Познаем мир вместе
новые СТАТЬИ сайта
популярные бренды одежды из Беларуси

Канон святым благоверным князьям Борису и Глебу

Икона святых благоверных князей Бориса и Глеба

 

Молитвы святым и благоверным князьям и страстотерпцам Борису и Глебу

Акафист святым и благоверным князьям Борису и Глебу

 

Память празднуем 24 июля
(6 августа)

 

Тропарь, глас 2-й

Правдивая страстотерпца и истинная Евангелия Христова послушателя, целомудренный Романе с незлобивым Давидом, не сопротив стаста врагу сущу брату, убивающему телеса ваша, душам же коснутися не могущу. Да плачется убо злый властолюбец, вы же, радующеся с лики Ангельскими, предстояще Святей Троице, молитеся о державе сродников ваших богоугодней быти и сыновом Российским спастися.

 

Иной тропарь, глас 4-й

Яко плодовита винограда, отрасли добродетелей суще, Небесный дождь Христов приясте, источающе отечеству своему струю Православия, Борисе пречудне с доблим Глебом, вкупе молитеся Господеви сохраните град и люди, и на враги пособствовати, и душам нашим даровати велию милость.

 

Иной тропарь, глас тойже

Мученическою кровию порфиру окропивше светло, украшени предстоите, страдальцы славнии, Царю Безсмертному, и, венцы славы от Него приимше, молитеся стране нашей подати на враги одоление и душам нашим велию милость. 

 

Канон, глас 4-й

 

Песнь 1

Ирмос: Моря чермную пучину невлажными стопами древний пешешествовав, Израиль крестообразныма Моисеовыма рукама Амаликову силу в пустыни победил есть.

Припев: Святые благоверные князие-страстотерпцы Борисе и Глебе, молите Бога о нас.

Богомудрая двоице, велицыи страдальцы, со святыми Троице предстояще, молитеся очищение мне даровати, вас похваляющему.

Святые благоверные князие-страстотерпцы Борисе и Глебе, молите Бога о нас.

Божественное богатство исцелений и миро благовонное храм ваш, святии, в немже поем Христа Бога, вас прославльшаго.

Слава: Незаходимаго Солнца в себе стяжавше, Христа Бога нашего, преславне Романе с Давидом, освятите нас, честную память вашу почитающих.

И ныне: Красную, и избранную, и всечестную разумев Тебе, Божий, Пренепорочная, Сын Твой Сын бысть: сыны сотвори благодатию, Богородицу Тя чтущия.

 

Песнь 3

Ирмос: Веселится о Тебе Церковь Твоя, Христе, зовущи: Ты моя крепость, Господи, и прибежище, и утверждение.

Святые благоверные князие-страстотерпцы Борисе и Глебе, молите Бога о нас.

Веселием веселится Христова Церковь в памяти вашей, святии, и Творцу вопиет: Ты моя, Господи, крепость, и прибежище, и утверждение.

Святые благоверные князие-страстотерпцы Борисе и Глебе, молите Бога о нас.

Доблия венечники и страдальцы Христовы вси восхвалим светло, научившия нас Христу вопити: Свят еси, Господи.

Слава: Ни царства желания, ни пищи наслаждения, ни сребра и злата возжелеша, но Христу Единому вопияху: Свят еси, Господи.

И ныне: Избавляющаго человеки преслушания и лютаго падения, всему Виновнаго, Чистая и Всенепорочная, родила еси.

Господи, помилуй (трижды).

 

Седален, глас 1-й

Измлада Христа возлюбивше купно, братия честная, жизнь безстрастную стяжавше, славнии, целомудрие изволисте и пощение от страстей душевных и телесных, поспешение Божиею благодатию приемше, исцеляете вас поющия.

Слава, и ныне: Безневестная, Чистая Богородице Дево, едина верных Предстательнице и покрове, бед, и скорбей, и лютых обстояний всех избави, на Тя упование, Отроковице, имущих, и души наша спаси Божественными молитвами Твоими.

 

Песнь 4

Ирмос: Вознесена Тя видевши Церковь на Кресте, Солнце Праведное, ста в чине своем, достойно взывающи: Слава силе Твоей, Господи.

Святые благоверные князие-страстотерпцы Борисе и Глебе, молите Бога о нас.

Яко два светила возсиявшая, просвещаете люди ваша, Богоносцы, но и ныне избавите нас врагов обстояния, да почитаем вас, с Богом заступление наше.

Святые благоверные князие-страстотерпцы Борисе и Глебе, молите Бога о нас.

Врачевство неистощимое рака ваша показася, блаженнии, и пристанище небурное: вси бо, верою притекающии, обретаем от злых напастей избавление.

Слава: Любовию ко Христу привязаеми, тем и даров сподобльшеся страсти различныя исцеляти, сего ради ваше совершаем празднество, Богомудрии.

И ныне: Седяй на престоле Херувимсте и превознесене, яко престол имый, на руку Твоею почив, Марие Богоневесто, препрославленный Бог.

 

Песнь 5

Ирмос: Ты, Господи, мой Свет, в мир пришел еси, Свет Святый, обращаяй из мрачна неведения верою воспевающия Тя.

Святые благоверные князие-страстотерпцы Борисе и Глебе, молите Бога о нас.

Наста всечестный праздник и священное торжество славнаго Романа с Давидом, нося нам радость вечную, в нейже славим Господа, прославльшаго их.

Святые благоверные князие-страстотерпцы Борисе и Глебе, молите Бога о нас.

Добродетели украшени благолепием, светлый Романе с Глебом, страданием венчавшеся, враги же и брата посрамльше, за Христа приясте заколение.

Слава: Слышано бысть во всем мире честное и священное страдание ваше, и всяк язык возставляет славити Христа вас прославльшаго.

И ныне: Преста убо тление человека: Дева бо роди нетленно Бога Слова, паче естества и слова, и Дева паки пребысть.

 

Песнь 6

Ирмос: Пожру Ти со гласом хваления, Господи, Церковь вопиет Ти, от бесовския крове очищшися ради милости от ребр Твоих истекшею Кровию.

Святые благоверные князие-страстотерпцы Борисе и Глебе, молите Бога о нас.

О иже светлый ваш праздник совершающих, блаженнии, молитеся, и отечество ваше хранити от враг ненаветно, и мирно строение даровати молитвами вашими.

Святые благоверные князие-страстотерпцы Борисе и Глебе, молите Бога о нас.

Небеснаго Царствия рачителие бывше, блаженнии, Владыце Христу чистою совестию послуживше, и Тому предстояще, молитеся, спасти вас восхваляющих.

Слава: Прилепившеся Христу и на Heго все упование возложивше, блаженнии, сего ради убиени бывше, вечно с Ним царствуете.

И ныне: Усты, помыслом и сердцем, Пречистая, Тя, Богородицу, проповедаем: Тобою бо Богу примирихомся, отриновении преступлением первее праотца.

Господи, помилуй (трижды). Слава, и ныне:

 

Кондак, глас 3-й

Возсия днесь преславная память ваша, благороднии страстотерпцы Христовы, Романе и Давиде, созывающи нас к похвалению Христа Бога нашего. Тем, притекающе к раце мощей ваших, исцеления дар приемлем молитвами вашими, святии: вы бо божественнии врачеве есте.

 

Икос

Разумное житие совершая, преблаженне, царским венцем от юности украшен, всебогатый Романе, власть велия был еси твоему отечеству, во всей земли Российстей. Тем, видя твой успех, Христос Бог судом Своим на мучение тя призва, крепость тебе подав с Небесе, да победиши врага мужески с Давидом, братом твоим, пострадавшим с тобою: вы бо Божественнии врачеве есте.

 

Песнь 7

Ирмос: В пещи Авраамстии отроцы персидстей, любовию благочестия паче нежели пламенем, опаляеми, взываху: благословен еси в храме славы Твоея, Господи.

Святые благоверные князие-страстотерпцы Борисе и Глебе, молите Бога о нас.

Божественная и пресветлая память ваша, яко Небо светозарное, показася, и яко солнце светоносно, просвещая без сумнения Христу вопиющия: благословен еси в храме славы Твоея, Господи.

Святые благоверные князие-страстотерпцы Борисе и Глебе, молите Бога о нас.

Кто не удивится и кто не воспоет и прославит верно преславных мученик Христовых, Бориса с Глебом, Христова ради смирения возненавидевших диадиму и царство.

Слава: Мглу безбожия отгнавше, светло научиша люди своя чести в Троице Единаго Бога и усердно пети: благословен еси в храме славы Твоея, Господи.

И ныне: Вышняго освященное Божественное селение, радуйся, Тобою бо дадеся радость, Богородице, вопиющим: благословенна Ты в женах еси, Всенепорочная Владычице.

 

Песнь 8

Ирмос: Руце распростер, Даниил львов зияния в рове затче; огненную же силу yraсившa, добродетелию препоясавшеся, благочестия рачители, отроцы, взывающе: благословите, вся дела Господня, Господа.

Святые благоверные князие-страстотерпцы Борисе и Глебе, молите Бога о нас.

Просиявши днесь пресветлая память ваша, блаженнии, верныя созывает на торжество, прославити терпения ваша, Христу же вопити: благословите, вся дела Господня, Господа.

Святые благоверные князие-страстотерпцы Борисе и Глебе, молите Бога о нас.

Богоявленнии и новии страдальцы Тебе, Христе, единаго возлюбиша и люди наставиша пети Тя, Творцу всех: благословите, вся дела Господня, Господа.

Слава: Правды светильницы возсиявшии, украшени добротою мучения, просвещающе сердца верных, недуги отгонят от вопиющих верно: благословите, вся дела Господня, Господа.

И ныне: Избавляя нас, возсия из Тебе Господь, Дево Чистая, Егоже моли, Владычице, просветити поющия Тя и обстояния избавити вопиющия: благословите, вся дела Господня, Господа.

 

Песнь 9

Ирмос: Камень нерукосечный от несекомыя горы, Тебе, Дево, краеугольный отсечеся, Христос, совокупивый разстоящаяся естества. Тем, веселящеся, Тя, Богородице, величаем.

Святые благоверные князие-страстотерпцы Борисе и Глебе, молите Бога о нас.

Испещрени бывши Божественными добротами, страдании вашими к Богу востекосте, венцы победы от Него приемлюще, тем ваша певцы поминайте, да вас непрестанно величаем.

Святые благоверные князие-страстотерпцы Борисе и Глебе, молите Бога о нас.

О Божественная двоице, самобратная и светозарная! Молитеся даровати очищение согрешений и прежде конца жития исправление, да вас непрестанно величаем.

Слава: От млада возраста освяти вас Вседетель Бог и окормители изрядны плавающим в мори жития показа, тем согласно почитаем память вашу.

И ныне: Спаси мя, всех рождшая Избавителя, разори души моея облаки, Света облаче, Всесвятая Владычице, и сильна соделай на страсти, борющия мя.

Чтобы оставлять комментарии, используя стандартную форму, необходимо войти или зарегистрироваться.
Так же вы можете оставить комментарий используя форму "Вконтакте"
Закрыть комментарии
Все категории раздела «Православие»
новые РЕЦЕПТЫ сайта
популярные бренды одежды из Беларуси