Молитва преподобномученику Корнилию Псково-Печерскому
Псково-Печерская обитель, издревле славная чудесы иконы Богоматерни, многия иноки Богови воспита, тамо и преподобный Корнилий подвигом добрым подвизася, чудную Богоматерь славя, иноверныя просвещая, иноки и многия люди спасая, обитель же свою дивно украшая и ограждая. Тамо и мученичества венец по многих летех пастырства своего доблестне прият. Темже воспоим, людие, Христа Бога и Пречистую Его Матерь возблагодарим, яко дарова нам преподобномученика славна и молитвенника о душах наших достоблаженна.
Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.
Припев: Святый преподобномучениче Корнилие, моли Бога о нас.
Умиления ми воду излей, Господи, в сердце, и ум озари достойно воспети Твоего угодника, преподобнаго Корнилия.
Святый преподобномучениче Корнилие, моли Бога о нас.
Монахов наставник и учитель нелицеприятен был еси и, Богу сих приводя, мученическим венцем от земнаго царя венчался еси блаженне.
Слава: Христовым светолитием просвещаем, преподобне отче Корнилие, молитвами твоими, преблаженне, омраченную душу мою просвети, яко да воспеваю тя.
И ныне: Тишина Ты, Владычице, и пристанище погибающим в море грехов, темже к Тебе притекающих не отрини, Приснодево, но спаси Твоим предстательством Богоматерним.
Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.
Святый преподобномучениче Корнилие, моли Бога о нас.
Просветил еси люди, идолом служащия, светом истинныя веры, озари и нас, грешных, прибегающих к Твоему заступлению, благодатию от Всеблагаго Человеколюбца.
Святый преподобномучениче Корнилие, моли Бога о нас.
Всем блага духовныя и телесныя дея, наветом злых плоть твоя умертвися со святыми же дух твой вселися, и ныне с ними молися Христу о нас, преподобне.
Слава: Ныне в безконечную славу прешед от земли, окаянную душу мою страстьми, преподобне, прилежным очищением твоея молитвы уврачуй.
И ныне: Точию во храме Твоем, аки в корабле, Тобою окормляем, Богородице, избавляемся ныне от враг видимых и невидимых и укрепляемся Твоея помощию, Приснодево.
Господи, помилуй (трижды).
Из млада, Корнилие чудный, трудом и подвигом себе предав, игуменом Псково-Печерстей обители поставлен был еси, образом веры и постническаго жития всем быв, многия люди к Богу привел еси. За своя же великия добродетели завистию от злых гоним, мученически душу свою Богови предал еси. Того ради с верою возопиим: преподобномучениче Корнилие достославный, моли Христа Бога спастися душам нашим.
Ирмос: Услышах, Господи, смотрения Твоего таинство, разумех дела Твоя и прославих Твое Божество.
Святый преподобномучениче Корнилие, моли Бога о нас.
Обитель бяше издревле святых в Богозданней пещере, Богу Единому ведомая, ты же, отче Корнилие, тем подражая и место их подвигов почитая, множество иноков к Богу привел еси.
Святый преподобномучениче Корнилие, моли Бога о нас.
Не остави, Корнилие преподобне, твоими потами и трудами возращенныя сея обители, но охраняй ю, ибо и врази тя видеша охраняющим ю и укрепляющим.
Слава: Многоболезненныя страсти всегда врачуеши приступающих к тебе, благодать бо, преподобне, приим от Господа, содевати знамения и чудеса.
И ныне: Утоли, Богомати, свирепствующую бурю неверия и ожесточения, злыя страсти, поглотити хотящия Тя славящих и образ Твой почитающих, но заступи нас молитвами преподобнаго Твоего.
Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.
Святый преподобномучениче Корнилие, моли Бога о нас.
Яко камень драгий оградил еси крепко обитель от ратников злых, преподобне, изымая и свобождая иноков от страстей и добродетельми горе возводи.
Святый преподобномучениче Корнилие, моли Бога о нас.
Да не оскудеют, отче, твоими молитвами истиннии подвижницы благочестия во обители твоей, но купно со святым Чудотворцем Николаем, емуже охранения ея вверил еси, до трубы Архангела соблюди ю.
Слава: Преподобне отче, помози обители твоей, насельникам и всем нам вся козни лукаваго отражати, якоже ты иногда отражал еси видимыя враги и невидимыя.
И ныне: Мглу страстей наших разреши, Дево, и благодатною силою Сына Твоего отжени врагов коварство и наветы диавола от раб Твоих, Тя славящих.
Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.
Святый преподобномучениче Корнилие, моли Бога о нас.
Пречистыя дом, преподобне, оградил и украсил еси, темже и сам ныне во обители Ея на Небеси и на земли в храме Ея достойно обитаеши.
Святый преподобномучениче Корнилие, моли Бога о нас.
Утеши и утиши нас, сирых, и в добродетели нищих, преподобномучениче, житейскую гордость отревая и молитве истинней научая.
Слава: Содеяв, преславне, душу твою храм Святому Духу, был еси наследник Горняго Царствия, с Вышними Силами и со всеми святыми молися ко Господу о спасении душ наших.
И ныне: Сохрани дом Твой, Богородице, до скончания века и не остави нас, сирых, без Твоея Матерния помощи и предстательства преподобных Твоих.
Господи, помилуй (трижды). Слава, и ныне:
Светлый светильник Православия и сугубая Псковския земли защита был еси, многобожие искореняя и люди к Богу наставляя. Дом Богоматери тобою укрепися и прославися, добродетельми же украшен, венец мученика приял еси, поминай нас, чад твоих, и у Господа, преподобномучениче Корнилие.
Богом возлюбленный игумен изрядный, веры Христовой апостол и мученик, всем милосердый, и нищих питатель, от идолов люди приведый к Богу истинному, вере наставляя и Божия храмы устрояя, во обители Пречистыя монахов множества собрал еси, темже Богоматерь прослави Своя образы делами чудными, ихже свидетель неложен был еси; и ныне же от скорбных обстояний избавляеши, да с верою и любовию поем ти: радуйся, преподобномучениче Корнилие.
Ирмос: От Иудеи дошедше, отроцы в Вавилоне иногда верою Тройческою пламень пещный попраша, поюще: отцев Боже, благословен еси.
Святый преподобномучениче Корнилие, моли Бога о нас.
Ионы первоначальника, гонителей некогда избешаго, мученичество восприял еси, славне, темже с ним Богу молися, да сохранит обитель вашу невредиму и нас покаянием к вам привлечет.
Святый преподобномучениче Корнилие, моли Бога о нас.
Марк, пустынник тайный, аки Мелхиседек, немощию тя вразуми, Корнилие, о имени своем, его же смирению поревновати научи нас, блаженне.
Слава: Просветив твое сердце, преподобне, монахов был еси наставник, наказуя и уча и всех приводя к Божией воле, поя: отец наших Боже, благословен еси.
И ныне: Да заградятся, Богородице, Твоими молитвами уста лживая и льстивая не ведущих над верными покрова Твоего, и спаси всех, Дево, Тебе истинно служащих и Христово иго благое добре несущих.
Ирмос: Царя Небеснаго, Егоже поют вои Ангельстии, хвалите и превозносите во вся веки.
Святый преподобномучениче Корнилие, моли Бога о нас.
Вразумляеши живущия в ограде твоей, преподобне, являяся им яве и во сне наставляя, но и всем, молящимся тебе, чудно помогаеши и от злых бед избавляеши.
Святый преподобномучениче Корнилие, моли Бога о нас.
Моли о нас, преподобне, и не забуди к тебе притекающих, в скорбех и печалех сущих, подаяй утешение от твоея раки цельбоносныя.
Слава: Процвел еси яко финикс Давидски, отче, и обитель явился еси Духа Пресвятаго, о нас непрестанно моли почитающих верою пречестную память твою, преподобне Корнилие.
И ныне: Век скончавается, любовь оскудевает, победу лукавый торжествует, и кто нам помощи может, аще не Ты, Дево, Чудная Мати, оградиши Крестом Сына Твоего.
Ирмос: Воистинну Богородицу, Тя исповедуем, спасеннии Тобою, Дево Чистая, с Безллотными лики Тя величающе.
Святый преподобномучениче Корнилие, моли Бога о нас.
В дому Богоматери, якоже в Гефсимании, почиваеши ныне, блаженне, идеже, служа умиление, предстоял еси Престолу Божию смиренно, в вертепе освященному.
Святый преподобномучениче Корнилие, моли Бога о нас.
Никтоже неутешен отходит от твоея раки, преподобне, но исцеление душ и телес верующим подаеши всегда. изобильно.
Слава: Зриши Божия и Ангельския светлости патриарх и мученик и апостольския красоты, моли с ними Человеколюбца оставление грехов и жития исправление даровати нам, преподобне, хвалящим тя.
И ныне: Тишина велия бысть в пещере сущим, сует мира избегшим святым. Ты, о Мати Дево, Небесную тишину ниспосли и нам, Чистая, Тебе величающим.
 |
Вам понравилась статья? Тогда подпишитесь на обновления, чтобы не пропускать свежие материалы и сразу же их получать на электронную почту! |
.jpg){kind=icon}
