Познаем мир вместе
новые СТАТЬИ сайта
реклама

Канон святой великомученице Екатерине

Икона святой великомученицы Екатерины

 Молитвы святой великомученице Екатерине

Акафист святой великомученице Екатерине

 

Память празднуем 24 ноября (7 декабря)

  

Канон, глас 8-й

 

Песнь 1

Ирмос: Колесницегонителя фараона погрузи чудотворяй иногда Моисейский жезл, крестообразно поразив и разделив море: Израиля же беглеца пешеходца спасе, песнь Богови воспевающа.

 

Припев: Святая великомученице Екатерино, моли Бога о нас.

Екатерины, всемудрыя мученицы молитвами, Христе, мрачное око души моея просвети, зарю ми дая, Владыко, Твоего светолития, душетленных падений моих весь мрак потребляющую.

Святая великомученице Екатерино, моли Бога о нас.

Направляема Владыки, всемудрая, божественными повелении и Того любовию палима, потекла еси, к подвигом тщащися, и мучителей разумы, Екатерино, устрашила еси словом, и мудростию, и благодатию.

Святая великомученице Екатерино, моли Бога о нас.

Управляема дланию, славная, крепкою Христовою, идольския бури избегла еси, мученице, немокренно преплывши Креста ветрилом и божественными ветры Духа, песнь Богу воспевающи.

Слава: Радующися девственными добротами, Екатерино мудрая, и божественное знание с небесе имущи, лжеименнаго знания благодерзновенно и мужественно предстатели посрамила еси, тыя державне победивши.

И ныне: Иже Богородицу Тя проповедует, Пречистая, всякия ереси отриновение имать: плоть бо бывша, неизменно родила еси превышша всякия, Богородительнице, твари Слово Божие присносущное.

Моли Бога о нас, святая великомученице Екатерино, яко мы усердно к тебе прибегаем, скорой помощнице и молитвеннице о душах наших. (Поклон.)

 

Песнь 3

Ирмос: Утверждей в начале Небеса разумом, и землю на водах основавый, на камени мя, Христе, заповедей Твоих утверди, яко несть свят паче Тебе, едине Человеколюбче.

Святая великомученице Екатерино, моли Бога о нас.

Вольными твоими стремленьми вошла еси ко страданию, волею Христа подражающи и победивши светло тьмы миродержца, венценосица явилася еси, Екатерино богоприятная.

Святая великомученице Екатерино, моли Бога о нас.

Крепостию ума обличила еси мучители, безбожия в глубине валяющияся, риторствующи яве богознания догматы, Божиею мудростию мученица уясняема всехвальная.

Слава: Равнобожие во уши Евине пошептавый, от отроковицы младыя ныне попирается, оружием бо Креста оградившися, посрами Екатерина мученица безмерно того хвалящася.

И ныне: Умерщвленный мой ум, жизни действом из Тебе явльшияся миру воздвигни, язвы и струпы истребляющи греховныя, едина Богородительнице всенепорочная.

Моли Бога о нас, святая великомученице Екатерино, яко мы усердно к тебе прибегаем, скорой помощнице и молитвеннице о душах наших. (Поклон.)

Господи помилуй. (Трижды.)

 

Седален, глас 4-й

Жениха твоего, Христа, возлюбивши, свещу твою светло уготовльши, добродетельми просиявши, славная. Темже вошла еси с Ним в чертог и, венец страдания от Него приемши, от бед избави нас, совершающих, Екатерино, память твою.

Слава: Лик составим духовно, братие, премудрыя добрыя мученицы Екатерины верно, Господеви взывающе: слава Ти, просвещая сердца человеча, слава Ти, почтый доблюю в страстех. Тоя молитвами, Христе Боже, спаси души наша.

И ныне: Богородичен. Слово Отчее Христа Бога нашего, из Тебе воплотившагося, познахом, Богородице Дево, едина Чистая, едина Благословенная. Тем непрестанно Тя воспевающе величаем.

 

Песнь 4

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра отча, и нашу нищету посетив. Тем с пророком Аввакумом зову Ти: силе Твоей слава, Человеколюбче.

Святая великомученице Екатерино, моли Бога о нас.

Страдальческое, Екатерино, противление показала еси, мученице приснопамятная, враждебнику зело терпеливо противляющися, и того поправши ногама красныма, Креста силою, страстоносице, мучеников похвала.

Святая великомученице Екатерино, моли Бога о нас.

Невеста Христова, Екатерино всеблаженная, явилася еси, божественныя красоты световидными лучами просвещаема и добротою сияющи. Темже и, веселящися, песнопоеши Владыце: силе Твоей слава, Человеколюбче.

Святая великомученице Екатерино, моли Бога о нас.

