Познаем мир вместе
новые СТАТЬИ сайта
популярные бренды одежды из Беларуси

Канон святому преподобному Нилу Сорскому

Икона святого преподобного Нила Сорского

 Молитва преподобном Нилу Сорскому, чудотворцу 

Память празднуем 7 (20) мая 

Тропарь, глас 4-й

Удалився, бегая, давидски, мира, и вся, яже в нем, яко уметы, вменив, и, в месте безмолвие вселився, духовныя радости исполнился еси, отче наш Ниле, и, Единому Богу изволив служити, процвел еси, яко финикс, и, яко лоза благоплодна, умножил еси чада пустыни. Тем благодарственно вопием: слава Укрепльшему тя в подвиге пустынножительства; слава Избравшему тя в России отшельником уставоположника изрядна; слава молитвами твоими и нас Спасающему.

 

Иной Тропарь, глас 1-й

Мирскаго жития отвергся и мятежа житейскаго бегая, преподобне и Богоносне отче наш Ниле, не обленился еси собрати цветы райския от писаний отеческих и, в пустыню вселився, процвел еси, яко крин сельный, отнюду же прешел еси и в Небесныя обители; научи и нас, честно почитающих тя, твоим царским путем шествовати и молися о душах наших.

 

Канон, глас 4-й

 

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Припев: Преподобне отче наш Ниле, моли Бога о нас.

Греховною тьмою покрываемь, не могу ясно зрети к высоте исправлений твоих, отче, но ты, яко сострадателен и милостив, помози ми, возсиявая спасительный в души моей свет, да пою, радуяся, светлая твоя исправления и преславная чудеса.

Преподобне отче наш Ниле, моли Бога о нас.

Мысленный рай показался еси, отче, произращая различных добродетелей цветы, плоды красны своему Владыце принесл еси, украсившему тя чудесы.

Преподобне отче наш Ниле, моли Бога о нас.

Едину преступив заповедь, первозданный из рая изгнан бысть; ты же, преподобне, заповедей Владычних соблюдением наследник сего показался еси, древа животнаго наслаждаяся присно и, в веселии чистаго сердца твоего зря Господа, Божественнаго света Его причащаешися.

Слава: Неуклонно шествуя по стопам заповедей, жезл силы, Крест Христов в руках держа, в пристанище безстрастия достигл еси, отче, тем и благодать приял еси целити недуги человеков и преславная творити чудеса.

И ныне: Ныне время помощи Твоея, Владычице, призри милостивно на озлобление Твоего раба, Чистая, подающи утешение мне, яко да и аз воспою, радуяся, Божественная Твоя чудеса.

 

Песнь 3

Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.

Преподобне отче наш Ниле, моли Бога о нас.

Не гордяся, дерзнух песнь приносити твоей священной памяти, отче, но любовию твоею движим, Боголюбезне, приими убо сию от твоего раба и ко Господу ходатайствы твоими спасения сподоби мя.

Преподобне отче наш Ниле, моли Бога о нас.

Любовию тя чтущия, отче, спасай от бед и обстояний, в честней твоей памяти лик себе совокупльшия, и колеблемыя ны страстей бурею утверди твоими мольбами и во пристанище спасения достигнути сподоби.

Преподобне отче наш Ниле, моли Бога о нас.

Кто изречет твоя подвиги, отче, и смирения твоего высоту кто скажет? Воистинну Христов ученик был еси, о Боголюбезне, и снаследник Того Царствия. Поминай убо чад твоих, отче, моляся Христу, да и нас части спасаемых сподобит.

Слава: Неключим аз есмь и всячески непотребен и недоумею по достоянию воспети твоя, яже к Богу, исправления, но, отче благосерде, любовь и веру приими и твоими священными ходатайствы спасения мя сподоби.

И ныне: Недоумеет воистинну всяк язык человеческий достойно славословити Тя, о Владычице, по достоянию; аз же, невежествием и грехи многими одержим, что имам принести Тебе, Благая? обаче любовь и веру Твоего раба приими и спасения сподоби мя.

Господи, помилуй (трижды).

