присно радуешися, поминай убо и нас, преподобная мати Евфросиние, да молитвами твоими сподобимся улучити Небеснаго Царствия.

И ныне: Пособствуеши верным во бранех, Пресвятая Владычице, темже и стране нашей на вся сопротивныя даждь победы, да Тя выну величаем.

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта