Акафист святому преподобному Антонию Римлянину
Ветхий Рим, отечество твое, оставив, на камень, яко на легкий корабль, возшел еси и на нем паче естества, аки безплотен, по водам шествовал еси, промышлением Божественнаго разума направляемь, Великаго Новаграда достигл еси и, обитель в нем сотворив, тело твое в ней предложил еси, яко дар освящен. Тем молим тя, отче Антоние: моли Христа Бога, да спасет души наша.
Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.
Припев: Преподобне отче наш Антоние, моли Бога о нас.
Агнче незлобивый, отверзи ми устне недостойнии, язык мой уясни, и сердце мое просвети, и ум мой озари светом Твоего Богоразумия, да возмогу воспевати память преподобнаго Антония, егоже на земли удивил еси.
Преподобне отче наш Антоние, моли Бога о нас.
Многим милосердием и щедротами, Содетелю твари и веков Творче, молебное пение приими, и прощение наших согрешений даруй Твоего угодника преподобнаго Антония молением, и тишину сердцу моему.
Слава: Светлое и богоугодное житие твое, яко свет, воистинну на земли показася, Божественную бо видети светлость, Антоние, сподобился еси. Темже и, видимая вся оставив, Непостижимаго зрети сподобился еси.
И ныне: Моих прегрешений, Владычице, пленицу расторгни, Твоего Сына и Господа молящи, и томящий мя грех, Приснодево, низложи, яко да воспеваю Тя всегда, Всенепорочная, Тобою спасаемь.
Ирмос: На камени мя веры утвердив, разширил еси уста моя на враги моя, возвесели бо ся дух мой, внегда пети: несть свят, якоже Бог наш, и несть праведен, паче Тебе, Господи.
Преподобне отче наш Антоние, моли Бога о нас.
Жезлом добродетелей страстное море пресек и гордаго врага, якоже другаго фараона, молитвою твоею погрузив, избранное твое стадо новаго Израиля невредно соблюди, Антоние преподобне.
Преподобне отче наш Антоние, моли Бога о нас.
Возлюбил еси, блаженне, всенощное бдение, и молитву непрестанну, и любовь нелицемерну, сими очищая ум твой, душу же просвещая, тело твое смирял еси и ко дневным трудом благопокорно устроил еси.
Слава: Храм тя, вси вернии, Духа Пресвятаго вемы, храм боголепен Божии Матери воздвигл еси, и ограду велию устроил еси, и монахов множества совокупил еси, в немже ныне всяк недуг молитвами твоими отгоняется.
И ныне: Во иных женах мати, дондеже дева, не познася, ни мати по Рождестве девствовати сподобися, на Тебе же, Девомати, обоя устроишася. Тем веселием духа воспеваю: несть непорочны, паче Тебе, Владычице.
Господи, помилуй (трижды).
Ангельски на земли пожив, Богомудре Антоние, ликом постническим счислился еси: Крест бо на рамена твоя взем, последовал еси Владыце Христу, и страсти душетленныя воздержанием, преподобне, увядил еси, и был еси духовно приятелище и сосуд чист Господеви. Темже вопием ти: моли Христа Бога грехов оставление даровати празднующим любовию пречестную и святую память твою.
Слава, и ныне: Яко Всенепорочная Невеста Творцу яко Неискусобрачная Мати Избавителя, приятелище яко сущи Утешителя, Препетая, беззаконию мя суща скверное обителище и бесом игралище в разуме бывша, потщися от тех злодейства мя избавити и светлое жилище добродетелей соверши, Светоносная Нетленная, отжени облак страстей и вышняго причастия сподоби и света невечерняго молитвами Твоими.
Ирмос: Пришел еси от Девы не ходатай, ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи.
Преподобне отче наш Антоние, моли Бога о нас.
Умертвив себе мирови, жизнь равноангельну на земли пожил еси, преславне, и, яко дар освящен, Владыце, Антоние, твою душу чисту представил еси, и Божественнаго Царствия достойно, отче, получил еси.
Преподобне отче наш Антоние, моли Бога о нас.
Ветрилом, отче, воздержания окриляемь, страстныя тьмы отбежав и к безстрастия путем наставляемь, к Свету невечернему востекл еси и, от Сего озарився, нетления богатство наследовал еси, Антоние преподобне.
Слава: Великий Новград ныне веселием, отче, красуется, имея мощи твоя в себе, преподобне Антоние, ученицы же твои, твоему житию ревнующе, о твоей памяти радующеся, Господеви поют: слава силе Твоей, Господи.
И ныне: Истинную Тя сень свидетельствоваша многоразличными образы, яве показующе воплощеннаго из Тебе Единаго от Троицы, Пречистая, неизменно, Богомати Чистая, и мир обновльша.
Ирмос: Света Подателю и веков Творче, Господи, во свете Твоих повелений настави нас: разве бо Тебе, иного Бога не знаем.
Преподобне отче наш Антоние, моли Бога о нас.
Возшед на высоту добродетелей, долу влекущая страсти оплевал еси, сладость показуя спасения, отче преподобне Антоние, стаду твоему проси грехов прощения.
Преподобне отче наш Антоние, моли Бога о нас.
Место прошения, отче, со тщанием исполняя, храм боголепен Божия Матере воздвигл еси, в немже ныне праздничною радостию монахов множества веселится, память твою прославляюще.
Слава: Не забуди стада твоего, еже, мудре, собрал еси и в жизни сей упасл еси благочестно, и ныне потщися, отче наш Антоние, да привлечеши во ограду Небесную.
И ныне: Управи ум мой, Владычице, труждающийся в пучине скорбей и потопляемый нашествием тлетворных страстей. Спаси к Тебе прибегающаго, иныя бо помощи, Чистая, разве Тебе, не знаем.
Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.
Преподобне отче наш Антоние, моли Бога о нас.
От земных к Небесным обителем преславно возшел еси, Богомудре Антоние, и тамо зрети неизреченных сподобился еси, ихже око не виде, и ухо не слыша, и на сердце человеку не взыде, яже уготова Бог любящим Его.
Преподобне отче наш Антоние, моли Бога о нас.
Дремания очима твоима отнюд не дал еси, к Богу все твое желание вперив и Тому невозвратно от души последовав, нощь жития непреткновенно преминул еси, видении Божественными окормляемь, блаженне Антоние, в Божественную жизнь вселился еси.
Слава: Великаго святителя Никиты, блаженне Антоние, благословения сподобився духовнаго наказания поучение от него восприял еси, бурею бо греха не погрузился еси, и в тихо пристанище достигл еси Небеснаго Царствия, и тамо ныне наслаждаешися Божественнаго видения.
И ныне: Обетшавшия ны горьким древа прежде вкушением и падшияся поползением, Пречистая, обновила еси, Зиждителя рождши, Слово Ипостасное, Дево Мати Владычице.
Господи, помилуй (трижды). Слава, и ныне:
Римское воспитание, Великому же Новуграду благодатное процветение, многими бо труды и подвиги в нем Богу угодил еси. Сего ради чудес дарований от Него сподобился еси, и тело твое многими леты соблюде нетленно. Мы же, сие лобызающе, радостно от души вопием ти: радуйся, отче Антоние.
Како возмогу исчести премногая твоя чудеса? Или како изрещи жестокое твое житие? Не имам бо сердца чиста, яко сие срамными деяньми оскверних и душу мою лукавыми помыслы осмрадих. Но обаче дерзаю воспевати, аще ты ми подаси слово; недостойному твоему рабу, ты бо земный Ангел и Небесный человек во плоти обрелся еси, преподобне. На земли бо о тленных небрегл еси и Христу от души последовал еси болезньми, и труды, и зельным воздержанием, и злостраданием, и на земли леганием. Постом, и бдением, и молитвами образ был еси твоим учеником и сего ради сосуд чист и обитель Духа Пресвятаго явился еси. Тем тя чтим, радуйся, отче Антоние.
Ирмос: Образу златому, на поле Деире служиму, трие Твоя отроцы небрегоша безбожнаго веления, посреде же огня ввержени, орошаеми, пояху: благословен еси, Боже отец наших.
Преподобне отче наш Антоние, моли Бога о нас.
