Познаем мир вместе
новые СТАТЬИ сайта
популярные бренды одежды из Беларуси

Канон святому преподобному Феодосию, игумену Печерскому, чудотворцу

 

Молитвы преподобному Феодосию, игумену Печерскому, чудотворцу

 

Память празднуем 3 (16) мая

 

 

Тропарь, глас 8-й

Возвысився на добродетель, измлада возлюбив монашеское житие, к желанию доблественне достиг, вселился еси в пещеру и, украсив житие твое пощением и светлостию, в молитвах, яко безплотен, пребывал еси, в Российской земли, яко светлое светило, просияв, отче Феодосие, моли Христа Бога спастися душам нашим.

 

 

 

 

Канон, глас 8-й

 

Песнь 1

Ирмос: Колесницегонителя фараоня погрузи чудотворяй иногда Моисейский жезл, крестообразно поразив и разделив море, Израиля же беглеца, пешеходца спасе, песнь Богови воспевающа.

Припев: Преподобне отче наш Феодосие, моли Бога о нас.

Богоугодный подвиг стяжав, отче Феодосие, Боговидец явился еси. Темже молися Богу, Емуже угодил еси, отгнати мрак неведения моего, слово же блаженное вдохнути, воспети тя.

Преподобне отче наш Феодосие, моли Бога о нас.

От матерня чрева прилепился еси Богу, преподобне, яко премудрый Павел и пророк же древле Иеремия. Темже тя Божественная благодать устнами, Феодосие, Божия слугу нарече.

Слава: Спасителя заповеди послушав от юности, мудре, жизнь сию нивочтоже положив, крест желая носити на раменах твоих, вся земная возненавидел еси, на небесная взирая, Феодосие.

И ныне: Воплощься от пречистых Твоих ложесн, Дево Пресвятая, Божие Слово всем просвети Богоразумия любовь и человеков торжество лику Ангельскому сподоби, на Небесная возведе.

 

Песнь 3

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.

Преподобне отче наш Феодосие, моли Бога о нас.

Нетленными дары и духовными, святе, Божественная твоя и блаженная обогащена душа, видети возжелел еси гроб Господень, но свыше был еси возбранен Божиим смотрением.

Преподобне отче наш Феодосие, моли Бога о нас.

Жертва совершенна, истинна и непорочна восхотев быти Агнца, вземлющаго, блаженне, пречистою кровию грехи всего мира, безкровную жертву приносил еси Ему.

Слава: Уставов ты стяжатель от версты юностныя, отче, быв и самодержец ума, мирския пучины избежав, наставление приял еси от Божественнаго Духа.

И ныне: Радуйся, рождшая Едина всех Господа: радуйся, человеком радость провозвестивши; радуйся, скиние и несекомая горо, верных утверждение, Едина Препетая.

Господи, помилуй (трижды).

 

Седален, глас 4-й

Паче ума человеча явился еси, преподобне, на земли, Божий сад священный, посреде дому Господня стоя, подаеши плод болезней твоих учеником твоим: от уст бо твоих благодать Духа возрастил еси, образ быв подвигов и устав любящих Господа. Егоже ныне молити не престай спастися поющим тя.

Слава, и ныне: Возгремев Христово Божественное воплощение, безплотныя враги до конца обличил еси, чудне Феодосие, сего ради вси, вернии, благочестно вопием ти: моли непрестанно о всех нас.

 

Песнь 4

Ирмос: Ты Моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче.

Преподобне отче наш Феодосие, моли Бога о нас.

Благодать Духа возрасте в тебе, отче, егда рождшую тя видел еси, плачущуся и рыдающу крепце, тя, предстояв струями слезы точащей, непоколебим столп и неподвижим пребыл еси.

Преподобне отче наш Феодосие, моли Бога о нас.

Лютыми человеки враг вселукавый тщашеся отторгнути тебе, Феодосие, от гнезда преукрашенна, желаема тобою, но ты сего нивочтоже вменил еси, полки сего отгоня молитвами твоими и поя: силе Твоей слава, Человеколюбче.

Слава: Окропляя себе дождем духовным, и животным источником напояяся, и языком наставника Антония, клас Божественный прозябл еси и питаеши множества, неистощимая воистинну Иосифова житница быв.

И ныне: Кто изрещи достойно возможет чудес Твоих, Чистая, глубину? Тобою бо весь мир, хвалу Ти принося, помилован будет и избавляется от бед лютых и различных зол, враг же и напастей.

 

Песнь 5

Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма, окаяннаго, но обрати мя и к свету заповедей Твоих пути моя направи, молюся.

Преподобне отче наш Феодосие, моли Бога о нас.

Добродетельными подвиги возсия исправление твое, отче: жилище бо, бывшее древле худо, пространно сотворил еси, многи привед поклонники Богу, подающему сим всяк довол твоими молитвами.

Преподобне отче наш Феодосие, моли Бога о нас.

Светлыми зарями подвигов твоих отгонимо бываше множество бесов от твоего жилища, сшествоваше бо ти всех Творца благодать Духа и славна тя яви, Феодосие.

Слава: Спаса Щедраго посреде церкве воспел еси, темже щедроты Своя богатыя посла тебе, оскудения разрешая печаль, приснотекущия же дары источая стаду твоему.

И ныне: Превышши бысть Вышних Сил, Богоблагодатная, заченшая Слово, всяческая словом сотворшее, и рождшая от Отца прежде век неизреченно рождшееся.

 

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Преподобне отче наш Феодосие, моли Бога о нас.

Молитвами, и бдением, и псаломскими пении непрестанно твою душу рай Божественный сотворил еси, живоносное возрастив древо честное яве, Спаса и Господа.

Преподобне отче наш Феодосие, моли Бога о нас.

Изволил еси тайное смирение, Владычне нищете подобяся, блаженне: волею твоею путь шествуя, повелением лениваго раба везти воз к Божественному месту приял еси, идеже покланяемь от сретающих познался еси.

Слава: Подобяся ноги Умывшему Своим учеником, Богомудре, воду черпати и на раму носити изволил еси и древа своима рукама принося и сеча начальника трудов себе монахом показал еси.

И ныне: Умерщвлен бысть, Богородице, Тобою многокозненный враг, всю тварь прежде тлею погубивый, мертвии же Тобою к жизни взыдохом, ибо родила еси воистинну жизнь всех, Господа.

Господи, помилуй (трижды). Слава, и ныне:

 

Кондак, глас 3-й

Звезду Российскую днесь почтим, от востока возсиявшую и на запад пришедшую, всю бо страну сию чудесы и добротою обогатившу и вся ны содеянием и благодатию монашескаго устава, блаженнаго Феодосия.

 

Икос

Кто изрещи возможет подвиги твоя, отче? Или кто изочтет множества трудов твоих и чудес дивных? Еще бо в плоти сый, Безплотнаго видел еси, в плотяне образе беседующа к тебе и дар приносяща тебе, Богом посланное злато. Паче человека ты явился еси смирением и кротким нравом и духовныя мудрости исполнен. Тем, Духа в себе прием, во свете виден был еси, яко солнце, сияя. И мене, тебе поюща, просвети сиянием твоим, преподобне, монашескаго устава, Божественный Феодосие.

 

Песнь 7

Ирмос: От Иудеи дошедше, отроцы в Вавилоне иногда верою Троическою пламень пещный попраша, поюще: отцев Боже, благословен еси.

Преподобне отче наш Феодосие, моли Бога о нас.

К молитвам твоим, блаженне, всяк прибегая верою, никогда постыдится: прием благодать прошения, отче, и возвратився, ликует, поя: благословен Бог отец наших.

Преподобне отче наш Феодосие, моли Бога о нас.

Ты отец явився и заступник сирым, и вдовицам надежда, и болящим, отче, востание всем был еси. Темже поем: благословен Бог отец наших.

Слава: Удобрение монахом и путь спасения человеком ты был еси: обогащ бо вся твоими глаголы Божественных таин, учил еси глаголати: благословен Бог отец наших.

И ныне: Из девическия утробы воплощься, Христе, явился еси на спасение наше. Тем, Твою Матерь ведуще Богородицу, благодарственно поем: благословен Бог отец наших.

 

Песнь 8

Ирмос: Седмерицею пещь халдейский мучитель Богочестивым неистовно разжже, силою же лучшею спасены сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.

Преподобне отче наш Феодосие, моли Бога о нас.

Якоже пророк Божественный, провидя, Феодосие, являешися, преблаженне, ибо повелеваеши духом принесшему к тебе Евангельское писание изнести, и вопияше ти, исповедая чистым смыслом жертву Пречистой Богородице.

Преподобне отче наш Феодосие, моли Бога о нас.

К твоему жилищу пририща, яко елень ко источнику, приснотекущия нетленныя пищи получити благочестивый князь, иже землю сию содержай. Хотя убо свечеряти ему, блаженне, но скудением строителю вопиющу, повелением же твоим наполнися меда сосуд твой.

Слава: Твоя подвиги воспеша Ангельския Силы, Феодосие, и твое житие лик преподобных похвали, светлое и украшенное монахов радование. Тем и ныне, срадуяся Ему веселишися, поя согласно: отроцы, благословите, священницы, воспойте, людие, превозносите во вся веки.

И ныне: Тя, Пречистая Богородице, жизни моея предлагаю Хранительницу и Заступницу непобедиму, Помощница ми буди от бед и скорбей, избавляющи Твоего недостойнаго раба, любовию поюща: отроцы, благословите, священницы, воспойте, людие, превозносите Чистую во веки.

 

Песнь 9

Ирмос: Устрашися всяк слух неизреченна Божия снизхождения, яко Вышний волею сниде даже и до плоти, от Девическаго чрева быв Человек. Темже Пречистую Богородицу, вернии, величаем.

Преподобне отче наш Феодосие, моли Бога о нас.

Память твоя днесь нам, яко солнце, возсия, преподобне: радуемся, целующе раку твою, и, окрест обстояще, яко Божественный кивот, верно поем твое успение с Вышними Чинми, Феодосие.

Преподобне отче наш Феодосие, моли Бога о нас.

Радуйся, земле Росская, приемши сокровище некрадомо от Господа, помощника велика Богоблаженнаго и заступника тепла Феодосия, и с ликом постническим веселися и ты, начало граде Росский.

Преподобне отче наш Феодосие, моли Бога о нас.

Собрася торжество ныне в памяти твоей воспевати Господа, тебе подавша добрыя подвиги, яже ты претерпел еси. Темже молися Ему, святе, избавитися стаду твоему от соблазн вражиих, еже ты стяжал еси, мудре, молитвами твоими.

Слава: Спаси мя, едине Избавителю, блудницы и блуднаго приемый теплое покаяние и мытарево, Спасе, воздыхание, и буди милостив, Христе, мне, блудному, молитвами Твоего угодника, отгоняя грехов моих множество.

И ныне: Пощади мя, Спасе рождейся, сохранив рождшую Тя без тли по рождестве, егда сядеши судити дела моя, грехи моя презрев и беззакония, Безгрешен сый и Милостив, яко Человеколюбец. 

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
популярные бренды одежды из Беларуси