Познаем мир вместе
новые СТАТЬИ сайта

Канон святому преподобному Герману Аляскинскому

Икона преподобного Германа Аляскинского

 

Молитва преподобному Герману Аляскинскому

 

Память празднуем 27 июля
(9 августа)

 

Тропарь, глас 4-й

Лозу Православия принесл еси в Америку из России благочестивыя и, удобрив корень постническими трудами и напоив обильне молитвенными слезами, плоды принесл еси – виноград возлюбленный, Германе преблаженне отче наш. Темже и Бог тя прослави, яко апостола преподобнаго, нетлением мощей и благодатию чудес, от них же почерпающе благодеяния, восхваляем тя: слава Давшему ти крепость, слава Венчавшему тя, слава Даровавшему тя Америце светило Православия.

 

Иной Тропарь, глас 3-й

Преподобне отче наш Германе, первый светильниче, в земли нашей просиявый, приносим вси тебе похвалы сия, ты же, яко имеяй дерзновение ко Господу, буди заступник нам, и утешитель, и Церкви нашея покровитель дивный, да вси со умилением зовем ти: радуйся, отче наш Германе, Аляски и всея Америки преславный чудотворче.

 

Канон, глас 4-й

 

Песнь 1

Ирмос: Моря чермную пучину невлажными стопами древний пешешествовав Израиль, крестообразныма Моисеовыма рукама Амаликову силу в пустыни победил есть.

Припев: Преподобне отче наш Германе, моли Бога о нас.

Господь тя избра, якоже Моисея иногда, в вождя веры алеутом, яко да, извед я из тьмы фараонитския, введеши во свет спасительный вопиющих: Господеви поим, славно бо прославися.

Преподобне отче наш Германе, моли Бога о нас.

Египет идолослужения восплакася горце лишением народа избраннаго, иже тобою проидоша сквозе море Крещения в землю обетования Христова, вопиюще: Господеви поим, славно бо прославися.

Слава: Радовахуся Ангели о спасении чад твоих духовных, Германе преподобне, якоже Господь рече, Иже и прият я в лоно Церкве Православныя, воспевающих: Господеви поим, славно бо прославися.

И ныне: Мати Божия Благословенная, сохраняй ны, неопятненных в белой одежди Крещения и покаяния, воспевающих: Господеви поим, славно бо прославися.

 

Песнь 3

Ирмос: Веселится о Тебе Церковь Твоя, Христе, зовущи: Ты моя крепость, Господи, и прибежище, и утверждение.

Преподобне отче наш Германе, моли Бога о нас.

Алеутов просветив, спасл еси от неприязни врага, ни богатством, ни силою приобретая их, но премудростию Духа, и подвигом преподобия, и проповедию благочестия, яко несть свят, якоже Бог наш, и несть праведен, паче Господа.

Преподобне отче наш Германе, моли Бога о нас.

Не мудростию хвалился еси, но мудростию всех учил еси благочестию, любити Христа, и веровати в Него, и греха боятися, глаголя: несть свят, якоже Бог наш, и несть праведен, паче Господа.

Слава: Аще и в трудех и в страданиих подвиг твой совершил еси, но радости исполнен был еси, на сие бо едино токмо зря, яко Божие дело твориши, и яко несть свят, якоже Бог наш, и несть праведен, паче Господа.

И ныне: Родивши без семене мужняго от Троицы Единаго, Богородице Пречистая, дерзновение имаши богатно помогати всем в подвизе и страдании пребывающим и исповедающим: несть свят, якоже Бог наш, и несть праведен, паче Господа.

Господи, помилуй (трижды).

 

Седален, глас 4-й

Вознесен быв Христом в звание апостола и исполнив делом звание сие, радость имел еси со дерзновением рещи Господу: се аз и дети, яже ми дал еси жребий мой! И, прием тя во обители апостолов, венцем тя украси милости Своея, и тобою дарует благодать всем, творящим любовию честную память твою.

Слава, и ныне: Вознесену паче всех Чинов Ангельских, вемы Тя Ходатаицу пред Богом о нас, Богородице. Темже, припадающе пред образом Твоим честным, молим Тя: не отстави от нас милости Твоея, но всегда покрывай от всякаго нахождения вражия и путеводи ны ко пристанищу небурному жизни благочестивыя и спасения душам.

 

Песнь 4

Ирмос: Христос моя сила, Бог и Господь, честная Церковь Боголепно поет, взывающи, от смысла чиста, о Господе празднующи.

Преподобне отче наш Германе, моли Бога о нас.

Овцы твоя из родов волчиих воспитав, стаду Христову сопричислил еси и, доброму Пастырю Христу я вручив, мирною душею взывал еси: слава силе Твоей, Господи.

Преподобне отче наш Германе, моли Бога о нас.

Спасову добродетель, покрывшую Небеса проповедал еси во вся дни живота твоего и хвалы Его исполнил еси всю землю Алеутскую, Помощнику Богу взывая: слава силе Твоей, Господи.

Слава: Силою Бога твоего вся сотворив дивная и ужасная в животе твоем, не вознеслся еси мыслию, паче же смиряяся, взывал еси выну: слава силе Твоей, Господи.

И ныне: Имуще Тя, Мати Бога нашего, Ходатаицу за нас пред Судом Сына Твоего Божественнаго, любве и надежды исполнены есмы, взываша: слава силе Твоей, Господи.

 

Песнь 5

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.

Преподобне отче наш Германе, моли Бога о нас.

