Молитва преподобному чудотворцу Кириллу, игумену Белоезерскому
Акафист святому преподобному Кириллу Белоезерскому
Яко крин, в пустыни давидски процвел еси, отче Кирилле, злострастия терние искореняя, и собрал еси в ней ученик множество, страхом Божиим и учением твоим наставляемых, ихже и до конца, яко чадолюбивый отец, не оставил еси, посещая, да вси вопием: слава Давшему ти крепость, слава Венчавшему тя, слава Действующему тобою всем исцеления.
Ирмос: Яко по суху, пешешествовав Израиль по бездне стопами, гонителя фараона видя потопляема, Богу победную песнь поим, вопияше.
Припев: Преподобне отче наш Кирилле, моли Бога о нас.
Прекрасная лоза винограда Христова был еси, премудре Кирилле, и грозд пресладкий явился еси, Божественную сладость верным источаеши, блаженне, купно же и радование поющим тя.
Преподобне отче наш Кирилле, моли Бога о нас.
Отче Кирилле, не терпя враг, в начале твоего жития бурю воздвиже, древом напрасно хотя умертвити тебе, аще не бы Божественный глас возгласил тя, Богомудре.
Слава: Христа, нас ради смирившагося, подражав и крест твой взем, преподобне, Того стопам последовал еси, всяко мирское пристрастие от тебе оттрясл еси, пребогате.
И ныне: Во двою естеству Един от Святыя Троицы, от чистых кровей Твоих воплотися, боголепно пройде, яже от Адама спасая, Пречистая, благостию.
Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Преподобне отче наш Кирилле, моли Бога о нас.
Аще и в мире сущая, отче, преобидел еси, но тамо премирная и нетленная стяжал еси, идеже глас празднующих и райское наслаждение.
Преподобне отче наш Кирилле, моли Бога о нас.
Льстивый враг хотя тебе пакость сотворити, преподобне, лукавыя человеки на тя вооружает, тебе же приразився, постыдеся, Христу бо тя соблюдающу.
Слава: Уже преславное твое житие всюду, преподобне, прославляется, и чудеса твоя в концех проповедаются, темже, в память твою сошедшеся, почитаем тя.
И ныне: Плоти бренней соединился, Иже от Отца Единородный, в ложеснах Твоих, Един от двою пройде без истления и соблюде невредимо девство Твое, Всепетая.
Господи, помилуй (трижды).
Приспе праздник честнаго твоего успения, блаженне Кирилле, просвещая всех празднующих память твою светло и Христа непрестанно песньми всегда славящих.
Слава, и ныне: Иже на престоле Херувимстем седяй и в недрех Отчих водворяяся яко на престоле святем седит Своем, Владычице, в недрех Твоих; воплощен бо Бог воистинну, воцарися над всеми языки, и разумно ныне поим Ему, Егоже умоли спастися рабом Твоим.
Ирмос: Христос моя сила, Бог и Господь, Честная Церковь, Боголепно поет, взывающи, от смысла чиста о Господе празднующи.
Преподобне отче наш Кирилле, моли Бога о нас.
Отче преподобне, сна твоима очима не дал еси, ни веждома дремания, дондеже сподобился еси видети праведных селения, яже уготова Бог любящим Его (дважды).
Слава: Уже не ктому врази, ниже человецы лукавии, могут к тебе приближитися, Кирилле преподобне: видеша бо благодать Божию, тебе всегда соблюдающую.
И ныне: На Тя упование мое возложих, Мати Приснодево, спасения моего и Тя Предстательницу имею живота моего, тверду же и непоколебиму.
Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.
Преподобне отче наш Кирилле, моли Бога о нас.
Изрядно твое житие в последния роды и преславно явися, чудеса же твоя всюду верным излияшася. Темже тя вси, отче, ублажаем.
Преподобне отче наш Кирилле, моли Бога о нас.
Райския доброты желая, преподобне Кирилле, и тоя ради в слезах и воздыханиих, бдениих же и молитвах твою жизнь препроводил еси и оттуду наследил еси желаемое тебе блаженство.
Слава: Пресветлый твой праздник, отче, благочестно празднующим подавай свыше спасение и избавление, да тя вси, блаженне Кирилле, непрестанно воспеваем.
И ныне: Людем яко воистинну тихое пристанище Христос Тебе яви, верою и любовию Тя, истинную Владычицу, Всенепорочная, от совести чисты Богородицу исповедающим.
Ирмос: Ят бысть, но не удержан в персех китовых Иона: Твой бо образ нося, страдавшаго и погребению давшагося, яко от чертога, от зверя изыде. Приглашаше же кустодии: хранящии суетная и ложная, милость сию оставили есте.
Преподобне отче наш Кирилле, моли Бога о нас.
Владыку ум поставил еси над страстьми телесными, блаженне, темже и Пресвятаго Духа селение, Богоносе, был еси. Егоже моли и нас свободити от страстей, да тя почитаем.
Преподобне отче наш Кирилле, моли Бога о нас.
Яко победив века сего князя тьмы, возшел еси к Небесным, победы венец нося от вседержительныя руки Бога нашего, моли от бед спастися тебе почитающим.
Слава: Плотское мудрование, еже на земли, отче, умертвил еси и на Небесех житие стяжал еси, идеже святых дуси радуются, поюще с тобою Владыку твоего.
И ныне: Пречистая Владычице, рождшая человеком кормчию и Господа, страстей моих непостоянное и лютое отжени смущение и тишину подаждь сердцу моему.
Господи, помилуй (трижды). Слава, и ныне:
Яко преобидев тленная и долу влекущая мудрования, отче, к Вышнему течению радостно устремился еси, и тамо со святыми Пресвятей Троице предстоя, моли от враг сохранитися стаду твоему, яко да святое твое успение празднующе, вопием: радуйся, преблаженне Кирилле, отче наш.
Аще и человек, отче, был еси по естеству, но паче человека житие совершил еси: вся бо, яже в мире сладкая и красная, преобидев, последовал еси Христу. Темже и от всех слышиши: радуйся, яко, Пречистою наставляемь, пустыню достигл еси. Радуйся, яко в той пречестен храм Божии Матери воздвигнувый; радуйся, яко в нем Бог прославляется. Радуйся, собравый тамо ученик множество; радуйся, яко с теми прилежно Господеви работал еси. Радуйся, удививый Ангелы житием твоим; радуйся, яко тобою человецы пользовашася. Радуйся, яже чудесы всех удививый; радуйся, прешедый от земных на Небесная. Радуйся, яко, Троице предстоя, о нас молишися; радуйся, источниче чудес неисчерпаемый. Радуйся, верных пленник избавителю; радуйся, преблаженне Кирилле, отче наш.
Ирмос: Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси, Боже отец наших.
Преподобне отче наш Кирилле, моли Бога о нас.
Очистив от страстей, преподобне отче, ум твой, и Вседержителю с преподобных лики и праведных предстоя, всегда вопиеши: благословен Бог отец наших.
Преподобне отче наш Кирилле, моли Бога о нас.
Врач преизрядный миру явился еси, блаженне, исцеляя всех, верою притекающих ко храму твоему святому и Христу от души вопиющих непрестанно: благословен Бог отец наших.
Слава: Постом и воздержанием лице твое украсил еси, преподобне, светлейши наипаче явился еси многоразличными брашны питающихся. Темже и Христу вопиеши: благословен Бог отец наших.
И ныне: Тя, Пресвятая Мати Приснодево, познахом, земнии, спасение, ибо в недрех Отца неразлучно живый из Тебе воплощается. Темже благословена еси в род и род.
Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети, Тя превозносим во вся веки.
Преподобне отче наш Кирилле, моли Бога о нас.
Гроб, идеже положено бысть честное тело твое, преподобне, освяти всех, к нему притекающих, источник исцеления источая от души Христу вопиющим и превозносящим Его во веки.
Преподобне отче наш Кирилле, моли Бога о нас.
Во время глада, раздробляя, преподобне, нищим хлеб твой, тех алчбу уставил еси, и мене, тающаго гладом, Божественных деяний напитай: да возмогу и аз со всеми пети Господа во вся веки.
Слава: Иже с тобою ученицы твои, учению твоему повинующеся, преподобне, земная оставльше, во след тебе к Небесным преидоша и с тобою поют Христу, и превозносят Его во веки.
И ныне: В рождестве болезни избежала еси, Пречистая, и, рождши, паки Девою пребыла еси: вся бо творит Иисус, Бог и Человек, Егоже превозносим во веки.
Ирмос: Бога человеком невозможно видети, на Негоже не смеют чини Ангельстии взирати, Тобою бо, Всечистая, явися человеком Слово воплощенно, Егоже величающе, с Небесными вои Тя ублажаем.
Преподобне отче наш Кирилле, моли Бога о нас.
Жития сего непостоянную пучину немятежно прешел еси, преподобне, кормчию Матерь Божию имея, на сие наставляющую тя. Темже и ко пристанищем пристал еси Ангельскаго пребывания.
Преподобне отче наш Кирилле, моли Бога о нас.
Яко зрелая и чистейшая пшеница, кроме всех злобных плевел, в Небесных житницах соблюлся еси, преподобне, хлеб сладкий желая принестися Небесному Царю, Егоже ради вся в мире преобидел еси.
Слава: Великим отцем, древле в постех и подвизех просиявшим, подобяся, отче, вся дни жизни твоея во слезах и трудех препроводил еси, дондеже достигл еси блаженную кончину, юже и они наследоваша.
И ныне: Сына Безлетна, от Отца возсиявша, Ты, во утробе несказанно заченши, родила еси, Богомати Чистая Дево, моли непрестанно о рабех Твоих Того, яко Человеколюбца Бога, спасти род наш.
 |
Вам понравилась статья? Тогда подпишитесь на обновления, чтобы не пропускать свежие материалы и сразу же их получать на электронную почту! |
.jpg){kind=icon}