 

Седален, глас 8-й

От деяния на высоту Божественнаго востекл еси, отче, видения и, молчание конечное облобызав, безмятежным умом Богу присно беседовал еси, сего ради разумении Божественными оттуду обогатился еси, блаженне, и был еси пастырь и наставник последующим равноангельному житию твоему. Тем, Богоносе отче наш Ниле, моли Христа Бога грехов оставление даровати празднующим любовию святую память твою.

Слава, и ныне: В пучину люте впав уныния от множества грехопадений моих, Чистая, приидох в недоумение и отчаянием ныне одержуся. Владычице Богородице, Ты мя спаси, Ты ми помози, грешным бо Ты еси очищение, яко да и аз, со всеми, получившими Тобою спасение, веселяся, воспою непостижное таинство Рождества Твоего и безмерную Твою милость.

 

Песнь 4

Ирмос: Седяй в славе на Престоле Божества во облаце легце, прииде Иисус Пребожественный Нетленною дланию и спасе зовущия: слава, Христе, силе Твоей.

Преподобне отче наш Ниле, моли Бога о нас.

Низвергл еси вся вражия, отче, ополчения, стоя бодренно на стражи внимания и издалеча предзря сих коварныя сети, молитвою же и постом безбедно прелетая, победительно пел еси: слава, Христе, силе Твоей.

Преподобне отче наш Ниле, моли Бога о нас.

Всегда во уме имея страдания Спаса нашего и вольное на Кресте распятие, сраспялся еси Тому умерщвлением плоти, преподобне, и, Того Божественною любовию уязвив твое сердце, Боголюбезне, показался еси умиления источник, слезоточа присно и поя: слава, Христе, благоутробному снизхождению Твоему.

Преподобне отче наш Ниле, моли Бога о нас.

Христовою уязвлен любовию, слезныя токи непрестанно из очес изливал еси Ниле, отче наш приснопамятне, и в пустыни, яко в раи, водворяяся, непрестанныя приносил еси молитвы, поя присно: слава, Христе, силе Твоей.

Слава: Увы, коликим нечувствием содержим есмь, окаянный аз: ни смерти боюся, ни страшнаго судища трепещу, всякому злу повинен сый. Но, о душе всестрастная, поне отныне воспряни в покаянии, Христу зовущи: Твоего ради угодника Нила, пощади мя, Спасе, и исправи стопы моя, Владыко, всемогущею силою Твоею.

И ныне: Богородице Дево, христиан всех всенадежное упование, спаси мя, отчаяннаго, о Мати Милосердая, оживи душею умершаго, Жизнь всех рождшая; Живоносный Источниче, напой мя умиления водами, зноем страстей люте опаляемаго, да покаяния слезами прохлаждаемь, благодарно воззову: слава, Владычице, всемощней силе Твоей.

 

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Cынa, всем воспевающим Тя мир подавающая.

Преподобне отче наш Ниле, моли Бога о нас.

Отцев древних Святыя Горы житию подражая, Богоносе отче наш, Ниле приснопамятне, во отишие пустыннаго безмолвия потекл еси, радуяся, и, тамо во смирении плоды принося духа, по премногу благоугодил еси славою чудес Тя Обогатившему.

Преподобне отче наш Ниле, моли Бога о нас.

Господни заповеди исполняя, кроток и незлобив, отче, был еси, смирен и прост, и во всех добродетелех благоискусен, тем и Святаго Духа орган явился еси, премудре, научая и вразумляя чада твоя достойно ходити во след Христу, во смирении Тому служащим, спасение подающаго.

Преподобне отче наш Ниле, моли Бога о нас.

Ныне, преподобне, приемля на Небесех почести трудов твоих, не забуди нас, твой праздник радостно празднующих, но испроси грехов разрешение, молящи Христа, прославльших Его славящим, спасение подающаго.

Слава: Облеклся еси во Христа, Богомудре, безстрастия одеждою украсився, сострадателен и милостив, отче, был еси согрешающим, смиренномудро поучая и возбуждая к покаянию и ко Христу приводя, всем, во смирении просящим, спасение подающему.

И ныне: Одеждою студа облекохся окаянный аз, совлечен боготканныя, юже во Крещении приях, одежды, о Дево Всенепорочная! Но молю Тя, Всемилостивая, во одежду мя спасения паки облеки, да достоин буду брака Агнча, Емуже от чистых кровей Твоих багряницу плоти исткала еси, всем, воспевающим Тя, спасение подающему.