Мучительскую гордыню низложила еси, и божественным словом мудрости твоея, яко от глубины лестнаго демоноговения, прельщаемыя исхитила еси, учащи звати Христу песнопоющия: силе Твоей слава, Человеколюбче.

Слава: Благославное и светоносное торжество славныя памяти твоея, всехвальная, крепко дерзость вражию поправши, яко солнце возсия, в немже велегласно Владыце вопием: силе Твоей слава, Человеколюбче.

И ныне: Ныне крепость низложи отметающихся образа, Отроковице, поклонения Тебе, Чистыя, и паче ума из Тебе воплощеннаго, и мир весь просвещшаго, и всех святых. Верою же чтущия Тя просвети, едина Всепетая.

Моли Бога о нас, святая великомученице Екатерино, яко мы усердно к тебе прибегаем, скорой помощнице и молитвеннице о душах наших. (Поклон.)

 

Песнь 5

Ирмос: Вскую мя отринул еси от лица Твоего, Свете незаходимый, и покрыла мя есть чуждая тьма, окаяннаго? Но обрати мя, и к свету заповедей Твоих пути моя направи, молюся.

Святая великомученице Екатерино, моли Бога о нас.

Любовию огнепалима, мученице всеславная, Владыки твоего, и ищущи Того недомысленную доброту видети, самовольным нравом ранам себе вдала еси, девства сияющи благодатьми.

Святая великомученице Екатерино, моли Бога о нас.

Страстьми священнейшими, отроковице добродево, украсивши Тебе самую благолепно, возшла еси к небесному Христову чертогу, и ныне светло твоему Жениху веселящися сочеталася еси, всеблаженная.

Слава: Отроковица всесветлая явилася еси, возлюбивши единаго желаемаго, и во след Того крепчайшее течение совершивши, в воню мира Твоего умнаго истощеннаго, вопияла еси: теку, Женише мой.

И ныне: Истинную Богородицу Тя вси познавше, Пречистая Владычице, из Тебе рождшагося Бога Слова ведяще, проповедаем во двух существах, хотениих самовластных познаваема, Мати Богоневестная.

Моли Бога о нас, святая великомученице Екатерино, яко мы усердно к тебе прибегаем, скорой помощнице и молитвеннице о душах наших. (Поклон.)

 

Песнь 6

Ирмос: Бездна грехов и прегрешений буря мя смущает, и во глубину нужднаго реет мя отчаяния, но Твою крепкую руку мне простри яко Петрови, о Управителю, и спаси.

Святая великомученице Екатерино, моли Бога о нас.

Всю тя, добротою сияющу, девства зарею, мученическими же, отроковице, обагрену кровьми, видев, благое Слово и пречистое в чертозех небесных тя всели.

Святая великомученице Екатерино, моли Бога о нас.

Возмогла еси Крестом, мучителей разрушити державу, и мирския мудрости обличивши суету, богодухновеннаго учения точащи догматы, велемудренная Екатерино приснопамятная.

Слава: Лестию первее Адама райския сладости изгнавшаго, ран болезни крепко терпящи, низложила еси на землю, мученице всеславная, и венцы Царствия венчалася еси.

И ныне: Милостива мне Судию и Сына Твоего, Богородице Дево, Твоими мольбами быти в день Суда, Избавителя же лютых, Мати, сотвори, к Тебе бо единой надежды возлагаю.

Моли Бога о нас, святая великомученице Екатерино, яко мы усердно к тебе прибегаем, скорой помощнице и молитвеннице о душах наших. (Поклон.)

 

Кондак, глас 2-й

Лик честный божественне, мучениколюбцы, воздвигните ныне, почитающе всемудрую Екатерину: сия бо в тризнищи Христа проповеда, и змия попра, риторов разумы укротивши.

 

Икос

От Бога мудрость приимши издетства, мученице, и внешнюю добре мудрость всю извыче, познавши убо от тоя стихий движение же и творение по слову, и сия из начала словом сотворшаго, Тому благодарение в нощи и во дни приношаше, идолы низложивши и сим несмысленно служащия, риторов разумы укротивши.

 

Песнь 7

Ирмос: Божия снизхождения огнь устыдеся в Вавилоне иногда, сего ради отроцы в пещи радованною ногою, яко во цветнице ликующе, пояху: благословен еси, Боже отец наших.

Святая великомученице Екатерино, моли Бога о нас.

Мучеников хвала, благочестия учительница была еси, светлому твоему Жениху мучеников множество приведши, Христу. С нимиже зовеши, всехвальная, поющи: благословен Бог отец наших.

Святая великомученице Екатерино, моли Бога о нас.

Слово твое премудрое ко спасению многи исхити от идолонеистовства, и светоносны яви мученики, велегласно с тобою взывающия: благословен Бог отец наших.

