Познаем мир вместе
новые СТАТЬИ сайта

Канон святой мученице Анастасии Узорешительнице

Икона святой мученицы Анастасии Узорешительницы

 

Молитва святой Анастасии Узорешительнице

Акафист святой великомученице Анастасии Узорешительнице

 

Празднуем 22 декабря (4 января)

 

Тропарь, глас 4-й

Победоноснаго Воскресения истинноименитая наречена еси, мученице Христова, победы на враги поставила еси мук терпением, Христа ради, Жениха твоего, Егоже возлюбила еси. Того моли спасти души наша. (Дважды.)

Слава, и ныне, Богородичен: Еже от века утаенное и Ангелом несведомое таинство, Тобою, Богородице, сущим на земли явися Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша. 

 

Канон, глас 8-й

 

Песнь 1

Ирмос: Песнь возслем, людие, чудному Богу нашему, свободившему Израиля от работы, песнь победную поюще и вопиюще: поим Тебе, единому Владыце.

Припев: Святая великомученице Анастасие, моли Бога о нас. (Поклон.)

Единыя вожделенныя Христовы, Анастасие славная, доброты ищущи, претекла еси доброты мирския твердостию нрава и безсмертнаго наследия, мученице, сподобилася еси. (Дважды.)

Святая великомученице Анастасие, моли Бога о нас.

Слава: Нощь лестнаго омрачения, просвещением Духа озаряема, честная, претекла еси смысленне и ныне вселилася еси, идеже есть божественное сияние несозданныя Троицы.

И ныне: Явися невидимый Бог, преестественно раждаемь, за благоутробие многое из Тебе, Дево Мати, обнищав, богатый, яко да безсмертием человеческий род обогатит.

Моли Бога о нас, святая великомученице Анастасие, яко мы усердно к тебе прибегаем, скорой помощнице и молитвеннице о душах наших. (Поклон.)

 

Песнь 3

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.

Святая великомученице Анастасие, моли Бога о нас.

Благочестным дерзновением гонителей притупила еси разжженных глагол стрелы, спасительным Словом обогатившися, Анастасие, и божественною любовию двизания душевная управивши. (Дважды.)

Слава: Точию, мученице, вопияла еси: ищу Господа, к единой Того любви душу привязах, Сего осиятися чистейшими богатно блистаньми иду, обычая простотою.

И ныне: Неискусобрачная Отроковице, рукою носящаго всю тварь во утробе носиши, воплощаема, Егоже и раждаема восклоняеши в яслех, Младенца зрима превечнаго.

Моли Бога о нас, святая великомученице Анастасие, яко мы усердно к тебе прибегаем, скорой помощнице и молитвеннице о душах наших. (Поклон.)

Господи помилуй. (Трижды.)

 

Седален, глас 1-й

Яко невесту тя Христову восхваляем, дево, яко Феклу честную достойно почитаем. Темже и в памяти твоей проливаются реки исцелений: ты бо прияла еси благодать, яко хранящи заповеди Господни силою Духа.

Слава, и ныне, Богородичен: Молитвы раб Твоих приими, Богородице, и избави нас от всякия беды, яко рождшая Христа Спаса, избавителя душ наших.

 

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Святая великомученице Анастасие, моли Бога о нас.

Мученическое благославие любовию взыскавши, сего получила еси, твердо пострадавши несомненною волею, терпеливодушная. (Дважды.)

Слава: Истканною от свыше благодати ризою истинно одеялася еси совлечением тела, страстотерпице мученице всехвальная.

И ныне: Плотоносец происходит от Твоего светоноснаго ложесна, Пречистая, Царь Небесный, яко на престоле, в яслех возлегий.

Моли Бога о нас, святая великомученице Анастасие, яко мы усердно к тебе прибегаем, скорой помощнице и молитвеннице о душах наших. (Поклон.)

 

Песнь 5

Ирмос: Утренююще вопием Ти: Господи, спаси ны; Ты бо еси Бог наш, разве Тебе иного не вемы.

Святая великомученице Анастасие, моли Бога о нас.

Законно подвизалася еси, беззаконныя победивши, мученице всеславная, силою Духа. (Дважды.)

Слава: Воскресение Божие образуеши тезоименитством, враги проклинающи невидимыя, всехвальная.

И ныне: В вертепе подземнем родитися от Девы Христос грядет, да веселятся всяческая.

Моли Бога о нас, святая великомученице Анастасие, яко мы усердно к тебе прибегаем, скорой помощнице и молитвеннице о душах наших. (Поклон.)

 

Песнь 6

Ирмос: Молитву пролию ко Господу, и Тому возвещу печали моя, яко зол душа моя исполнися, и живот мой аду приближися, и молюся яко Иона: от тли, Боже, возведи мя.

Святая великомученице Анастасие, моли Бога о нас.

Святых мученик следящи терпеливно Христа ради подвиги, и тех потребам служащи, и гноения, преподобная, отирающи, обогатилася еси пресветло, тех сияющи благославием. (Дважды.)

Слава: Капли врачеваний изливаеши тучами божественных дарований, и страстей реки воспрятуеши, и помоществуеши люте бедствующим, всеславная мученице Христова, Божественнаго Воскресения тезоименитая.

И ныне: Исцеляя человеческое естество, древним преступлением истлевшее, без тли нов раждается Младенец, и в Твоих недрех, яко на престоле, седит, Безневестная, Отеческаго не оставль соседения Божеством.

Моли Бога о нас, святая великомученице Анастасие, яко мы усердно к тебе прибегаем, скорой помощнице и молитвеннице о душах наших. (Поклон.)

Господи помилуй. (Трижды.) Слава, и ныне.

 

Кондак, глас 2-й

Во искушениих и скорбех сущии, к твоему храму притекающе, приемлют честная дарования от живущия в тебе божественныя благодати, Анастасие, ты бо присно миру точиши исцеления.

 

Икос

Воскресения Христова тезоименита сущи, падша мя ныне воскреси молитвами твоими, от чудес твоих каплю искапавши, мученице, души моей и запаления лютаго греха угашающи. Мир бо спасаеши от страстей многообразных всегда, имиже и аз искушаемь есмь: ты бо, всем вся подающи, миру точиши исцеления.

 

Песнь 7

Ирмос: Отроцы еврейстии в пещи попраша пламень дерзновенно и на росу огнь преложиша, вопиюще: благословен еси, Господи Боже, во веки.

Святая великомученице Анастасие, моли Бога о нас.

Огнь испепелила еси лестный, якоже дети, пламени приобщившися, показоваше тепло рачение, богомудрая, егоже к твоему стяжала еси Владыце и Жениху. (Дважды.)

Слава: Тучи проливаеши врачеваний, уставляющи паление недугов, и люди присно устрояеши песнопети: благословен еси, Господи Боже, во веки.

И ныне: Чудо, мысль удивляющее, совершаемое в Тебе, Дево Мати: родити имаши Бога и в яслех восклонити, Херувимом неприступнаго и невместимаго естеством.

Моли Бога о нас, святая великомученице Анастасие, яко мы усердно к тебе прибегаем, скорой помощнице и молитвеннице о душах наших. (Поклон.)

 

Песнь 8

Ирмос: Богоглаголивии отроцы, в пещи со огнем пламень попирающе, пояху: благословите, дела Господня, Господа.

Святая великомученице Анастасие, моли Бога о нас.

Храм Троицы показалася еси в божественных храмех, молитвами и пощении, Анастасие, упражняющися, благословите, взывающи, дела Господня, Господа. (Дважды.)

Слава: Крепчайшими словесы Хрисогона, страстотерпице, укрепльшися, идолов немощное попрала еси суровство, доблественне пострадавши.

И ныне: О Боговместимая Отроковице! Родиши Младенца, Творца веков и неизменнаго Господа, в Вифлееме граде за неизреченную милость.

Моли Бога о нас, святая великомученице Анастасие, яко мы усердно к тебе прибегаем, скорой помощнице и молитвеннице о душах наших. (Поклон.)

 

Песнь 9

Ирмос: Воистинну Богородицу Тя исповедуем, спасеннии Тобою, Дево чистая, со безплотными лики Тя величающе.

Святая великомученице Анастасие, моли Бога о нас. (Поклон.)

День веселия приношает ти тварь, Анастасие, память прославляющи, Егоже прославила еси, Слова, твоими кровьми. (Дважды.)

Слава: Светом чистейшим ныне осияема, молитвами твоими просвещатися свыше всем нам проси, мученице благодарная.

И ныне: Светло вся тварь ныне да радуется: Богородица родити грядет от Бога Бога Слова, Человека бывшаго.

Моли Бога о нас, святая великомученице Анастасие, яко мы усердно к тебе прибегаем, скорой помощнице и молитвеннице о душах наших. (Поклон.)

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта