Познаем мир вместе
новые СТАТЬИ сайта
реклама

Канон святому преподобному Мартирию Зеленецкому

Икона святого преподобного Мартирия Зеленецкого

 

Молитва преподобному Мартирию, Зеленецкому чудотворцу

 

Память празднуем 11 (24) ноября и 1 (14) марта  

 

Тропарь, глас 2-й

От юности, Богоблаженне, Христа возлюбив, отечество оставил еси и, всех мирских мятежей уклонився, в тихое пристанище пречестныя обители Богоматерни достигл еси; отнюдуже уведев непроходную пустыню, крестовидною зарею показанную, желательне ю обрел еси, и, в ней вселився, иночествующих собрал еси, и сих ученьми своими, яко лествицею восходною на Небо, трудолюбно тщался еси возводити к Богу, Емуже молися, Богомудре Мартирие, даровати душам нашим велию милость.

 

Канон, глас 8-й

 

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Припев: Преподобне отче наш Мартирие, моли Бога о нас.

Благими нравы украсився, Христу прилепился еси от юности, плотския страсти умертвив воздержанием, и к Животу, преподобне, преставился еси.

Преподобне отче наш Мартирие, моли Бога о нас.

Глаголов и законов Божиих исполнитель быв, исполнился еси, отче премудре, Божественных даров и чудес всем лучи богатно испустил еси.

Преподобне отче наш Мартирие, моли Бога о нас.

Крепостию Христа возмог, державу же и силу вражию низложил еси и похвалу победныя почести, преподобне, чудесными сиянии улучил еси.

Слава: Совесть имел еси благу, око сердечное, взирающее к Богу, темже внят молитве твоей, премудре, и с преподобными сочета тя, Богоблаженне.

И ныне: Страсти плоти моея и ума моего двизания неподобная утоли, молю Тя, Пречистая Дево, и исправи мя, заблуждшаго умом.

 

Песнь 3

Ирмос: Ты еси утверждение притекающих к Тебе, Господи, Ты еси Свет омраченных, и поет Тя дух мой.

Преподобне отче наш Мартирие, моли Бога о нас.

Весь прилежа Вседержителю, преподобне отче премудре, всея бесовския злобы избегл еси досточудным водворением в непроходимая.

Преподобне отче наш Мартирие, моли Бога о нас.

Высотою смирения украшаем, свергл еси на землю велехвальнаго горделивца плоти своея Божественными веленьми и добрыми делы твоими.

Преподобне отче наш Мартирие, моли Бога о нас.

Плотию обложен, отче премудре, смирил еси надменную выю нечестиваго благими к Богу воздыханьми, непорочне.

Слава: Имея поспешествующую тебе Божию силу, премудре, яко чуден во плоти сый быв, чудеса источил еси воскресением мертваго и ныне отгониши недуги.

И ныне: В ложесна Твоя воплощаем, Всенепорочная, вселися Зиждитель на благодеяние верно поющим Тя.

Господи, помилуй (трижды).

 

Седален, глас 4-й

Страстное поработил еси плоти своея мудрование и низшее свое покорил еси высшему, отче преславне, сокрушил бо выи бесов смирением и постом, во всечестных деяниих сущи, возсиял еси в мире; темже яко луча светолитнаго сияния Христова возсия нам, днесь воспевающим тя, Мартирие преподобне.

Слава, и ныне: Поем Тя, Богоневесто, Мати Христа Бога, славяще Рождество Твое непостижимое, имже избави ны лести и коварствия вражия и от всяких бед, Владычице Богородице, и верно Тебе вопием: помилуй стадо Твое, Едина Пречистая.

 

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Преподобне отче наш Мартирие, моли Бога о нас.

Содеяв, преславне, душу твою храм Святому Духу, был еси наследник Горняго Царствия, с Вышними чинами водворяяся, всечестне отче.

Преподобне отче наш Мартирие, моли Бога о нас.

Многоболезненныя страсти всегда врачуеши приступающих к тебе тепле: благодать бо, преподобне, имаши от Господа содевати знамения и чудеса, пребогате.

Слава: Краснейшим прозябением, отче, в дому Божии прозябл еси, добродетельми украшен и плоды чудесными облагоухаем.

И ныне: Нива духовная, якоже из бразды Клас изнесла еси, всю тварь питающаго всяческих Бога, Приснодево.

 

Песнь 5

Ирмос: Утренююще, вопием Ти: Господи, спаси ны, Ты бо еси Бог наш, разве бо Тебе иного не вемы.

Преподобне отче наш Мартирие, моли Бога о нас.

Умом очищенным преславне зриши, преподобне, доброту неизреченную – Христа, всяческих Бога нашего.

Преподобне отче наш Мартирие, моли Бога о нас.

Якоже Илия на колеснице, отче, добродетельми твоими возшел еси на Небо и тамо чисте зриши Святую Троицу, к Нейже духом горя и возлетая.

Слава: Стягнув тело твое, чистотою опеленая и воздержанием покоря его духу, стропотная вся оставил еси любве ради Христа своего и Небеснаго приобретения.

И ныне: Исцели, Милосердная Мати, недугующаго ума моего душевредное омрачение и озари светом разума Христа Твоего, Всенепорочная.

 

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Преподобне отче наш Мартирие, моли Бога о нас.

Лукавый умертвися змий священными подвиги твоими, преподобне Мартирие, темже и молящимся тебе вспомоществуеши разрешитися от его злобы, блаженне.

Преподобне отче наш Мартирие, моли Бога о нас.

Отсекл еси прилежно серпом, егоже виде Захарий серповидный, страсти от души твоея, темже, приобрет премудрости семена, пожал еси многих исцелений богатныя класы.

Слава: Крепостию духа, отче, и твердостию постояннаго ума твоего возмогл державу вражию и силу его низложити от себе и тем похвалу победныя почести приял еси, преподобне, верных осиявая умы.

И ныне: Пресвятая Чистая, Творец устрои Тя в жилище Себе, Христос Бог наш, темже ходатайствы Твоими избави нас от области льстиваго, яко да по долгу Тя чтим и ублажаем.

Господи, помилуй (трижды). Слава, и ныне:

 

Кондак, глас 8-й

Отечества, преподобне, и всего мирскаго мятежа уклонитися возжелел еси, и, в пустыню вселився, тамо во блаженнем безмолвии жестокое житие показал еси, и чада послушания и смирения в нем возрастил еси. Сего ради, дерзновение стяжав ко Святей Троице, еже, молитися, Богоблаженне, о нас, чадех своих, ихже собрал еси, и о всех правоверных, да зовем ти: радуйся, отче Мартирие, безмолвия пустыннаго любителю.

 

Икос

Возлюбив, преподобне, Христовы Божественныя заповеди и возненавидев плоть и яже по ней земная мудрования, пришел еси усерднейше в непроходимую пустыню блатную, и, тамо вселився любве ради Христовы и душевнаго обогащения, яко светильник, просиял еси чудес даровании: царскаго бо сына яко от сна возставил еси и тем царя Симеона удивил еси. Сия облобызая, вернии, припадая, молимся: просвети очи наша душевныя воспевати достойно подвиги твоя: пощения, бдения, слезы и болезни, измождение тела блаженныя ради будущия жизни, еяже наслаждаяся, моли непрестанно о всех нас.

 

Песнь 7

Ирмос: От Иудеи дошедше, отроцы, в Вавилоне иногда верою Тройческою пламень пещный попраша, поюще: отцев Боже, благословен еси.

Преподобне отче наш Мартирие, моли Бога о нас.

Прошед подвиги постныя, отче, умом крепким гордую выю смирил еси, Божественным вдохновением и спасительным Богообразным подвижничеством душу твою украсил еси, поя: благословен Бог отец наших.

Преподобне отче наш Мартирие, моли Бога о нас.

Краснейшее прозябение, отче, в дому Божии произрасл еси верою, сугубейший плод принесл еси добродетельми, теми украшен, чудесы облагоухал еси.

Слава: Просветив твое сердце умилением, начальник был еси священнейшаго собора, отче, наказуя, и уча, и вся к Божией воли приводя, поюще: отец наших Боже, благословен еси.

И ныне: Ново Отроча рождшая, Пребезначальнаго Слова, обетшавшия ны зело грехом, верныя обновила еси, Дево, и воспевати научила еси: отец наших Боже, благословен еси.

 

Песнь 8

Ирмос: Богоглаголивии отроцы, в пещи со огнем пламень попирающе, пояху: благословите, дела Господня, Господа.

Преподобне отче наш Мартирие, моли Бога о нас.

Наследниче Божественных селений, Ангельски, отче, пожил еси; тем, со Ангелы водворяяся, ликует в чертогах Небесных со святыми дух твой.

Преподобне отче наш Мартирие, моли Бога о нас.

Невозвратным умом и невозвратными стопами, Богомудре отче, шествовал еси, досточудне, к Небесным селением, Евангельскою стезею направляемь, от стропотных путей до конца уклонился еси.

Слава: Всельшеюся в тя благодатию Святаго Духа, отче Мартирие, благоустрояеши души притекающих к тебе: лукавно бо страстьми в человецех действующий нечистии дуси отгоняеми бывают.

И ныне: Вода еси неисчерпаемая, Девице, Дщерь Царя Небеснаго, от Неяже вси вернии, пиюще, благодати исполняемся, душею и телом освящаеми.

 

Песнь 9

Ирмос: Устрашися всяк слух неизреченна Божия снизхождения, яко Вышний волею сниде даже и до плоти, от Девическаго чрева быв Человек. Темже Пречистую Богородицу, вернии, величаем.

Преподобне отче наш Мартирие, моли Бога о нас.

Исцеление источает богатно честная твоя икона Божиим Духом, и страсти многовременныя исцеляет, отче, приходящих к тебе, и прогоняет лукавыя духи лютыя, и воздвизает верныя восхваляти твоя светлыя подвиги.

Преподобне отче наш Мартирие, моли Бога о нас.

Яко великое солнце, нам величием подвиг твоих возсиял еси в пределах страны сея: умерый бо, прешел еси от света к Свету, от гроба возсиявшему. Тем вопием ти: просвети и наша помышления, отче преподобне Мартирие.

Преподобне отче наш Мартирие, моли Бога о нас.

Тело твое, блаженне, терпеливое, вязавшееся веригами, страсти неисцельныя прикосновением исцеляет, Богу и Спасу, тя вельми прославльшу, отче премудре и досточудне Мартирие, яко делы твоими добрыми прославльшуся, преподобне.

Слава: Процвел еси в постнических удолиях, прехвальне отче наш, яко шипок многоцветен, и, яко крин, облагоухал еси совести верных добродетельми и чудесы: темже, преподобне, отжени от нас страсти смердящия.

И ныне: Просвети, Чистая Дево, сетующее сердце мое присно преступленьми и житейскими молвами, не остави мене врагом быти в радость, яко да славлю Тя и любовию пою, Препетая.

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
реклама