Слава: Отроковица, в след Тебе идущи, Тебе приведеся, мечем посечена, Твою подражающи страсть пречистую и Тебе, Зиждителю, вопиющи и глаголющи: благословен Бог отец наших.

И ныне: Святых Святый, в Тебе свято вселився, чистая Богородице Дево, воплощен, из Тебе раждается, за еже спасти верою зовущия: благословен Бог отец наших.

Моли Бога о нас, святая великомученице Екатерино, яко мы усердно к тебе прибегаем, скорой помощнице и молитвеннице о душах наших. (Поклон.)

 

Песнь 8

Ирмос: Седмерицею пещь халдейский мучитель благочестивым неистовно разжже, силою же лучшею спасены сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.

Святая великомученице Екатерино, моли Бога о нас.

Твоими учении царица верующи, притече ко благочестию, и крепко претерпевши болезней чувство, и Царствия Небеснаго явственно сподобися, вопиющи Владыце: священницы, благословите, людие, превозносите во вся веки.

Святая великомученице Екатерино, моли Бога о нас.

С мученики да будут верных прошения, страстотерпица бо Христу предстоит, просящи лучшая и спасения ходатайственная, всесвятую и честную ея память усердно совершающим, и верно песнопоющим: людие, превозносите Христа во веки.

Святая великомученице Екатерино, моли Бога о нас.

Отверз приемлет тя Жених, всемудрая, двери райския, и в чертозе всесветлем обитати сотвори, Царствия причастницу, яко сообщницу страстей являет. Емуже ныне предстоящи, Царева дщи, светло украшена, нас не забуди.

Слава: Ухищренными глаголы искушаше мучитель, и уветливословно, лютый, льстя, разслабити твою крепость надеявся, славная. Но уневеститися Христу хотящи, вопияла еси Владыце: священницы, воспойте, людие, превозносите Христа во веки.

И ныне: Священнейши была еси, Богородице Всенепорочная, премирнаго Ангелов чина: сих бо родила еси Содетеля и Господа от девственныя и неискусобрачныя утробы, во двух существах неслиянно и невращно, во единой же ипостаси Бога воплощенна.

Моли Бога о нас, святая великомученице Екатерино, яко мы усердно к тебе прибегаем, скорой помощнице и молитвеннице о душах наших. (Поклон.)

 

Песнь 9

Ирмос: Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейшее небес. Тем Тя, Богородицу, Ангелов и человек чиноначалия величают.

Святая великомученице Екатерино, моли Бога о нас.

Преставилася еси к чертогам световидным, невестными украшена утварми, девственную имущи свещу в твоей деснице, в другой же держащи отсеченную твою главу. И ныне, предстоящи Христу, твоему Жениху, тя поющия сохрани.

Святая великомученице Екатерино, моли Бога о нас.

Приятна бысть твоя, богомудрая, молитва, верою бо твое именующия имя, честная, спасает Владыка от искушений и благоздравие подает, недугов избавляя всеразличных, душевных же и телесных. Тем тя, веселящеся Екатерино, ублажаем.

Святая великомученице Екатерино, моли Бога о нас.

Пристала еси тихому пристанищу ныне благоприятно же и легко море мирское, мученице, преплывши треволнений; не искусившися, всемудрая, богатство многоразличное Христу приносящи, дево, множество мученик, Екатерино всеблаженная.

Слава: В чертозех небесных ныне внутрь с девственных лики ликовствующи, мученическими озаряема лучами, Екатерино всемудрая, разреши падений моих пленицы, усердно молящи всех Благодетеля, за Егоже кровь твою излияла еси.

И ныне: Явилася еси, о Дево Мати Божия, паче естества рождши в телеси благое Слово, Егоже от сердца Своего Отец отрыгне прежде всех веков, яко благ, Егоже ныне и телес превышша разумеваем, аще и в тело облечеся.

Моли Бога о нас, святая великомученице Екатерино, яко мы усердно к тебе прибегаем, скорой помощнице и молитвеннице о душах наших. (Поклон.)

 

Молитва

О святая Екатерино, дево и мученице, истинная Христова невесто! Молим тя, яко нарочитую благодать, еюже предвари тя Жених твой, сладчайший Иисус, приимшую: якоже посрамивши прельщения мучителя мудростию твоею, пятьдесят витий победила еси и, напоивши их небесным учением, к свету истинныя веры наставила еси, тако испроси и нам оную Божию мудрость, да и мы, вся козни адскаго мучителя расторгше, мира же и плоти соблазны презревше, достойни явимся божественныя славы, и к разширению святыя нашея Православныя веры сосуди достойни соделаемся, и с тобою в небесней скинии Господа и Владыку нашего Иисуса Христа, со Отцем и Святым Духом, восхвалим и прославим во вся веки веков. Аминь.

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
реклама