Молитва к преподобной Евфросинии Суздальской
В тебе, мати, известно спасеся еже по образу, приимши бо Крест, последовала еси Христу и, деющи, учила еси презирати убо плоть, преходит бо: прилежати же о души вещи безсмертней. Темже и со Ангелы срадуется, преподобная Евфросиние, дух твой.
Святая твоя память Суждальскую страну веселит, верных же вся созывает во всечестный храм твой, идеже ныне совершается всеславная память твоя, Евфросиние преподобная: моли Христа Бога, спастися душам нашим.
Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.
Припев: Преподобная мати наша Евфросиние, моли Бога о нас.
Светом молитв твоих озари нас, с любовию приступающих святую память твою воспети, преподобная мати.
Преподобная мати наша Евфросиние, моли Бога о нас.
Испрошенна молитвами и от чрева матерня избрана бывши, всю себе в жертву Христу Богу принесла еси и сосуд избран Божественных даров явилася еси, блаженная.
Слава: Сохранити хотя девство Христу Жениху и послушание соблюсти родителем, молитвенно воззвала еси к Богородице и Тоя ходатайством желанное устроение жизни улучила еси, преславная.
И ныне: Всего мя спасает Слово Пребожественное, из чрева Твоего воплотитися благоволившее, Чистая Мати Дево.
Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.
Преподобная мати наша Евфросиние, моли Бога о нас.
Свободу получив от брака Божиим смотрением, красному добротою Христу обручилася еси произволением и, Тому усердно поработав, ныне в небесных обителех Того утешаешися обильно.
Преподобная мати наша Евфросиние, моли Бога о нас.
Небесная возлюбивши, вся красная мира сего оставила еси, преподобная, и во обитель всельшися, неленостными трудами постничества Богу угодила еси, Егоже моли спастися душам нашим.
Слава: Всенощными стоянии твоими безплотным Ангелом подобилася еси, тех споспешниками имущи в твоих непрестанных к Богу молитвах.
И ныне: Призри на немощь рабов Твоих, Всепетая Богородице, и избави нас от скрытных сетей врага и губителя душ наших.
Господи, помилуй (трижды).
Пасома от Господа, яко овча кроткое, сопротивных полки победила еси благодатию Святаго Духа и, скончав мужественно подвиг, венцы победные прияла еси в небесных селениих, идеже упокоеваяся, Бога прилежно моли спастися душам нашим.
Пасома от Господа, Сего овча явилася еси кротка, сопротивныя полки побеждая и, скончав подвиг божественный свой, в Небесную ограду вселися, Евфросиние преподобная, Бога прилежно моля даровати нам велию милость.
Слава, и ныне: Многими обдержимии напастьми, к Тебе прибегаем, Владычице Чистая: покрый нас покровом Твоим и молитвами Твоими от страстей и бед спаси.
Ирмос: Услышах, Господи, смотрения Твоего таинство, разумех дела Твоя и прославих Твое Божество.
Преподобная мати наша Евфросиние, моли Бога о нас.
Бодренным оком ума твоего в зрении невидимаго Бога выну пребывала еси, блаженная: Егоже лицезрением ныне наслаждающися, моли уныния дреманию оттрястися от очей наших.
Преподобная мати наша Евфросиние, моли Бога о нас.
Божественным словом и благодатию Святаго Духа воспитавшейся, на высоту добродетелей востекла еси, преподобная мати. Ихже стезею шествовати и нас укрепи молитвами твоими.
Слава: Огнем Божественнаго страха попалив страстей терние и теплотою Утешителя согревшися, была еси безстрастия зерцало, Егоже причастники и нас покажи ходатайством твоим.
И ныне: Омраченныя грехами души наша просвети, Пречистая, и во свете заповедей Сына Твоего и Бога ходити научи ны.
Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.
Преподобная мати наша Евфросиние, моли Бога о нас.
Нося крест свой, последовала еси позвавшему Тя Господу бодренно, светильник инокиням бывши в житии твоем, преславная мати.
Преподобная мати наша Евфросиние, моли Бога о нас.
В терпении, послушании и воли своей отречении тесный путь совершивши, ныне в пространных селениих обитаеши, в няже доспети и нас устрой.
Слава: Вся красная мира сего поправши, буди нам помощница, изнемогающим в борении с прелестями века сего.
И ныне: Приснодеву поем Тя, Богородице: Ты бо Бога Слова плотию мирови рождши, пребыла еси Дева.
Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.