От града и отечества твоего пресельник был еси, к Богу руце простирая, спасение обрет; водам же послужившим тебе Божиим мановением, Великаго Новаграда достигл еси, идеже бяше угодно Владыце. Емуже ныне радостно поеши: благословен Бог отец наших.
Преподобне отче наш Антоние, моли Бога о нас.
Великаго Новаграда архиерея, и христолюбивых людей, и монахов множества радости исполнил еси и духовнаго веселия твоим дивным и чрезъестественным прехождением: на камени бо, яко на корабли, пришел еси, Спутника, отче, Христа обрет. К Немуже ныне радостно зовеши: благословен Бог отец наших.
Слава: Ликуют собрания монашествующих и веселится народов множества Великаго Новаграда в честнем преставлении Антония всеблаженнаго, молебный совершающе праздник, радостно от души вопиют: благословен Бог отец наших.
И ныне: Пещь прообразоваше Твое рождество, Всенепорочная: отроки бо не опали, якоже ложесна Твоя, огнь непостоянный. Темже молим Тя: огня вечнаго избави paбы Твоя.
Ирмос: В пещь огненную ко отроком еврейским снизшедшаго и пламень в росу преложшаго Бога, пойте, дела, яко Господа, и превозносите во вся веки.
Преподобне отче наш Антоние, моли Бога о нас.
Авраамский стяжав нрав, премудре, от страны Римския пресельник был еси Великаго Новаграда и тамо Бога узрел еси, обещавающа тебе воздаяние богатно. Тем, веселяся, усердно Христу вопиеши: благословите, вся дела, Господа и превозносите Его во веки.
Преподобне отче наш Антоние, моли Бога о нас.
На земли пожив, яко Ангел, с плотию, яко безплотен, безплотныя враги под ноги покорил еси, чистоту стяжал еси постом, и бдением, и молитвами. Темже со Ангелы на Небесех светло ликуя, Христу вопиеши: благословите, вся дела, Господа и превозносите Его во веки.
Слава: Рим отечество твое проповедует, преподобне, Великий же Новград хвалится тобою, прием от Господа сокровище некрадомое: помощника бо великаго, блаженне Антоние, тя восприем, с лики монашескими ныне веселится. Темже, память твою празднующе, радостно вопием: благословите, вся дела, Господа и превозносите Его во веки.
И ныне: Великому таинству Рождества Твоего кто не удивится, Богородице? Или кий язык земным или ум безплотных изрещи возможет? Паче бо естества и смысла, Богородице, Зиждителя родила еси.
Ирмос: От Бога Бога Слова, неизреченною мудростию пришедшаго обновити Адама, ядию в тление падшаго люте, от Святыя Девы неизреченно воплотившагося нас ради, вернии, единомудренно песньми величаем.
Преподобне отче наш Антоние, моли Бога о нас.
Всегда к раце мощей твоих приступающе, любезно целуем и от души вопием: отче преподобне Антоние, молися прилежно Христу Богу за град и люди, скорбь нашу на радость пременити и грехов прощение испросити, да тя непрестанно величаем.
Преподобне отче наш Антоние, моли Бога о нас.
Великому Антонию тезоименит был еси, блаженне Антоние, и того житию подражал еси, равноангельно во обители Пресвятыя Богородицы пожил еси, темже и равну почесть от Бога сподобился еси прияти, с нимже ныне на Небесех веселишися. И нас поминай, празднующих память твою, да тя непрестанно величаем.
Слава: Ныне на тебе чудо велие видится и ужаса исполнено: како погребено воистинну много лет соблюдеся невредимо, преподобне Антоние, твое многотрудное тело, во гробе лежащее Божиим мановением? Якоже Сам весть, славящия Его прославляет.
И ныне: Исцелила еси сокрушение, Всенепорочная, и ветхое страдание земных, Бога рождши, Царя Христа, понесшаго плотию недуги наша. Темже Тя, вси роди, Дево Владычице, ублажающе, Богоневесто, величаем.
 |
Вам понравилась статья? Тогда подпишитесь на обновления, чтобы не пропускать свежие материалы и сразу же их получать на электронную почту! |
.jpg){kind=icon}