 

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Преподобне отче наш Ниле, моли Бога о нас.

С лики святых в Небесных ныне водворяяся селениих, о Ниле Богоносе, и со дерзновением предстоя Пресвятей Троице, нас, твоих чад, не забуди, отче, но испроси грехов разрешение твой праздник радостно празднующим, да благодарно тя прославльшаго Бога славим.

Преподобне отче наш Ниле, моли Бога о нас.

Новый благотечный в Российстей земли источник явился еси, Богоносе, струи исцелений изливая от святаго твоего гроба верою несумненною притекающим к тебе, Ниле, отче наш, мы же, веселия исполняеми, тя прославляющаго Бога славим.

Преподобне отче наш Ниле, моли Бога о нас.

Усердно от юности твоея даже до честнаго преставления совестию чистою Христу послужил еси, преподобне, Того храня Божественныя заповеди, нестяжанием бо и нищетою себе оградив, на камени терпения твоя стопы, мудре, утвердил еси, Ниле, отче наш.

Слава: Многая твоя, о, отче, исправления и яже в Бозе труды и подвиги твоя, пощение и бдение, долу легания и злострадания, нищету и совершенное нестяжание кто изрещи возможет? Воистинну бо истинен монах показался еси, Боголюбезне, тем и мы, любезно память твою чтуще, тя укрепльшаго Бога славим.

И ныне: Утроба Твоя, о Дево Пренепорочная, пространнейшая небес показася, вместившая Невместимаго Бога. О, преславных вещей! О, непостижимаго Ангелом и человеком, на Тебе совершившагося таинства! Тем Тя, Богородицу, воистинну исповедающе, от Тебе рождшагося Бога славим.

Господи, помилуй (трижды). Слава, и ныне:

 

Кондак, глас 8-й

Любве ради Христовы удалився мирских смущений, радостною душею вселился еси в пустыни, в нейже подвизався добре, яко Ангел, на земли, отче Ниле, пожил еси: бдением бо и постом тело свое изнурил еси вечныя ради жизни. Еяже ныне сподобився, во свете неизреченныя радости Пресвятей Троице со святыми предстоя, моли, молимтися, припадающе, чада твоя, сохранитися нам от всякаго навета и злых обстояний видимых и невидимых враг и спастися душам нашим.

 

Икос

Ангельскому поревновав житию и великим во отцех подобяся, всего себе отрешил еси мирскаго сплетения, к подвигам же постничества мужески вооружився, опасно путем Божиих заповедей шествовал еси, блаженне. Темже и мы, верно чтущии твою священную память, похвалами ублажаем тя сими: радуйся, ангельскаго жития подражателю; радуйся, древних великих отец житию преемниче. Радуйся, невидимых врагов мужественный победителю; радуйся, заповедей Божиих хранителю усердный. Радуйся, отеческих Богодухновенных преданий опасный ревнителю; радуйся, монашескаго постническаго жительства законоположителю. Радуйся, добродетелей чистейшее зерцало; радуйся, Духа Святаго сладкогласный орган. Радуйся, образе глубокаго смирения; радуйся, ревностный исполнителю Божественных детелей. Радуйся, яко тобою научихомся непрелестным путем жития ходити; радуйся, яко твоим за ны ходатайством спасение получити надеемся. Радуйся, Ниле чудотворче, отче наш.

 

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев и Господь и Бог, благословен еси.

Преподобне отче наш Ниле, моли Бога о нас.

Песнь препросту усердно приношу ти, отче: приими убо сию от недостойнаго и не возгнушайся мене, паче всех грешнейшаго, о преблаженне, но, милостивно преклонься, спасение улучити твоим предстательством сподоби, да, радуяся, пою: препетый отцев Господи и Боже, благословен еси.

Преподобне отче наш Ниле, моли Бога о нас.

Един с Единым Богом непрестанно беседовал еси, отче, чистыя молитвы чистым и немятежным умом Тому принося и совестию чистою, о Богомудре, от деяния бо к видению востек, весь боговиден содеялся еси, блаженне, присно поя: препетый отцев Господи и Боже, благословен еси.

Преподобне отче наш Ниле, моли Бога о нас.

Плодоносен сад показался еси, отче, приносящ плоды духа, любве бо и радости преисполнен был еси, мира, долготерпения, кротости и воздержания, и, яко Христов воистинну, плоть распиная со страстьми и похотьми, и присно поя: препетый отцев Господи и Боже, благословен еси.

Слава: Не мудростию, но любовию тебе поющаго приими, о отче, и, светосиянною твоею молитвою забвения и неведения тьму разгнав, помози ми вопити присно: препетый отцев Господи и Боже, благословен еси.

И ныне: Под кров Твой, Владычице, прибегающаго не отрини, но, яко Всемилостивая, спаси убогаго раба Твоего, от безмерных согрешений моих избавляющи мя, да, радуяся, пою: препетаго отцев Господа и Бога Мати, во веки благословенна еси.

 

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Преподобне отче наш Ниле, моли Бога о нас.

Отче наш Ниле приснопамятне, красно и добро воистинну житие препроводил еси, о Боголюбезне: мирския бо молвы избежав и в пустыню уединився, скорби постныя сеял еси со слезами, но ныне, радуяся, жнеши присноживотия класы.

Преподобне отче наш Ниле, моли Бога о нас.

Единому тайная ведущему Богу втайне поработал еси, отче, во смирении проходя добродетелей поприще, о блаженне, по преставлении же твоем явлен и светел еси чудесы, пети воздвизая верныя: Господа пойте, дела, и превозносите Его во вся веки.

Слава: Божественною благодатию, сущею в тебе, источаеши исцеления и прогоняеши духи лукавствия от приходящих к тебе верно, Ниле всеблаженне. Тем и мы любезно чтим твою всесвященную память, весело поюще: Господа пойте, дела, и превозносите Его во вся веки.

И ныне: Услыши, Владычице, болезненное воздыхание Твоего раба, разрешивши вериги моих согрешений, печаль на радость преложи и болезни премени вскоре, да, радуяся, пою Тя, Дево, и превозношу, Чистая, во вся веки.

 

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Преподобне отче наш Ниле, моли Бога о нас.

Пресветел светильник отечеству твоему явился еси, преподобне, осиявая светлостию твоею жительства наша и чудес сияньми, имиже по преставлении твоем прославился еси, о блаженне. Тем, твою светоносную память чтуще, Христа славим, светло тя прославляющаго.

Преподобне отче наш Ниле, моли Бога о нас.

Егда краснии твои нозе, добре по спасении пути текшия, на одре смертном простерл еси, блаженне, тогда ученицы твои, слезы точаще, глаголаху: камо отходиши, пастырю наш, и кому оставляеши чада твоя, отче, ихже духовне породив, воспитал еси млеком твоего мудраго наставления?

Преподобне отче наш Ниле, моли Бога о нас.

Плачем моея радости не растворяйте, о чада, – ты рекл еси им, о Богоблаженне, – аз бо, веселяся отхожду прияти венец правды, егоже обеща Христос Того любящим, идеже и вы потщитеся постигнути, соблюдше Того, вкупе и моя заповеди.

Преподобне отче наш Ниле, моли Бога о нас.

Да восплачет вкупе с ними пустыня сия, о отче, аще бо и процвете, яко крин, красующися богоугодным жительством твоим, но не имея по тебе добраго делателя, терние и волчец имать возрастити. Обаче не остави посещати стадо твое, отче, и сам ты упаси тебе величающия.

Слава: Не забуди и ныне нас, обитающих на месте твоего трудоположнаго жительства, о Ниле Богоносе, отче наш, и песнь усердно тебе приносящим ходатайствуй спасение: тя бо, о всеблаженне, молитвенника и предстателя ко Господу стяжавше, надежды да не отщетимся, верно тя чтущии.

И ныне: Одеждою спасения одей мя, о всенадежное спасения моего упование, Мати Божия, на Тебе надеюся, Всемилостивая: сокровищница бо еси милости и вся спасаеши, к Тебе прибегающая. Спаси убо и мене, отчаяннаго, да благодарно пою: радуйся, Всеблаженная Богородице, Чистая Приснодево.

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
популярные бренды одежды из Беларуси