Преподобная мати наша Евфросиние, моли Бога о нас.
Многими подвиги плотская умертвивши стремления и нас, подражати тебе в постничестве возжелавших, тесным путем твоим шествовати умудри.
Преподобная мати наша Евфросиние, моли Бога о нас.
Воздержание, молитву и любовь стяжавши, преподобная, иноческаго жития образ явилася еси, в немже преуспети и нам пособствуй ходатайством твоим.
Слава: Послушания труды прешедши и всеми добродетельми украсившися, жезл настоятельства прияла еси во обители иноческой, ныне же венцем Славы увенчана еси: сего ради ублажаем тя, преподобная.
И ныне: Яже Бога Слова Избавителя миру плотию рождшая, избави, молимся, от сетей вражиих души наша, Богородительнице Чистая.
Господи, помилуй (трижды). Слава, и ныне:
Девства чистый сосуд елеем молитвы и любве исполнивши, неугасимый светильник в сердце своем возжгла еси, преподобная, с нимже бодренно в сретение Небеснаго Жениха изшедши, в чертог Того пресветлый прията была еси: идеже ныне водворяяся с лики Ангелов и святых, молися, молимся, Христу Богу, части дев юродивых избавитися нам.
Девство возлюбив, сохранение того испросила еси у Приснодевы и, к земному шествуя жениху, Небеснаго сретила еси: Емуже уневестившися, вся житейская оставила еси и притрудное совершивши постническое житие, в небесный чертог прията быти сподобилася еси, идеже ныне с лики Ангелов и святых водворяяся, моли Христа Бога, сотворити и нас причастники блаженныя части твоей.
Ирмос: От Иудеи дошедше отроцы, в Вавилоне иногда верою Тройческою пламень пещный попраша, поюще: отцев Боже, благословен еси.
Преподобная мати наша Евфросиние, моли Бога о нас.
Востекши на высоту добродетелей и безстрастным во плоти житием Ангелом уподобльшися, рая сладости наследницею быти сподобилася еси, взывающи: благословен еси, Господи Боже, во веки.
Преподобная мати наша Евфросиние, моли Бога о нас.
Сияя светом безстрастия, от страстей молитвами твоими избавляеши притекающих к тебе молитвенно, преподобная, взывающих: благословен еси, Господи Боже, во веки.
Слава: Престолу предстоя Вседержителя, избавление от бед и скорбей молитвами твоими испроси нам, чтущим память твою, да взываем: благословен еси, Господи Боже, во веки.
И ныне: Пресвятая Дево Богородице, ходатайством Твоим исцели наша телесныя немощи и душевныя недуги, да Тебе радостно воспоем: радуйся, Благодатная.
Ирмос: Царя Небеснаго, Егоже поют вои Ангельстии, хвалите и превозносите во вся веки.
Преподобная мати наша Евфросиние, моли Бога о нас.
Заповеди Господа внимающи, трезвением и бодренностию все наветы и козни врага препобедила еси, от нихже и нам избавится молитвами твоими сподоби.
Преподобная мати наша Евфросиние, моли Бога о нас.
Щитом веры и шлемом упования вооружившися, полчища вражеская отразила еси молитвами твоими от обители, и ныне нас хранити не престай ходатайством твоим.
Слава: Срамных страстей совлещися рубищ, в красныя же добродетели ризы облещися сподоби нас молитвами твоими.
И ныне: Владычице Чистая, нас, к Тебе усердно прибегающих, от страстей и бед свободи молитвами Твоими.
Ирмос: Воистинну Богородицу, Тя исповедуем, спасеннии Тобою, Дево Чистая, с Безплотными лики Тя величающе.
Преподобная мати наша Евфросиние, моли Бога о нас.
Нечистотами греховными оскверненных нас убели, блаженная Евфросиние, молитвами твоими, к покаянию подвигши ожестевшия души наша.
Преподобная мати наша Евфросиние, моли Бога о нас.
Нестяжанием упразднившися, безбедно преплыла еси житейское море, преподобная, егоже треволнений избавитися сподоби и нас, чтущих память твою.
Слава: Токами слез твоих огнь страстей угасила еси, блаженная, ихже жжения избави и нас молитвами твоими.
И ныне: Буди нам прибежище, стена и покров, Пречистая Дево, да Тя с безплотными лики непрестанно величаем.
 |
Вам понравилась статья? Тогда подпишитесь на обновления, чтобы не пропускать свежие материалы и сразу же их получать на электронную почту! |
.jpg){kind=icon}
