Познаем мир вместе
новые СТАТЬИ сайта

Канон святому преподобному Нилу Столбенскому

Икона святого преподобного Нила Столбенского

 Молитвы преподобному Нилу Селигерскому, Столбенскому чудотворцу

 

Память празднуем 7 (20) декабря

 

Тропарь, глас 4-й

Яко светильник всесветел, явился еси во острове Селигера езера, преподобне отче Ниле, ты бо, крест Христов от юности своея на рамо взем, усердно Тому последовал еси, чистотою Богови приближився, отонудуже и чудес дарованием обогатился еси. Тем и мы, притекающе к раце мощей твоих, умильно глаголем: отче преподобне, моли Христа Бога спастися душам нашим.

 

Канон, глас 4-й

 

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, свело торжествуя, и воспою, радуяся, Тоя чудеса.

Припев: Преподобне отче наш Ниле, моли Бога о нас.

Смирился еси Христа ради, отче Ниле, и, крест взем, отечества и сродник бегал еси; отнюдуже в пустыню вшед и в ней трудолюбно подвизался еси, преподобне.

Преподобне отче наш Ниле, моли Бога о нас.

От юности своея, отче Ниле, ум к Богу вперив, и тленными нетленная, яко добрый купец, искупил еси, темже, ныне сошедшеся, память твою почитаем.

Слава: Христовым рачением, отче Ниле, паче огня распалаемь, настоящая, яко ничтоже сущи, презрел еси, и того ради в покоище вселися, идеже праведных души веселятся.

И ныне: Боляща исцели душею же и телом, Владычице, раба Твоего блаженнаго Нила молением: Тебе бо Предстательницу вси сущии в печалех стяжахом, яко рождшую Спасение наше.

 

Песнь 3

Ирмос: Твоя песнословцы, Богородице, Живый и Независтный источниче, лик себе совокупльшия, духовно утверди, в Божественней Твоей славе венцев славы сподоби.

Преподобне отче наш Ниле, моли Бога о нас.

Сна твоим очесем не дал еси, блаженне Ниле, ни веждом дремания, дондеже сподобился еси праведных селения, яже уготова Бог любящим Его.

Преподобне отче наш Ниле, моли Бога о нас.

Бодренными твоими молитвами, отче Ниле, и жестоким воздержанием Богу на земли добре угодил еси, и сего ради быв страшен врагом и славен человеком.

Слава: Райскую жизнь и тамо святым веселие всегда во уме своем помышляя, преподобне, темже во слезах и в воздыхании всю жизнь свою, отче Ниле, прошел еси и сего ради по смерти от Христа чудесы прославися.

И ныне: Источаеши исцелением струи болящим, Дево, всюду: Тя бо источник показа исцелений, Владычице, Иже милости Господь, из Тебе рождейся паче ума.

Господи, помилуй (трижды).

 

Седален, глас 4-й

Страстное покорил еси плотское мудрование и хуждшее поработил еси лучшему, отче Ниле преславне, сокрушил еси бесовския козни постом и возсиял еси в мире, яко луча солнечная, сиянии твоих добродетелей: сего ради тя воспеваем.

Слава, и ныне: Стена непобедимая нам, христианом, еси, Богородице Дево, к Тебе прибегающе, невредими пребываем и, паки согрешающе, имамы Тя Молитвенницу. Тем, благодаряще, вопием Ти: радуйся, Благодатная, Господь с Тобою.

 

Песнь 4

Ирмос: Седяй в Славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Преподобне отче наш Ниле, моли Бога о нас.

Житие свое, отче Ниле, чудно на земли показал еси, велико пощение и смирение, и сего ради на Небесех жизнь вечную наследовал еси; моли спастися от бед поющим тя.

Преподобне отче наш Ниле, моли Бога о нас.

Симеона великаго, на столпе жившаго, житию последуя, преподобне, темже того, елико мощно, именование от жития стяжал еси, Ниле пребогате.

Слава: Постом и молитвами тело твое, отче Ниле, изнурил еси и сего ради сподобился еси видети неизреченная благая, яже святым уготована, с нимиже, отче Ниле, о нас молися.

И ныне: Покров, и заступление, и прибежище буди ми, Дево, рабу Твоему, исцели мя от безмерных зол, воспевати, Пречистая: слава Рождеству Твоему.

 

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Преподобне отче наш Ниле, моли Бога о нас.

Чисто житие твое от юности потщался еси, преподобне, сохранити; темже, чистоту твою видев, Пресвятый Дух в тя вселися.

Преподобне отче наш Ниле, моли Бога о нас.

Яко преобидев тленная, вечная, отче, сподобился еси прияти по неложному словеси: просите и приимете. Темже, яко просил, сия по достоинству приял еси.

Слава: Место освятися, на немже честныя мощи твоя положишася, преподобне, и по многим странам прославляемо есть, яко в себе мощи твоя имущее.

И ныне: Не престай молящи, Егоже родила еси, Богоневесто, яко Спаса и Владыку, разрешение ми подати скорбей и болезней облегчение, яко да прииму прощение, песнословя Тя во веки.

 

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Преподобне отче наш Ниле, моли Бога о нас.

Твое великое житие и чистоту, к сим же безмерное смирение провидев, Пресвятый Дух славна тя, отче, показа; темже, от сего жития ко оному прешед, получил еси с праведными тамо веселие.

Преподобне отче наш Ниле, моли Бога о нас.

Днесь наставши, священная память твоя, преподобне Ниле, веселит ученики твоя, воспевающия любовию подвиги твоя, иже, честное твое успение славяще, торжествуют, ихже молитвами твоими, отче, соблюди.

Слава: Разбойницы иногда приидоша тебе оскорбити, преподобне, но ты, тех лукавство разумев, Превечнаго Христа Бога силою и Пречистыя Его Матере помощию сих немощны сотворил еси, иже, не могуще тебе противитися, страхом отбегоша, побеждени паче бывше, нежели победиша.

И ныне: Твою помощь даждь ми и избави мя от бед, и скорбей, и прегрешений моих, Яже всех рождши Избавление.

Господи, помилуй (трижды). Слава, и ныне:

 

Кондак, глас 8-й

Отечества, преподобне, удалився, в пустыню вселился еси, и, на остров Селигера езера возшед, жестоко житие показал еси, и, многих добродетельми удивив, дарования чудес от Христа приял еси. Поминай нас, чтущих память твою, да зовем ти: радуйся, Ниле, отче наш.

 

Икос

Возлюбив, преподобне, Христовы Божественныя заповеди и возненавидев мира сего наслаждение, притекл еси усердно к Тому и был еси светильник, просвешаяй концы блистанием духовным. Тем, припадая, молю тя: просвети ми очи сердечныя воспети твоя подвиги, пощение, бдение, слезы, болезни, изнурение тела блаженныя ради будущия жизни, еяже ныне наслаждаяся, моли непрестанно о всех нас.

 

Песнь 7

Ирмос: Не послужиша твари Богомудрии паче Создавшего, но огненное прещение мужески поправше, радовахуся, поюще: препетый отцев Господь и Бог, благословен еси.

Преподобне отче наш Ниле, моли Бога о нас.

Источает чудеса честная рака твоя, преподобне, преизобилующи благодатию, верою приходящим здравие дарует, Христу от души вопиющим: благословен Бог отцев наших.

Преподобне отче наш Ниле, моли Бога о нас.

Древних онех и великих отцев, в посте просиявших, житию подобяся, преподобне, в пустыню вселился еси и тамо в пощениих многа лета пребыл еси, Ниле, отче наш.

Слава: Яко истиннаго и кроткаго Пастыреначальника Христа незлобивое овча, отче Ниле, был еси. Темже незлобив хотящим тебе озлобити явился еси, Христу вопия: благословен Бог отцев наших.

И ныне: Обощрены болезни ранам моим от безмерных моих прегрешений, Владычице, ведут в смерть душевную и телесную, но исхити, яко сильна, всяких скорбей и недуг.

 

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Преподобне отче наш Ниле, моли Бога о нас.

Издетска, преподобне отче, потщался еси свою совесть и сердце с душею чисто Господу представити. Тем и Христос чудесы тебе прославляет, тому вопиюща: Господа воспевайте дела, и превозносите Его во веки.

Преподобне отче наш Ниле, моли Бога о нас.

Ныне пустыня веселием красуется, отче, имущи мощи твоя в себе, Ниле преподобне, ученицы же твои, твоему житию ревнующе, о твоей памяти радующеся, Творцу вопиют: Господа воспевайте дела, и превозносите Его во веки.

Слава: В пустыню, преподобне, идеже селение имел еси, пречестен храм во славу Богоявления Господня воздвигл еси, в немже прославляется пречистое Того Имя, и вси вопиют: Господа воспевайте дела, и превозносите Его во веки.

И ныне: Светильник Света Трисолнечнаго сущи, зарею благоутробия Твоего тьму отьими прегрешений моих, Богородительнице, избавление нуждных болезней подающи верою превозносящему пречистое Твое Рождество.

 

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Преподобне отче наш Ниле, моли Бога о нас.

Богатство и пища, похвала и радость преподобным еси, Христе Боже, Егоже возлюбив, преподобный Нил вся, яже в мире красная, нивочтоже вмени; темже наслаждается Твоея красоты во блаженном Свете.

Преподобне отче наш Ниле, моли Бога о нас.

Страстьми колеблющихся и бурею греховною погружаемых, яко дерзновение имеяй ко Господу, всегда сохраняй, благочестно тя воспевающих и прославляющих.

Слава: Облистая зарею, просиял еси духовно и явился еси Вышнему ликостоянию светел; озари ми ум, блаженне, Трисиянным Светом Божества и от страстей мя избави молитвами твоими.

И ныне: Ты еси верным похвала, Безневестная, Ты заступление и священное прибежище христианом: к Сыну бо Своему и Богу мольбы носиши, Всенепорочная, и от бед Спасаеши верою и любовию Богородицу Чистую Тя воспевающих и величающих. 

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта