Познаем мир вместе
новые СТАТЬИ сайта
реклама

Канон святому преподобному Савве Сторожевскому

 

Молитва преподобному Савве, игумену Сторожевскому, Звенигородскому чудотворцу

 

 Память празднуем 3 (16) декабря

 

Тропарь, глас 8-й

Пустыни явился еси доброе прозябение, преподобне: от юности бо изволил еси чистое житие, духовному твоему учителю последуя, и того учением ум к небесным вперив, и стаду твоему премудр наставник показался еси. Тем и Христос яко пресветла тя светильника чудесы обогати: Савво, отче наш, моли спастися душам нашим.

 

 

Канон, глас 6-й

 

Песнь 1

Ирмос: Яко по суху, пешешествовав Израиль по бездне стопами, гонителя фараона видя потопляема, Богу победную песнь поим, вопияше.

Припев: Преподобне отче наш Савво, моли Бога о нас.

Настави мя, Господи Боже мой, да возмогу благочестно, угодника Твоего преподобнаго Саввы славное и честное восхвалити торжество.

Преподобне отче наш Савво, моли Бога о нас.

Мужески подвизался еси, и зарю духовную восприем, взялся еси к высоте небесней, и ныне со Ангелы прославляешися.

Слава: Оружием креста ограждаяся, преподобне, всю силу противнаго победил еси, и до конца сего без вести сотворил еси.

И ныне: Пресущное Слово, существо наше прием от чистых кровей Твоих, богосодела нас, тления избавив, Чистая: сего ради Тя присно славим.

 

Песнь 3

Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

Преподобне отче наш Савво, моли Бога о нас.

Молчанием язык обуздал еси, и немятежным житием, во плоти ангельски, отче, пожил еси.

Преподобне отче наш Савво, моли Бога о нас.

Воистинну благия жизни сподобился еси, преподобне, чистотою и пощением сию обрет. И ныне со безплотными вопиеши: несть свят паче Тебе, Господи.

Слава: Трисиянным Светом озарен, и благодать Духа Святаго вселися в тя, преподобне, возлюбльши чистую твою душу, и непрестанно вопиеши: несть свят паче Тебе, Господи.

И ныне: Разумети Рождества Твоего, Чистая, неизглаголанную глубину, недоумеет ум человечь: Бог бо, истощив Себе за милосердие во утробе Твоей, всего мя обнови.

Господи, помилуй (трижды).

 

Седален, глас 4-й

Мраз нощный претерпел еси, и тяготу вара дневнаго понесл еси, и сих ради вечное наслаждение и пищу присноживущую восприял еси, Христов угодниче блаженне Савво: моли спастися душам нашим.

Слава, и ныне: Чистая, Всенепорочная и Неискусомужная, Яже Едина Безлетнаго Сына и Слова Божия в лето рождши, Сего со святыми и честными патриархи, мученики, пророки и преподобными моли, даровати нам очищение и велию милость.

 

Песнь 4

Ирмос: Христос моя сила, Бог и Господь, честная Церковь боголепно поет, взывающи, от смысла чиста, о Господе празднующи.

Преподобне отче наш Савво, моли Бога о нас.

Безмерное смирение возлюбив, своея мысли зрительное очистил еси, и ныне, в райских селениих водворяяся, вопиеши: слава силе Твоей, Господи.

Преподобне отче наш Савво, моли Бога о нас.

Слезными потоки, преподобне, землю сердца твоего напоил еси, предстоя в молитве неколеблен, Творцу всех взывал еси: слава силе Твоей, Господи.

Слава: Не забуди стада твоего, преподобне, еже мудре собрал еси и в жизни сей упасл еси благочестно: потщися, отче наш Савво, ввести во ограду небесную.

И ныне: Чистоты жилище, селение Владыки всех, и пророков всех сбытие, Богорадованная Чистая, поющия Тя ущедри.

 

Песнь 5

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.

Преподобне отче наш Савво, моли Бога о нас.

Бодренными бдении, блаженне, и чистыми воздыхании, благодать Духа возрасте в тебе, отче, и славна тя, Савво, показав.

Преподобне отче наш Савво, моли Бога о нас.

Владычне смирение восприим, воду почерпая на рамех своих носити изволил еси: начальника трудоположна во всем себе показал еси.

Слава: Преблаженне, богоприятне отче наш Савво, непрестанно стадо твое вопиет ти: молитвами твоими ко Господу спаси ны, молимся.

И ныне: По рождении страшнем пребыла еси Дева, якоже прежде. Бог бе рождейся, устрояяй вся волею, безневестная Марие Богоблагодатная.

 

Песнь 6

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Преподобне отче наш Савво, моли Бога о нас.

Страдании подвиг твоих, преблаженне, клас Божественный возрастил еси: и питаеши благочестно восхваляющия тя, Савво преподобне, отче наш.

Преподобне отче наш Савво, моли Бога о нас.

Князя прошение, отче, со тщанием исполняя, храм Богоматере воздвигл еси, в немже праздничною радостию монахов множества веселятся, память твою прославляюще.

Слава: Каплями потов твоих, преподобне, врагов ополчения попрал еси, и достигл еси ангельския невещественныя лики.

И ныне: Всеблагая Владычице, Яже Преблагаго Бога плотию рождши, озлобленное страстьми мое сердце очисти, да верою и любовию величаю тя.

Господи, помилуй (трижды). Слава, и ныне:

 

Кондак, глас 2-й

Господним желанием распалився, страсти плотския воздержанием оттряс, Божественнаго Света незаходимое светило явился еси, чудес лучами всех просвещаеши притекающих к раце мощей твоих, Савво преподобне, отче наш.

 

Икос

Всесильное Духа Святаго действо Боговидно в тя вселися, и боголепными мановении благотечне идый к горе, идеже хотел еси обитель воздвигнути, и якоже небесный рай благовонными насажден цветы, сию обрет, вселился еси, и храм Богоматере чуден воздвигл еси, монахов множество собрал еси, и сия добродетельными деянии светло блистающия, воздержании мудростная воображь. И ныне, в память твою сошедшеся, вопием ти: моли о нас, Савво преподобне, отче наш.

 

Песнь 7

Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших.

Преподобне отче наш Савво, моли Бога о нас.

Пучиною слез твоих, пребогате, злоначальнаго змия потопил еси, яко победоносец изряден к небесным возлетел еси, непрестанно вопиеши: благословен Бог отец наших.

Преподобне отче наш Савво, моли Бога о нас.

Житие незлобиво имел еси, и непорочно, и украшено поты страдания, прехвальне, Божественнаго светолития исполнився, взывал еси: благословен Бог отец наших.

Слава: Хвалится, преподобне, град твой, яко венцем царским обложися, имея мощи твоя в себе, яко добра гражданина от Бога приял есть.

И ныне: Препетая Дево, препетаго Бога рождшая, поющия тя причастники покажи света, и избави геенны огня, и всякаго вреда вражия молитвами твоими.

 

Песнь 8

Ирмос: Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.

Преподобне отче наш Савво, моли Бога о нас.

Мудрование плотское умертвил еси, чести и имения совлеклся еси, от земли к небесным взыти тщася, и вся пети научая: Господа пойте, и превозносите Его во веки.

Преподобне отче наш Савво, моли Бога о нас.

Сердца Твоего бразды, отче Савво, мудре возделал еси, слезными тучами сия напоил еси, и благоуханно миро принеслся еси Христу, Емуже вопиеши: Господа пойте, и превозносите Его во веки.

Слава: Христу принося, блаженне, пощения и слезы, и непорочную молитву, ризную лепоту, и мягкия одежды власяными рубы пременил еси, сим показуя глубочайшее смирение.

И ныне: Избавльшеся первыя клятвы Рождеством Твоим, всеблагословенная Отроковице Богорадованная, Гавриилов Тебе глас возсылаем: радуйся, виновная всех спасения.

 

Песнь 9

Ирмос: Бога человеком невозможно видети, на Негоже не смеют Чини Ангельстии взирати; Тобою бо, Всечистая, явися человеком Слово воплощенно, Егоже величающе, с Небесными вои Тя ублажаем.

Преподобне отче наш Савво, моли Бога о нас.

Видети славу Вседержителя желая, обновил еси души крепость, и славою обогатился еси небесною.

Преподобне отче наш Савво, моли Бога о нас.

Честное украшение благодати, отче преподобне Савво, испроси нам во бранех крепость, и здравие телесе: яко да непрестанно тя величаем.

Слава: Чини Ангельстии тебе, отче, сретоша, и праведных собори возвеселишася, и от вседержительныя десницы Владычни венчался еси. Темже тя достойно величаем.

И ныне: Светом Твоим мя, Богорадованная в женах Дево, просвети, молюся, и огня вечнаго избави мя: яко да величаю Тя, и по долгу да воспою величия Твоя. 

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
реклама