Познаем мир вместе
новые СТАТЬИ сайта
популярные бренды одежды из Беларуси

Канон святому преподобному Антонию Печерскому

Икона преподобного Антония Печерского

 

Молитва преподобному Антонию, Печерскому чудотворцу

 

Память празднуем 10 (23) июля

 

Тропарь, глас 4-й

От мирскаго мятежа изшед, отвержением же мира евангельски Христу последовал еси и, равноангельное житие пожив, в тихое пристанище Святыя Горы Афона достигл еси, отонудуже благословением отцев в гору Киева пришед и тамо трудолюбно жизнь совершив, отечество твое просветил еси и, множеству монашествующих стезю, ведущую к Небесному Царствию, показав, Христу сия привел еси, Егоже моли, Антоние преподобне, да спасет души наша.

 

Канон, глас 4-й

 

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Припев: Преподобне отче наш Антоние, моли Бога о нас.

Зельным воздержанием, и труды, отче Антоние, и всенощным стоянием душу твою царя над страстьми телесными поставил еси. Темже, со святыми веселящеся, Христу поем, тебе такову победу на страсти даровавшего.

Преподобне отче наш Антоние, моли Бога о нас.

Приспе днесь всечестный день успения твоего, отче Антоние, богатно веселя чада твоя, всечестне. Темже, поминающе твое древнее житие и ангельскую жизнь, светло празднующе, тебе воспеваем, отче.

Слава: От темных мест восхитився, к превышним светлостем преславно прешел еси, преподобне, и тамо со святыми, яко победитель страстей, отче, венчался еси.

И ныне: Люте погружаемую душу мою в пучине страстей бурею безмерных обстояний, спасения простерши ми руку, возведи, Владычице, из глубины зол моих.

 

Песнь 3

Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.

Преподобне отче наш Антоние, моли Бога о нас.

Проповедует преславно и паче трубы вопиет священная твоя, отче, великая Лавра, яже тобою начало приемшая, дом же Божия Матере, аще и не гласом, вещьми же хвалится, глаголя: утвердихся Тобою, Господи.

Преподобне отче наш Антоние, моли Бога о нас.

Единаго Господа возлюбил еси и, Сего Крест на рамо взем, преподобне Антоние, страннолепно пожил еси, в постех, и бдениих, и молитвах образ быв твоим учеником. Темже и от Христа прославился еси.

Слава: Плотскаго желания, преподобне, отвергся, гордость возненавидел еси, смирением же и нищетою обогатився, превысокая достигл еси святых жилища.

И ныне: Помилуй, едина Богомати, помилуй и ущедри душу мою окаянную, потопляемую бесы и страстьми лукавыми, и прежде времене исхода моего сию очистити умилосердися.

Господи, помилуй (трижды).

 

Седален, глас 4-й

Удивися твой духовный настоятель, в тебе велико воздержание зря, и внимаше мыслию хотящая о тебе напоследок быти, Антоние, виде бо по Бозе твое великое житие и вражиими прилоги никакоже поколебима. Темже и свидетельствует, яко отец и хранитель твоего жития, отцем Святыя Горы вопияше: сей, иже посреде нас видится меньший, но последи в России великий светильник будет.

Слава, и ныне: Удивися Иосиф, еже паче естества зря, и внимаше мыслию, иже на руно дождь, в безсеменнем зачатии Твоем, Богородице, купину, огнем неопалимую, жезл Ааронов прозябший и, свидетельствуя, обручник Твой и хранитель священником взываше: Дева раждает, и по рождестве паки Дева пребывает.

 

Песнь 4

Ирмос: Неизследный Божий Совет, яже от Девы воплощения Тебе, Вышняго, пророк Аввакум усмотряя, зовяше: слава силе Твоей, Господи.

Преподобне отче наш Антоние, моли Бога о нас.

Место, в немже лежит честное и священное тело твое, преподобне Антоние отче, многа исцеления оттуду приемлют вернии Христу от души вопиюще: слава силе Твоей, Господи.

Преподобне отче наш Антоние, моли Бога о нас.

Не устраши тебе, преподобне, долгота жестокаго пути, ниже тамо разбойническое нашествие. Темже Святую Гору дошед, с сущими тамо отцы воспевал еси: слава силе Твоей, Господи.

Слава: Видев Всеблагий Бог твердое твое и доброе изволение, тамо во святых местех посреде отец, славна тя сотворяет, с нимиже сподоби взывати: слава силе Твоей, Господи.

И ныне: Корень из чресл Тя царских, всех Царь, яко сушу, вожделев и вышшу Херувим и Серафим соделав, Богородице, вселися в Тя.

 

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Преподобне отче наш Антоние, моли Бога о нас.

Монашествующих образ, отче, и наказатель был еси, темже и сильным запрещаеши на восхищение не желати, но паче маломощныя миловати. И от сего прославился еси, Антоние, и велик наречен учитель явился еси.

Преподобне отче наш Антоние, моли Бога о нас.

Вышше человека, Антоние, стяжал еси житие, равноангельно пожив на земли, темже равну яже Ангелом почесть сподобился еси получити и поеши с ними Владыку твоего.

Слава: Богодарованная твоя благодати, отче Антоние, всяк слух человеческий удивиша и научиша, яже зде мнящаяся великая, яко мала и худа, презрети вся и последовати стопам твоим, отонудуже моли, преподобне, спастися нам.

И ныне: Упование еси мое, Пречистая, и спасение, и похвала. Темже прибегаю к покрову Твоему: не гнушася мене, грехи многими, и болезньми, и скорбьми ныне поглощеннаго, но, предваривши, спаси мя.

 

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Преподобне отче наш Антоние, моли Бога о нас.

Всегдашним к Богу рачением вне плоти и мира, отче Антоние был еси. Темже и жилище достойно Духа Пресвятаго показался еси, якоже и Сам Христос рече: пришед со Отцем и Духом, тамо вселюся.

Преподобне отче наш Антоние, моли Бога о нас.

Яко пресладкий некий виноград, Святая Гора тебе, отче, израстивши, преславно тобою красуется и, радующися, Христа прославляет, Тебе сим даровавшего.

Слава: Нощь, яко день, и день, яко нощь, тебе вменяшеся, Антоние: не дал бо еси, по пророку, сна очима твоима, ни веждома дремания, ниже покоя телеси твоему, дондеже сие чисто с душею Богу представил еси.

И ныне: Твою подаждь ми помощь и избави мя бед, и скорбей, и прегрешений моих, яже всех рождшая присное Избавление.

Господи, помилуй (трижды).

 

Кондак, глас 8-й

Возложив себе Богу, паче всех возлюбленному от юности, преподобне, Тому от всея души любовию последовал еси, мира же тленная нивочтоже вменив, в земли пещеру соделал еси и, в ней добре противу невидимаго врага козней подвизався, яко светозарное солнце, во вся концы земли возсиял еси, отонудуже, веселяся, прешел еси к Небесным чертогом. И ныне со Ангелы Владычню престолу предстоя, поминай нас, чтущих память твою, да зовем ти: радуйся, Антоние, отче наш.

 

Икос

Присносущнаго немерцающаго света Святыя Троицы насладитися желая и сего ради четыредесятолетное время в единой пещере темне тебе затворив, оттуду неисходен, отче, пребыл еси, дондеже тело твое чисто с душею Богу представил еси. Отонудуже и по преставлении, яко жив, от Господа дарования чудес приял еси, исцеляти различныя болезни зле страждущих и бесы от человек приходящих изгонити. Темже молим тя: молися, отче, сохранити без вреда отечество твое, град же и люди, да зовем ти: радуйся, Антоние, отче наш.

 

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Преподобне отче наш Антоние, моли Бога о нас.

Повелением духовнаго твоего настоятеля, блаженне Антоние, паки ко отечеству твоему посылаемь бываеши. Темже реченная тебе отцем, яко от Бога повеленная, сотворил еси, идеже пришед, отче, многих душ Господу привел еси.

Преподобне отче наш Антоние, моли Бога о нас.

Святейшаго места, преподобне Антоние, яко достигл, многих житием твоим удивил еси: выше бо человека восприем житие, имже многих мирская презирати сотворил еси.

Слава: Святителя Илариона пещеру яко обрет, трудолюбне в ней пожил еси, преподобне, в молитвах и пощениих, дондеже иную пещеру себе соделал еси, в нейже сподобился еси горняго звания.

И ныне: Человеческия напасти и советы, Чистая, разори Божественными молитвами Твоими и рабы Твоя избави болезненных прегрешений, яко да Приснодеву Тя ублажаем.

 

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Преподобне отче наш Антоние, моли Бога о нас.

Владыки твоего Христа, преподобне Антоние, смирению поревновал еси и сего ради смиренное и жестокое житие возлюбил еси, земнаго пристрастия отреваяся. Темже почести святых сподобился еси и с ними поеши Господа во веки.

Преподобне отче наш Антоние, моли Бога о нас.

Твое преславное успение празднующим, блаженне, молися избавитися всем от различных напастей, да вси тебе прославляем, Антоние, и превозносим Господа во веки.

Слава: О нас милостивно око, Антоние, простирай ко Владыце, чадолюбное показуя, и неотлучно от нас духом пребывай, преподобне, якоже обещался еси, егда был еси с нами, да вси с тобою Христу воспоем: благословите, вся дела Господня, Господа.

И ныне: На моление мое умилосердися ныне и радость ми в печали место даруй да пою Тя, Владычице, Сыну Твоему воспевая: Господа пойте, дела, и превозносите Его во веки.

 

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Преподобне отче наш Антоние, моли Бога о нас.

Антония, древле просиявшаго, того житию всячески поревновати потщался еси: он бо в пустыню един вселися, ты же в пещере единаго себе затворил еси и многими леты, отче, неисходен пребыл еси.

Преподобне отче наш Антоние, моли Бога о нас.

Печерскому житию первоначальник и наставник, отче, был еси и тамо подвизался еси, яко безплотен. Темже и Христос дарованием чудес обогати тя, преподобне.

Слава: Моею руку воздеяние приими, преподобне, Владычней подобяся благости, презирая прегрешения: ты бо душу уязвил еси Христовою любовию и Его Пречистыя Богоматере, Юже умоли спасти души наша.

И ныне: Рукою твоею, преподобне Антоние, еже к Богу воздеянием, преславно чудодействовася: молитвами бо твоими огнь с Небесе сводиши, во очищение места храма Пречистыя, Юже вси с тобою величаем.

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
популярные бренды одежды из Беларуси