Именем Господним моляся непрестанно, нищету в богатство вменил еси и, духом богатея, якоже Павел, глаголал еси: ничтоже имея, вся содержу души человеческия в Господе.

Преподобне отче наш Германе, моли Бога о нас.

Иже тя в алеуты посла, Той тя и утешаше на всяк день поспешеством Своим, дондеже всех приобрел еси Христу и душу твою спасл еси в Господе.

Слава: Аще и един изшел еси на врага лукаваго, якоже Давид на Голиафа, но силою Креста низложил еси его падением великим и людей избавил еси в Господе.

И ныне: Можеши спасати от обстояний вражиих, Богородице, ихже хощеши, дана бо Ти есть благодать от Сына Твоего, в нихже и нас помяни, Чистая.

 

Песнь 6

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Преподобне отче наш Германе, моли Бога о нас.

Еже любити Бога непщевал еси первое коемуждо от христиан, и другим проповедал еси, и сам к сему всеми силами подвизался еси.

Преподобне отче наш Германе, моли Бога о нас.

Рукою крепкою начав дело апостольства твоего, до конца неотступно совершил еси е, дондеже всех ко Христу привел еси и венца от Христа сподобился еси.

Слава: Истину Христову глубиною души восприим, раб был еси неключим Господа твоего, вся бо повеленная исполнив, меньша всех себе смирением непщевал еси.

И ныне: Како не дивимся Богомужному Рождеству Твоему, Пречистая? Яко бо Мати безмужно низвела еси на землю Спаса нашего Иисуса Христа, в Немже спасаемся и жизнь наследствуем.

Господи, помилуй (трижды). Слава, и ныне:

 

Кондак, глас 8-й

Взбранному Воеводе своинствовався, в брань вступил еси на духа злобы в поле преподобия и апостольства. И, пожав победы обоюдныя, воздвизаеши нас вопити Тебе: радуйся, святе Германе, апостоле преподобный.

 

Икос

Несть наша брань противу крови и плоти, но к духовом злобы поднебесным, якоже рече апостол. Сего ради облек на ся всеоружие Божие в Валааме и, обувся добре в благовествование Православия, отшел еси в Америку, яко всеоружник Божий победительный. И подвигом добрым подвизався, веру Православную насадив и течение земнаго пути скончав, венец славы восприял еси от Бога по достоянию и нас воздвизаеши вопити тебе: радуйся, святе Германе, апостоле преподобный.

 

Песнь 7

Ирмос: Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси, Боже отец наших.

Преподобне отче наш Германе, моли Бога о нас.

Из России изшед благочестивыя и в Америку достиг, совершил еси дело апостольства и преподобия, оттуду же в Вечное отшед Отечество, поеши Господеви: благословен еси, Боже отец наших.

Преподобне отче наш Германе, моли Бога о нас.

Постом и молитвою влагу страстную плоти изсушив, дух возвысил еси в меру возраста Христова, во еже всем естеством пети возможеши: благословен еси, Боже отец наших.

Слава: Опасно проходя путь добродетели и не уклоняяся ни одесную, ни ошуюю, людей твоих водил еси безпорочно к Богу, и сам достигл еси Царство, идеже поеши: благословен еси, Боже отец наших.

И ныне: Христа Еммануила Мати Благословенная, предстательствы Твоими всели Дух Сына Твоего в сердца наша, яко да с нами Бога имуще, злых свободимся и пети выну возможем: благословен еси, Боже отец наших.

 

Песнь 8

Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.

Преподобне отче наш Германе, моли Бога о нас.

Вол, за любовь твою возлюбив тя и не единаго дне не стерпев смертнаго лишения твоего, сам убися в печали своей по Тебе, яко тварь сице воспевая Господеви.

Преподобне отче наш Германе, моли Бога о нас.

Ангелы имел еси смолитвенники в тайне убогия келлии твоея, иже и известиша тя о дни и часе преставления твоего и прияша тя последи в лики святых воспевати во веки Господеви.

Слава: Людей твоих возлюбив паче всего на земли и вся благая им содеяв, Небесная прежде и земная, научил еси я доброму благочестию, во еже вкупе с ними зде и тамо воспевати Господеви.

И ныне: Утробу Твою освяти Родивыйся от Тебе, Богомати, и ширшую Тя Небес сотвори благоутробием матерним, имже всех нас покрываеши от всяческих бед, Благодатная.

 

Песнь 9

Ирмос: Бога человеком невозможно видети, на Негоже не смеют Чини Ангельстии взирати. Тобою бо, Всечистая, явися человеком Слово воплощенно, Егоже величающе, с Небесными вои Тя ублажаем.

Преподобне отче наш Германе, моли Бога о нас.

Призре на смирение твое Господь, Егоже душа твоя величаше и о Немже дух твой радовашеся вся дни живота твоего на земли, и вознесе тя в Царствии Своем, яко единаго от избранных Своих.

Преподобне отче наш Германе, моли Бога о нас.

Общаго Владыку зриши ныне лицем к лицу. Не забывай убо в молитвах твоих всех, почитающих память твою, но сохраняй от лютых бед и погибели вечныя.

Слава: Юность твоя благочестива, мужество твое праведно, старость твоя свята и во веки жизнь блаженна. Моли убо спастися нам.

И ныне: Парфену Деву Тя вси ублажаем, праматернюю клятву разрушившую Рождеством Твоим и Адамово изгнание исправившую. Людей убо Твоих сохраняй змииных искушений всемогущим предстательством Твоим и введи ны в блаженство рая.

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта