Познаем мир вместе
новые СТАТЬИ сайта
реклама

Канон святому преподобному Серафиму Саровскому

Икона святого преподобного Серафима Саровского

 Молитвы преподобному Серафиму, Саровскому чудотворцу

Акафист святому преподобному Серафиму Саровскому 

Память празднуем 2 (15) января 

Тропарь, глас 4-й

От юности Христа возлюбил еси, блаженне, и, Тому Единому работати пламенне вожделев, непрестанною молитвою и трудом в пустыни подвизался еси, умиленным же сердцем любовь Христову стяжав, избранник возлюблен Божия Матере явился еси. Сего ради вопием ти: спасай нас молитвами твоими, Серафиме, преподобне отче наш. 

 

Канон, глас 6-й

 

Песнь 1

Ирмос: Яко по суху, пешешествовав Израиль по бездне стопами, гонителя фараона видя потопляема, Богу победную песнь поим, вопияше.

Припев: Преподобне отче наш Серафиме, моли Бога о нас.

Господи, отверзи моя недостойнеи устне и даждь ми слово разума воспети достойно память блаженного Серафима, ныне со Ангелами молящагося Тебе избавити нас от всякого лютаго обстояния.

Преподобне отче наш Серафиме, моли Бога о нас.

К Богородице великий молитвенник был еси, преподобне, Юже видети со Апостолы сподобился еси, и ныне не престай молитвами твоими посещати чад твоих.

Слава: От юности твоея, преподобне, предался еси умом Богови и, страсти телесныя крепким воздержанием укротив, всякими добродетельми украсился еси, премудре.

И ныне: Всеблагая Владычице, Яже Преблагаго Бога плотию рождши, озлобленное страстьми мое сердце очисти, да верою и любовию величаю Тя.

 

Песнь 3

Ирмос: Несть свят, якоже Ты, Господи Боже мой, вознесый рог верных твоих, Блаже, и утвердивый нас на камени исповедания Твоего.

Преподобне отче наш Серафиме, моли Бога о нас.

Молитвами твоими, преподобне, предстоя Богу со Ангелы, за весь мир молися, брани вражия потребити и победу на супостаты даровати.

Преподобне отче наш Серафиме, моли Бога о нас.

От юности верою и любовию прилепился еси Владыце Вышних Сил, преподобне Серафиме, и, возсияв в пустыни Саровстей, яко солнце, в скорбех приходящим к тебе утешитель был еси; моли спастися нам.

Слава: Явился еси, преподобне, молящимся тебе столп непоколебим и прибежище всем притекающим во обитель Саровскую и приемлющим исцеления благодать неоскудную.

И ныне: Услыша Ева праматерь: в печалех родиши чада. Ты же, Чистая Дево, услышавши: Господь с Тобою, радуйся, — радованным гласом печаль праматере потребила еси.

Господи, помилуй (трижды). Слава, и ныне:

 

Седален, глас 4-й

Житейское море страстей воздержанием препобедив и в пристанище безстрастия притек, сосуд воздержания явился еси, преподобне Серафиме, моли Христа Бога даровати нам велию милость.

 

Песнь 4

Ирмос: Христос моя сила, Бог и Господь, честная Церковь боголепно поет, взывающи, от смысла чиста о Господе празднующи.

Преподобне отче наш Серафиме, моли Бога о нас.

Днесь светло празднует Саровская обитель память твою, преподобне, и молит тя: испроси у Господа вселенней мир и душам нашим велию милость.

Преподобне отче наш Серафиме, моли Бога о нас.

Великими подвиги твоими, преподобне, яко финикс, процвел еси, словесы благоплодными и непорочным житием сердца притекающих к тебе услаждая, и ныне убо молися, да обрящем милость от Христа, Спаса нашего.

Слава: Твоими молитвами о нас умоли Бога, преподобне Серафиме, и греховный мрак печали нашея разори, безстрастием, верою и любовию украси всех, преславную память твою чтущих.

И ныне: Радуйся, Владычице Дево, Церквам красото, благочестивым людем державо и похвало, непрестанно молися Христу Богу, да сохранит нас от бед молитвами Твоими.

 

Песнь 5

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.

Преподобне отче наш Серафиме, моли Бога о нас.

Всем приходящим к тебе был еси учитель истинный и к Богородице великий молитвенник, и ныне, преподобне, не престай молися о чадех твоих, яко имаши дерзновение велие.

Преподобне отче наш Серафиме, моли Бога о нас.

Да внидут ныне христоименитии людие во храм обители Саровския, к честным мощем твоим, преподобне Серафиме, припадающе, и да просят от тебе исцеления, здравия и спасения, Христа величающе.

Слава: В нощи молящу ти ся Богу, преподобне, враг невидимый хотяше устрашити тя, но молитвою твоею посрамлен, исчезе вселукавый.

И ныне: Бога, Егоже родила еси, Пречистая Марие, моли рабом Твоим подати прегрешений оставление.

 

Песнь 6

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Преподобне отче наш Серафиме, моли Бога о нас.

Святая душа твоя обитель бысть Богу, в нейже Отец, Сын и Святый Дух вселися, темже молим тя, преподобне, наваждения вражия от чтущих тя отжени и верным людем мир и здравие даруй.

Преподобне отче наш Серафиме, моли Бога о нас.

Великия твоя пустынныя подвиги и труды и сладость учения твоего почитаем, преподобне Серафиме, имиже многия приходящия к тебе просветил еси и научил еси воспевати Единосущную Троицу.

Слава: Житием чистым последовав Владыце Христу, течение доброе скончал еси, преподобне, к вечным же обителем возшед, блаженне, зриши тамо, иже Ангели видят. Темже, чтуще память твою, Христа величаем.

И ныне: Ныне к Тебе прибегаю, Пречистая, спаси мя молитвами Твоими и соблюди: елика бо хощеши, можеши, яко Мати Всемогущаго.

Господи, помилуй (трижды). Слава, и ныне:

 

Кондак, глас 2-й

Мира красоту и яже в нем тленная оставив, преподобне, в Саровскую обитель вселился еси и, тамо Ангельски пожив, многим путь был еси ко спасению, сего ради и Христос тебе, отче Серафиме, прослави и даром исцелений и чудес обогати. Темже вопием ти: радуйся, Серафиме, преподобне отче наш.

 

Икос

Оставив род и други, богатство, яко прах, вменив, в пустыни Саровстей водворился еси и, на страсти, яко безплотен, подвизався, Ангелов ликостояния сподобился еси. Темже духовная разумения приим, подаждь и нам, преподобне, разумно песньми воспети тя, сице глаголющим: радуйся, Серафиме блаженне, Небесный человече и земный Ангеле; радуйся, в любви Христу подражателю; радуйся, Святаго Духа обитель; радуйся, унывающим велие радование; радуйся, источниче исцелений; радуйся, скорбящим душам сладкое утешение; радуйся, иноком тихое пристанище и учителю премудрый; радуйся, похвало земли Российския; радуйся, Серафиме, преподобне отче наш.

 

Песнь 7

Ирмос: Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси, Боже отец наших.

Преподобне отче наш Серафиме, моли Бога о нас.

Честно житие твое явися, преподобне, благодатию Божественнаго Духа исполнено, блаженну воистинну кончину преподобных приял еси, о Христе радуяся. Мы же к прославльшему тя взываем: отец наших Боже. благословен еси.

Преподобне отче наш Серафиме, моли Бога о нас.

Множество людей, во святую обитель сошедшеся днесь, преподобне Серафиме, честным мощем твоим покланяется, от нихже исцеления вси почерпаем, непрестанно зовуще: отец наших Боже, благословен еси.

Слава: Во всю землю изыде вещание сие, яко в Сарове чудотворец преславен явися, исцелений множество источая всем, с верою приходящим и вопиющим: отец наших Боже, благословен еси.

И ныне: Богородице Дево, рождшая Слово паче слова, Зиждителя Твоего, Того моли с преподобным Серафимом помиловати души наша.

 

Песнь 8

Ирмос: Из пламене преподобным росу источил еси, и праведнаго жертву водою попалил еси, вся бо твориши, Христе, токмо иже хотети. Тя превозносим во вся веки.

Преподобне отче наш Серафиме, моли Бога о нас.

Плотския страсти укротив и мирови умертвився, глаголы жизни вечныя сердцем твоим, блаженне, приял еси, научая всех, к тебе притекавших, взывати: Господа пойте, дела, и превозносите Его во веки.

Преподобне отче наш Серафиме, моли Бога о нас.

В прославлении честных мощей твоих, преподобне, обитель Саровская радости исполнися. Людие же вси дивному во святых Своих Богу взываху: Господа пойте, дела, и превозносите Его во веки.

Слава: Благодатию Божественнаго Духа исполнен сый, преподобне Серафиме, верным людем, творящим святую память твою, молитвами твоими испроси грехов прощение, вопиющим: дети, благословите, священницы, воспойте, людие, превозносите Господа во веки.

И ныне: Спасения Ходатаица нам явилася еси, Богородице, рождшая Спаса и Владыку всех, темже молим Тя: спасения сподоби всех, песнословящих Тя верно во вся веки.

 

Песнь 9

Ирмос: Бога человеком невозможно видети, на Негоже не смеют Чини Ангельстии взирати. Тобою же, Всечистая, явися человеком Слово воплощенно, Егоже величающе, с Небесными вои Тя ублажаем.

Преподобне отче наш Серафиме, моли Бога о нас.

Недостойными усты воспеваемое тебе милое хваление, преподобне, не презри, но приими и всех, прославляющих тя, освяти, бед, и напастей, и вечнаго мучения избави, да тя присно воспеваем.

Преподобне отче наш Серафиме, моли Бога о нас.

Мраз нощный и вар дневный во уединении пустыннем доблественне претерпев, дом Премудрости Божия был еси и к сиянию невечернему востекл еси. Моли спастися нам.

Слава: Славится днесь обитель, и в нейже ярем Христов прияти изволил еси: тамо бо, в пустыни, дни твоя пребыл еси и, твоими ученьми многи приходящия к тебе вразумив, научил еси быти чада Церкве Христовы.

И ныне: Ты еси крепость наша, Ты еси похвало и радование, Хранительница наша, заступление, прибежище и Предстательница непобедимая, Пречистая Богородице, спаси рабы Твоя.

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
реклама